Atos 3

Pitar na Zekcuatih Pahuat Kangsa bya shyak

1 Hnguːp huat ta, khusun cuːn pathum hngihminnei cuːn nyng Pitar la Jawhan biatimm ma y hngih zet. 2 Yn hnguva hngynnu duk kuːhthuh khucek tih khyang pahuat ce ym khynnlu, yn ce biatimm ma voangtih ha cenga y hngiei jy tawk, khyang ha na yn poaijei tih tijyng ym hyau khyang biatimm kyttung cenga hnguːp tyng ym tyak. 3 Pitar la Jawhan biatimm ma voang ngy khyang y hnguh hnguva, yn hyih jyng tyangkaw y hngiei. 4 Pitar la Jawhan na y hngih to sih. Pitar na, "Kei hngih to," y tinyak. 5 Yn khiannyng yn hyih cengkuːh juːhuat huat y lawh ey tijyng uːtnaw theila yn hyih y to sih. 6 Pitar na, "Kei cengnga hngaa, hyaan myi jo, ynbawlakhy nyang nyng ky bei jy khyang ce ni jyng ky tyakei. Yn ce Nazareth luh zaw Jesuh Khrit ming ngyng thoo tila zet," y tinyak. 7 Yn pynnyng kheplyam kut tyng ynih thooh theila y khu la khumik khy caang bya hlyi. 8 Yn hnguva yn ce tung theila y donglyam theila zet ty y phun. Yn pynnyng yn ce biatimm ma Nuatpaw khuːhbia vy tawk yn ha dy huattyng y zet. 9 Khyang ha na zet theila Nuatpaw khuːhbia khyang ynih ym hnguh hnguva, 10 yn ce biatimm poaijei tih kytung nga ngoa theila hngiei tih khyang tinyak khyang yn ha na ym hnguat, pynnyng yn ha na ynih eyng ibaw thawn ma tinyak khyang muːnnaw awla tha ym lawhei.