1 Chipano nghani ya vijha mwalemba pa mbhaso za Mzimu Wa Mnungu.

Nifuna mujhiwe bwino vindhu ivi abale wanga. 2 Mujhiwa yapo mdali mkali osamjhiwe Mnungu, mdatengedwa kulambila viboliboli. 3 Nifuna mujhiwe kuti mundhu waliyonjhe uyo wachogozedwa ni Mzimu wa Mnungu, siwakhoza kukamba, "Yesu walesedwe!" Chinchijha mundhu waliyonjhe siwakhoza kukamba "Yesu ni Ambuye," popande kuchogozedwa ni Mzimu wa Mnungu.

4 Pali mbhaso zosianasiana za Mzimu wa Mnungu, nambho zonjhe zichoka kwa Mzimu ni mweyujha mmojhi. 5 Tena pali mitundu yosiana yotumikila Ambuye, yonjhe ichoka kwa iye yujha. 6 Pali mitundu yosianasiana yochita njhito, nambho Mnungu ni mmojhi, iye ndeuyo watikhozecha kuchita njhito zonjhe. 7 Nambho, mbhaso za muuzimu apachidwa wandhu osiyanasiyana dala za thangatile wandhu wina. 8 Mzimu umpacha mundhu mmojhi mawu la ekima, ni mwina mawu lojhiwa umowakondela Mzimu mmeneyo. 9 Mzimu umweo umpacha mwina kukhoza kukhulupilila kwa kukulu, ni mwina wampacha kukhoza kulamicha odwala. 10 Mzimu umpacha mwina mbhaso yochita vodabwicha, mwina wampacha ulosi, mwina wampacha kusiyanicha mbhaso zichoka kwa Mnungu ni opande kwa Mnungu, mwina wampacha kukamba mikambo ya chilendo, mwina mbhaso yotambulila mikambo ya chilendo. 11 Ivi vonjhe yachitika ni Mzimu mmojhi, ni mzimu umenewo nde uwo umpacha kila mundhu mbhaso yake.

12 Ngati umo ili thupi ni limojhi, nambho lili ni viwalo vambili, atangati viwalo valivambili vichita thupi limojhi, nde umo ili kwa Kilisito. 13 Pakuti kwa Mzimu mmojhi, taonjhe tidabatizidwa kwa thupi limojhi, atangati Ayahudi kapina Agiliki, akapolo au osati akapolo, ni taonjhe tapachidwa ni Mzimu mmojhi.

14 Pakuti thupi lilibe chiwalo chimojhi, nambho viwalo vambili. 15 Ngati mwendo udakakamba, "Ndande ine opande jhanja, chimwecho ine opande wa thupi," kwa kukamba chimwecho nde idakachita jhanja silidakhala chiwalo cha thupi. 16 Ngati khutu lidakakamba, "Ndande ine opande diso, chimwecho ine opande wa thupi," Kwa kukamba chimwecho idakachita khutu silidakhala chiwalo cha thupi. 17 Ngati thupi lonjhe lidakakhala diso, kuvela kudakali kuti? Ngati thupi lonjhe lidakali khutu kununjha kudakali kuti? 18 Nambho ndeumo ili Mnungu waika viwalo va mitundu yosiana mthupi, kila chiwalo ngati umo wafunila Mnungu. 19 Ngati viwalo vonjhe vidakali chiwalo chimojhi thupi lidakali kuti? 20 Uzene, nikuti kulini viwalo vambili nambho thupi limojhi.

21 Chimwecho, diso silikhoza kulikambila jhanja, "Sinikufuna!" Ata mutu siukhoza kuukambila mwendo, "Chabwino sinikufunani!" 22 Nambho pamalo pake, vijha viwalo va thupi ivovioneka vofooka ndeivo vifunika kupunda, 23 ni viwalo vonjhe ivo sivilemekezeka, viwalo vimenevo ndeivo tivilemekeza kupunda, ni viwalo va thupi ivo sividakhadwe ndeivo vakhadwa kupunda, 24 vijha viwalo vabwino sivifunika kusungidwa. Mnungu mwene waviika pamojhi viwalo vathupi nikuvipacha ulemu kupunda vijha vachepekela ulemu. 25 Dala pasadakhala kulekana kwa thupi, ila viwalo vonjhe vilelane nivinjake. 26 Ngati chiwalo chimojhi chikapwetekedwa, viwalo vonjhe vipwetekedwa, ni chiwalo chimojhi chikaelekeledwa, ni viwalo vina vikondwa pamojhi niicho.

27 Anyiimwe mwaonjhe ni thupi la Kilisito, ni kila mmojhi wanu nichiwalo cha thupi limenelo. 28 Mnungu waika kila chindhu mu gulu la wandhu amkhulupilila Yesu, woyamba atumwi, akawili alosi, akatatu oyaluza, ndiipo ochita vodabwicha, ni mbhaso yo lamicha, mbhaso yotangatila wina, ni wandhu okamba mikambo ya chilendo. 29 Asati wonjhe ni atumwi ni asati onjhe alosi ni asati onjhe ni oyaluza. Asati onjhe achita vodabwicha. 30 Osati onjhe ali ni mbhaso yolamicha matenda ni osati onjhe akhoza kukamba mikambo yachilendo, ni asati wonjhe akhoza kutambulia mikambo ya chilendo. 31 Muendekele kukhumbila, kupata mbhaso za zofunika, nde yapo simpate mbhaso zazikulu kupunda.

Atachimwecho nakulangizani njila ya bwino.