Mateus 8

एका मुख्य सिपायड़ाआ विश्वास

5 जेहेलाम ईसु कफर्णहुमोमेहें आयू, ताहां एक रोमी सिपायड़ाआ आधिकार्‍ये तियाआ जागे आवित कोइत तियाहा रावणी कोअयी, 6 "प्रभु, माआं पावर कोअमेहें लखवाअ बिमारी वाअहीं जाअखीलुहू मांदवाड़्यु होये."

7 ईसु तियाहा कोयो, "आंय आवित कोइत तियाहा हुदारीहीं."

8 सिपायड़ाआ आधिकार्‍ये कोयो, "प्रभु, तू माआं कोअ आवे एहेलिही मामेहें लायकी कायनाहां, पोन फक्त सोबीवाअहीं एतुज कोत देही, तेबी माआं पावर हुदरीत जाय. 9 काहाके आंय बी वोडा आधिकार्‍योंअ निसे रोहो, आन माआं आथोअ निसे बी सिपायडां होये. जेहेलाम तियाहा आंय कोत्लू, ‘जा!’ ताहां तो जात्लू; आन बिहीराहा कोत्लू, ‘आव!’ ताहां तो आवत्लू; आन जेहेलाम माआं पावरोहो कोत्लू, ‘ओं कोअ’ ताहां तो कोअत्लू."

10 ए गोठ उनाइत कोइत ईसु पोंगलात गोयू, आन जें माहें तियाआ फासाड़ी आवतेते तियांहां कोयो, "आंय तुमुहूं खोरीज कोहो, इस्राएलोमेहें बी एहेलुहू विश्वास माहूं नाहां देखुहूं जोड़्यू. 11 फाशुउ आंय तुमुहूं कोहो के, दिही उगताआ वोगेहे आन दिही बुड्ताआ वोगेहे रोत जाअखीलेहे जोएं आवे, आन होरगाआ राजोमेहें अब्राहाम, इसाहाक, आन याकोबोअ पांगातीम बोहे. 12 पोन राज्याआ पोर्‍ये बाअथे आंदारामेहें टाकी देवाय, जिहीं रोड़ीइलो आन दात कोकरावीइलोअ रोय." 13 ताहां ईसु तिया सिपायड़ाआं आधिकाऱ्योहो कोयो, "कोअ जा, जेहलुहू ताआ विश्वास होय, तेहलोज ताआ काजे ओत जाये." आन तियाआ पावर तेतीज वेले हुदरीत गोयू.