मत्तय 26

ईसुहू माइलोअ योजना

1 जाहां ईसु ए आखी गोठी कोत नेवराअयू, ताहां तियाआ सेलाहां कोनु वोल्यू. 2 "तुमू जांअताहा, के बेन दिहोअ फाटी वल्हांडणोअ तिवार आवे; आन माहुंउं बेटुह्हू क्रुस खांबोपोअ सोढ़वाइलोअ काजे तोआत जाय."

3 ताहां मुख्य पुंजारा आन पुडारी नेहें कैफा नावोअ डाया पुंजाराआ राजवाड़ाम एक्ठा ओवा. 4 आन तियां तियांज विसार कोआ वोल्या के ईसुहू केहें कोइत तोइत माइत टाके. 5 पोन ते कोताते के, "वल्हांडण तिवारोअ होमसे नाहां; एहलोहो ने ओवुहूं जोवे के माअहूंमेहें दोंगा मातीज जाय."

मोगला अत्तरोवाईं ईसुउ अभिशेक

6 जेहेलाम ईसु बेथानीम वोडा दुखोवाला शिमोनोअ कोअमेहें ओतू. 7 ताहां एक बाय संगमरमरोअ*26:7 संगमरमर ओ एकी जातीइ डोण होय. बासनोमेहें अत्तर लेत कोइत ईसुउ जागे आयी, आन जाहां ईसु रोटू खानू बोठू, तेहेलाम तियी तियाआ मुंडोपोअ ओली देदो. 8 ओं पालीत, तियाआ सेला बावराइत कोना वोल्या, "ओं नुकसान काहा? तिंया कोयो. 9 ओं ते हाजी किमतेम वेसीत गोरब्योहों आपी देवाअतो."

10 ओं जाईंत ईसु तियांहां कोयो, "बायीही काहा तारास देताहा? यी माअरी हाजो आन बाहरी काम कोअयोहो. 11 गरीब माअहें सादा तुमाअरी रोतेहे, पोन आंय तुमाअरी सादाज नाहां रोनारु. 12 यी माआं डिलोपोअ जो अत्तर ओल्योहो, तों माहूं डाटीइलोअ तियारीइ काजे कोअयोहो. 13 आंय तुमुहूं नक्की कोहो, के आखी दुन्यामेहें जिहीं का बी ए हाजी बातमी परसार ओवे, तिहीं यीइ या कामोअ वर्णन बी तियीइ ईतेमेहें ओवे."

यहुदा ईसुहू तोइत आपीइलोम राजी

14 ताहां बारा सेलामेर्‍युउ एक जोऊं जियाआ नाव यहुदा इस्कार्योत, तो मुख्य पुंजाराआ जागे गोयू 15 आन तिये कोयो, "जर आंय तुमुहूं ईसुहू तोइत आपिहीं, ताहां तुमू माहूं कि आपहा?" तियां तियाहा तीस सांदीइ रुप्या गोणीत आपी देदा. 16 ताअहां रोत यहुदा ईसुहू तोइत आपिइलोअ काजे हाजो गालो पालु वोल्यू.

ईसुउ तियाआ सेलांअरी वल्हांडण तिवारोअ सेलवार्‍यीइ पांगात

17 वल्हांडण तिवारोअ पेल्लेए दिहे सेला ईसुउ जागे आवित कोना वोल्या के, "ताआ काजे आमू वल्हांडण तिवारोअ रोटू खाअलोअ तियारी काअली जागे कोओ?"

18 तिये कोयो, "होयरोम अमुक माहुंउं जागे जात कोइत कोवा के, ‘गुरु कोहे, माआं वेल आहने होय, आंय माआं सेलांअरी ताआ जागे वल्हांडण तिवार कोअहीं.’"

19 ताहां सेलां ईसुउ आदेश मान्या आन वल्हांडणोअ रोटू तियार कोअयू.

20 जेहेलाम सिंजिवड़ो पोड़्यो, तेहेलाम ईसु बारा सेलांअरी रोटू खानू बोठू. 21 जेहेलाम ते खाताते तेहेलाम ईसु कोयो, "आंय तुमुहूं नक्की कोहो, के तुमामेर्‍युउ एक जोऊं माहूं तोइत आपे."

22 ताहां सेला खुब नाराज ओवा, आन हारेक जोओं तियाहा फुसा वोल्या, "गुरु, तो आंय होय के?"

23 ईसु उत्तर आप्यो, "जिये माअरी ठालीमेहें आथ टाक्युहू, तोज माहूं तोइत आपे. 24 माहुंउं बेटुह्हू ते जेहलोहो तियाआ बाप्तिमेहें लेख्योहो, तेहेंज कोइत तो जाहे खोरु; पोन तिया माहुंउं केतीही वाजे जियाअ आथोवाअहीं माहुंउं बेटुह्हू तोआये: जर तिया माहुंउं जल्मज ने ओवतो तों तियाआ काजे हाजो रोतो."

25 ताहां तियाहा तोइत आपनारु यहुदा कोयो, "गुरु, तो आंय होय के?"

ईसु तियाहा कोयो, "तुमे कोत देदो."

प्रभु भोज

26 जाहां ते खाया कोअताते, ताहां ईसु रोटू लेदू, आन आशिर्वादोअ प्रार्थना कोअयी, आन रोटू मुड़्यू, आन सेलाहां आपीत कोयो, "ल्या, खावा; ओं माआं डिल होय."

27 फाशुउ तिये वाटकू लेत कोइत देवोअ धन्यवाद कोअयो, आन तियांहां आपीत कोयो, "तुमू आखा यामेहें रोत पिवा, 28 काहाके ओं माआं शप्पतोअ रक्त होये, जों जाअखीलां जोओंअ पापोअ माफीइ काजे वोहाड़्योहो.