Mateus 20

Vanyamalo he mbuva ya mizabibu

1 Kwaite Udilao wa Kiumbi utoiane sa muhe elo mbuva ya mizabibu, ekae hachalhenuchalhenu kuvatii vanyamalo he mbuva kuu ya mizabibu. 2 Vekayo na kuiseko mzalo mbuva avalhanu ka vanyamalo kwa muaze muwe, niho ekavatii he mbuva kuu ya mizabibu. 3 Ekahali hemadamo ya kela kai chalhenu, ekavaakho vahe vahali veumae he kikhoja, tevelo nyamalo. 4 Ekavaba, "Soni na kune mureboi nyamalo he mbuva gho ya mizabibu, naani ninemuo hu chimutara." 5 Niho ka mzalo mbuva ekaso kahali he madamo ya kela sita chakhakho nahe madamo ya kela kenda chamagheni, ekaboi wato oto. 6 Hareahe madamo ya kela ikado nawe chamagheri, ekaso kahali, ekavahelha vahali veumae to kihoja, ekavalhasu, "Kwaakhoni muumae ii chakhako kizime neri musiboi nyamalo?" 7 Vekamba, "Kwaite tehelo muhe etuoe nyamalo." Nau ekavaba, "Soni na kune mureboi nyamalo he mbuva gho ya mizabibu." 8 Hareakhokwa, ka mzalombuva ekamba mzake mihaku kuu, "Vase vanyamalo uvalhanu mawero kini, ukulholhoshi nahu va mkhito kubuu he nyamalo, na kufiriti nahu vabosi kubuu he nyamalo." 9 Niho varealita huva kela ikado nawe, kira muwe ekadoria mhaku kuu mkhabuna wa muaze. 10 Nahu va bosi kubuu he nyamalo, vekatoti ite veneowe kumure, navo vekaowe kira muwe ekadoria mhaku kuu mkhabuna wa muaze. 11 Vereadoria mhaku kini, vekalholhoshi kumkararija hu mzalo mbuva, 12 vekaba, "Ya vahe uvaoe nyamalo mkhito veboie nyamalo kela we bi, kwaakhoni iji utulhanue mhaku uaghae navo naho nne tunyamarike na nyamalo giru chakhakho na kaaze kekhaisha kwa muaze mzime?" 13 Hu mzalo mbuva ekamba muwe kini, "Msaho sikutae. Ho, tetuisekoe naari nikulhanu mhaku wa muaze muwe?" 14 Dori mhaku kechi uso. Ntedumu kumlhanu wa mkhito sakigi nikuoe ari. 15 Ho, ani sidumuwe kuboi hucho nidumu namhaku gho? Hile utako wiju kwaite ani nimkulho? 16 Yesu ekafiriti ekuba, "Kwato vamkhito venekhwa va bosi naho vabosi venekhwa va mkhito."