1 Hata handa mbakulongela hilongelo ya bhandu na ya akaatumichi bha kunani kwa Annoongo, nambo handa nangali upalio nenga mii handa lilobhe lya lidebe jika au kengele. 2 Kabhele, ngombola kutangacha ngani ja Annoongo, kongo mmi kuimanya hikubho yoa ya Annoongo yangamanyikana, ngombola kuhobhalela muno hata ngakombwile kuamia litombi, nambo handa nangalia upalio nenga ngabha chilebhe. 3 Handa moite hilebhe yangu yoa na kwapekeanga akaahocho, na handa moite kila chilebhe chimiinacho, handa nangali upalio nganyangatila chilebhe.

4 Mundu jwabhile na upalio kuhimbilila, kujangatila bhangi, jwabhile na upalio jwangali bwihu, ngachilolalola, na wala ngachipuna. 5 Jwabhile na upalio atendakwatopea bhangi, ngalolea hikubho ya kwaajangatila mweene, wala ngatumbala chindema, na wala ngakombokela hikubho ibohu, 6 mundu jwabhile na upalio ngahachukila ubohu, nambo atendakuhachukila ukweli. 7 Mundu jwabhile na upalio kuimbalila kwa yoa, mundu jwabhile na upalio kuhobhalela bhangi, mundu jwabhile na upalio kulupalila.

8 Upalio ngapela, handa hibhile ngwahupa ya kutangacha ngani ja Annoongo, yeneyo ipakupela lichobha limo, handa hibhile ngwahupa ya kulongela hilongelo higeni, hipakupela lichobha limo, handa gubhile umanyo, na gonogwe gupakupela lichobha limo. 9 Ligongo umanyo gwitu ngachimanya kila chilebhe, na tutendakumanya kachoko tu patutangacha lilobhe lya Annoongo. 10 Nambo chenichela cha kukamilika pachipakuhika, yoa yangakamilika ipakubhoka.

11 Panakibha mwaana chilemba nakalongela handa mwaana, nakaganikia handa mwaana. Nambo nangocheni nenga nga ngolite na hikubho ya chigwaana nekite. 12 Chituchibhona nangocheni nga handa ngachibhonanga maha mu chindala chichijingile machi, nambo muda guguhika tupakubhona kila chilebhe maha. Nangocheni ndendakumanya kachoko tu, nambo muda guguhika mbakuimanya kila chilebhe handa chichibhile, handa henela Annoongo chibhatenda kumanya nenga.

13 Bahi nangocheni, gapakuhigalila gangani jika, kuhobhalela, kulupalila na upalio, nambo likolongwa kupunda yoa nga kwaapalanga bhangi.