मत्ती 13

साम्बाअल आहान

24 येशुले फरि नकाङजन छुट्टै आहान आसथएवाङ, "स्वर्गल राज्य तोलोअ रुमन ताइन्या हो, जोले चान्या खेएल धूर आवाहौ।" 25 तर सोगल रुयाङ रारुउज्याऔक ओलं आशत्तुर रांऔ, ओटन पलीमाल आखार-खार्ल साम्बाअल धूर वाइस्यु हिनौ। 26 जब पलीमाल बिरवा परिइस्यु घिस्यु सहौ तअसिऊ, तब साम्बाअल टुङ बै रंनौ तअसिऊ। 27 "नका साहूल आनोक्करयाङ रा:स्यु ओलजन ऐराढोव, ‘औ सायब, नैति नङ नखेएल चान्या धूर नवाइनु माङडी का?’ नल साम्बाअ काङन रांऔ?" 28 नका झिमला साहूले नकाङजन ऐआढोवाङ, "काङ्का शत्तुरले नैआजाटौ। नोक्करयाङै ओलजन ऐराढोव, ‘गे हिनस्यु नका साम्बाअयाङ’ भोअया?" 29 "तर नकाले आढोवाङ, ‘नै तालेच्यो, मानकन्ता जे साम्बाअ जेभोकौक पलीमा समेत ऐभोअच्यो।’ 30 अन दुकौ बेला समन नेंलोअझन्जै तचोएकै घिऊ योंचिते। अन दुकौ बेला खानन्याङजन ङा ऐलेस्यु थाकङरा, ‘हादेए साम्बाअ भोअस्यु मील हिपौ नाल्ट मुठा पोअचिते, तर पलीमाजन ङा धन्सारल नाएचिते’।"