1 Mfunefune kukhala ni chikondi, ni kufuna mbhaso za Muzimu. Hasa mfunefune kupunda kulalikila Uthenga wa Mnungu. 2 Pakuti, anyiyao akamba kwa mikambo ya chilendo, siakamba ni wandhu ila akamba ni Mnungu, ndande palibe uyo wamuelewa nambho wakamba vindhu va chisisi va mumzimu mwake. 3 Nambho iye walalikila Uthenga wa Mnungu wakamba, wakamba ni wandhu mau yakwakonja, ni kwathila mtima pa kumkhulupilila Kilisito. 4 Mundhu wakamba kwa mikambo ya chilendo wajhiika bwino, nambho uyo walalikila Uthenga wa Mnungu wakonja gulu la wandhu akhulupilila Yesu.

5 Nidakakonda kila mmojhi wakambe kwa mkambo wapachidwa ni Mzimu wa Mnungu, nambho nidakakonda kupunda mkhale ni mbhaso ya kuuzila uthenga wa Mnungu, pakuti mundhu uyo wauzila uthenga wa Mnungu wachita bwino kupunda kusiyana ni uyo wakamba kwa mikambo yachilendo, nambho ifunika wakhalepo mundhu uyo wavifotokoza vindhu vimenevo, dala gulu la wandhu amjhiwa Kilisito lithangatilidwe. 6 Chipano, nikajha kwanu nikukamba kwa mikambo yachilendo siikutangatilani chiyani? Nambho nikakukambilani maloso yayo napachidwa kuchoka kwa Mnungu, kapina nikakupachani njelu, nikachocha ulosi kapina mayaluzo pamenepo siikhale nakuthangatilani.

7 Ata vindhu ivo vilibe umoyo, yapo vichocha mvekelo ngati chimwechi, vitolilo, zeze, mundhu siwajhiwe bwanji nyimbo iimbidwa ngati palibe misambo yotimba? 8 Ni ngati, mbetete ikalila popande mvekelo uwo siujhiwika kuti wachiyani yani uyo siwajhikonjekele kwa ndeo? 9 Chinchijha, ni anyiimwe mkakamba mawu siyajhiwika siajhiwe bwanji ilo mkamba? Pakuti simjhikamba mmwambammwamba! 10 Kuli mikambo yambili pajhiko, ila yonjhe ili nimate. 11 Nambho ikakhala ine sinijhiwa mate yamkambo uwo wakamba mundhu mwina, ine sinikhale mlendo kwake mundhu mmeneyo, niiye siwakhale mlendo kwaine. 12 Mchomwe, ni anyiimwe pakuti mkhumbila kukhala ni mbhaso za Mumzimu, ni mjhitaidi kupunda kupeza vijha vitangatila kumanga gulu la wandhu amkhulupilila Yesu.

13 Chimwecho mundhu wakamba mkambo wachilendo, niwapembhe kupata kukhoza kutambulila chijha wakamba. 14 Pakuti nikapembha kwa mkambo wachilendo, mzimu wanga ndeuwo upembha, nambho njelu zanga zikhala chajhe. 15 Nichite chiyani, ndiipo sinipembhe kwa mzimu wanga, sinipembhenjho kwa njelu yanga, niimbe kwa mzimu wanga, niimbenjho kwa njelu yanga. 16 Ukamtamanda Mnungu kwa mzimu wakope, siwakhoze bwanji mundhu wakawida wali pa msonghano wa kumlambila Mnungu kutanikila pembhelo lako la mayamiko kwakukamba "Ikhale mchimwecho" Ngati siwajhiwa icho ukamba. 17 Pembhelo lako la mayamiko likhoza kukhala la bwino, nambho mundhu mwina silimthangatila.

18 Nimuyamika Mnungu pakuti ine nikamba mikambo ya chilendo kupitilila anyiimwe mwaonjhe. 19 Nambho, mu misonghano ya mugulu ya wandhu amkhulupilila Yesu, mbasa nikambe mawu yasano yamate kwa njelu dala naayaluze wina kusiyana ni kukamba mawu maelufu ya mkambo wa chilendo.

