1 Chipano nghani ya chijha nalemba kwa vakudya va mahoka.

Tijhiwa ife taonjhe tali ni njelu, njelu zitipacha dama, nambho chikondi chitikonja. 2 Wonjhe yao aganiza kuti ajhiwa bwino vindhu fulani, zenedi sajhiwa ngati umo afunikila kujhiwa. 3 Nambho mundhu wamkonda Mnungu, wajhiwika ni Mnungu.

4 Chimwecho, nghani ya kudya vakudya ivo vachochedwa mahoka, tijhiwa kuti, chiboliboli osati kandhu pajhiko nikuti kuli Mnungu mmojhipe. 5 Ata ngati alipo atanidwa "minungu," ikhale kumwamba kapina pajhiko, ni ata ngati kuli "minungu yambili" ni "mambuye ambili," 6 nambho kwa ife walipo Mnungu mmojhi, Tate, uyo waumba vindhu vonjhe ni kupitila iye tikhala amoyo, ni kuli Mbuye mmojhi, Yesu Kilisito, kupitila Yesu Kilisito vindhu vonjhe vaumbidwa ni kwa ndande yake ife tikhala amoyo.

7 Nambho osati kilammojhi wajhiwa uzene uwu. Wandhu akumojhi kwa kuzowelela kuchocha njhembe kwa viboliboli akali kuganiza kuti vakudya vonjhe vachochedwa kwa mahoka, ni ndande sakakhulupilile bwino ajhiona kuti achita chindhu icho chidavomelezeke ni Mnungu. 8 Nambho chakudya sichikhoza kutisendeza pafupi ni Mnungu, sitichepecha chilichonjhe ngati sitidya, ata tikadya sitichulucha chindhu.

9 Nambho ukhale maso, uwu ufulu wanu usadaachiticha anyiwajha achepekedwa chikhulupi ammsiye Mnungu. 10 Mate yake mundhu wali ni chikhulupi chaching'ono wakakuona iwe, "Uli ni chikhulupi chachikulu," ukudya chakudya ivo vachochedwa mahokha, ichimikiza ata iye nayo wadye vindhu va mahoka? 11 Ni uyu mundhu wali ni chikhulupi cha ching'ono, uyo Kilisito wadamwalila ndande yake, wayomwechedwa ndande ya "kujhiwa kwako!" 12 Chimwecho, yapo mchita machimo kwa achabale wanu kwa njila iyi ni kwaika chilonda, mumlakwila Kilisito. 13 Chimwecho, ngati chakudya chikamkwiicha mbale wakhulupila wachite machimo, sinidyanjho nyama, dala sidamchita wakhulupila wachite machimo.