20 Abale msakhala ngati wana mumaganizo yanu, nambho pa vindhu voipa, mkhale ngati wana akhanda, nambho pa kuganiza kwanu mukhale wandhu mwakula. 21 Malembo ya Mnungu yalembedwa,

"Kwakupitila wandhu akamba mkambo wachilendo,

sinikambane ni wandhu akamba Ambuye.

Sinikambe kwakupitila milomo ya alendo,

nambho atachimwecho sianivechela."

22 Chimwecho, mbhaso yokamba mkambo wachilendo nichizindikilo opande kwa anyiyao amkhulupilila Kilisito, nambho kwa anyiyao siadamkhulupile Kilisito, nambho mbhaso yolalikila Uthenga wa Mnungu ni ndande kwa anyiyao amkhulupila Kilisito, ni osati ndande ya anyiyao siadamkhulupile Kilisito.

23 Chimwecho ngati gulu lonjhe la wandhu amkhulupilila Kilisito, ni wonjhe yapo akomana pamojhi, ni onjhe akayamba kukamba kwa mkambo wa chilendo, akalowa wandhu akawaida kapina osamkhulupila Kilisito, bwanji, sakamba anyiimwe amsala? 24 Nambho wonjhe ikakhala alalikila Uthenga wa Mnungu, wakajha mundhu siwaelewa kapina siwada mkhulupile Kilisito, yonjhe siwaya vele siyamchimikizile kuipa kwake mwene. Ni yonjhe siwayavele siyamlamule mwene, 25 yabisika mumtima mwake siyaikidwe pandhandala, ni siwagwade ni kumlambila Mnungu uku niwalapa, "Zene Mnungu wali pamojhi namwe!"

26 Ichi ndeicho nikamba abale, yapo mkomana pamojhi kumlambila Mnungu, mwina waimbe nyimbo, mwina wayaluze, mwina wakhale ni maloso ya Mnungu, mwina wakambe kwa mkambo wa chilendo, mwina watambulile chijha chakambika, yonjhe yakhale ndande yakutangatila gulu la wandhu amkhulupilila Yesu. 27 Ngati mundhu waliyonjhe wakamba kwa mkambo wachilendo, basi akambe awili kapina atatu, osati kupitilila, mmojhi pambuyo pa mwina, niifunika wakhalepo wotambulila. 28 Nambho ngati palibe uyo wakhoza kutambulila, ndiipo ifunika uyo wakamba mkambo wa chilendo wasiye kukamba yapo asonganika, ni wajhikambile mwene wake ni Mnungu. 29 Awili kapina atatu ngati apachidwa Uthenga wa Mnungu akambe, ni wina ayapenyecheche yayo yakambidwa. 30 Ngati mundhu wakhala kumsonghano wa kumlambila Mnungu wapeza maloso kuchoka kwa Mnungu, yujha wakamba waleke kukamba. 31 Pakuti mwaonjhe mukhoza kulalikila Uthenga wa Mnungu, mmojhi pambuyo pa mwina, dala mwaonjhe mkhoze kujhiyaluza ni kuthilidwa mtima. 32 Uyo wali ni mbhaso za kulalikila Uthenga wa Mnungu ifunika wailamule nimbhaso imeneyo, 33 pakuti Mnungu osati Mnungu wosokaniza, nambho Mnungu wa mtendele.

Ngati umo ili mu gulu la wandhu amkhulupilila Yesu, 34 wachikazi akhale kimya mumsonghano. Safunika kukamba, ngati umo likambila thauko la Ayahudi, ajhichiche. 35 Ikakhala afuna kujiyaluza chindhu, afunika wafunjhe acha amunao kukhomo. Pakuti ni manyazi wamkazi kukamba mugulu la wandhu amkhulupilila Yesu.

36 Kapina mawu la Mnungu lidachoka kwanu? Kapina lakujhelani anyiimwepe? 37 Mundhu wakajhiona iye ni mthenga wa Mnungu kapina wali ni mbhaso ya mu Mzimu, ni wayajhiwe yaya nikulembelani anyiimwe nilamulo la Ambuye. 38 Nambho mundhu ngati wadelela yameneyo, ata anyimwe mumdelele.

39 Chimwecho, abale wanga mfunika kukhumbila kupunda kulalikila Uthenga wa Mnungu, nambho simudamkaniza mundhu kukamba kwa mkambo wa chilendo. 40 Chimwecho vonjhe vichitike ngati umo ifunikila umo ifunikila.