1 Ber nuŋ yiŋɛ Biturus ben Yɔɔna a tsǝne kɔmɔ ne akabaŋkɔŋ ne mkpaŋ kɛ ben Arik, ne mkpaŋ tar kɛ aririk. 2 Fe Neshir nuŋ ndi ne ŋliu aglugluk ndi ane ben abaŋu anyɛ aŋyak ne anɔkɔŋ akǝŋ ndi azho kɛ te rɛ ŋgɔŋ, anyɛ nyagu te bɛ aben ne aŋɔk abɛ yir miŋ akaba. 3 Ndi ne yik ane Biturus ben Yɔɔna atei yir akabaŋkɔŋ, akɔ ben ba azɔb. 4 Biturus ben Yɔɔna a shuru ayi, Biturus adiu te di, <<Tɔ ta!>> 5 Fe susun kɛ neshire kam kɔmɔ ben abɛba, ayik tedi atei nek wa ikinuŋ.

6 Fe Biturus a diu tedi, <<Bam yine izineriya ben azurfa ka, iki ndi m yime neyi ai yi m tei nǝgu. Nǝ sak kɛ Yesɔ Awɔnǝ Nazara, lu tsin.>> 7 Fe Biturus akɔ vuŋu ne ŋɔk kɛ li maa, te alǝgu aŋyak adidik, Ne amkpamkpama aza maa ben ayi mbwak amaa akɔ klik. 8 Akɔ atuk alu aklɛ adidik te kɔ tsǝn. Fe akɔ zǝ ba akɔmɔ te yir miŋ akabaŋkɔŋ ŋɔ, atsin te atuk adɔ te agbar Arik asak. 9 Aneshir bɔbɔk ne yigu atsǝne tsǝn te zen gbar Arik asak, 10 Ne tɔu azhi ndi ner waŋ ndi ane ben asɔŋ ne anɔkɔŋ goŋ ake akabaŋkɔŋ te zen ben ne anɔkɔŋ akabaŋkɔŋ ndi azho kɛ te rɛ ŋgɔŋ, fe iki me ku shak ba susun ben vuŋ anu ndi iki yiŋɛ nena ma.

11 Ndi ner ne bene avuŋ ane Biturus ben Yɔɔna agli, aneshire ne shur klu te nyɛ bǝn a bɛba ne amkpa ndi azhɔu te Mme didik iyi Solɔmɔn te zen vuŋ anu. 12 Ndi Biturus ne yik amɛ, akɔ adi ba: <<Izhin aner abɛ Isrela, aye anii duŋ zhin vuŋ anu ne ki yiŋɛi? Izhin shur ta ayi aye nii ndi ayi mgbyamgbyaŋ mɔr kɔ tsetser mɔr kɛ ne duŋ iner waŋa alu atsǝn? 13 Arik ayou Ibrai, ben Ishaku, ben Yakubu, Arik ayou atsintsim amɔr, wa ne lɛk ivǝn maa Yesɔ. Izhin ne kamu nek te bɛ aŋunu, te na kyagu ne yi ayi Bilatus, ndi ne nyak susun kɛ zhaku. 14 Izhineba ne kyak iner ne yi tsetser, iwaŋ ndi ayi iner didik te ben te di abɛ zhɔk zhin ner ne na zumimin nnɛ ŋlɔk aneshir. 15 Izhin ne ŋun waŋ ndi anǝk vli, amaa Arik ne lǝgu ne bɛ i. Taba ne yik te tanyɛme ne me. 16 Nǝ itanyɛme ne sak kɛ Yesɔ, iner waŋa ndi izhin yigu izhin ne na zhiu ne ta mgbyamgbyaŋ ma. Ayi isak kɛ Yesɔ ben tanyɛme ndi ne ru rɛ ben abɔu ndi ne duŋ ner waŋa ne rɛ, ndi zhin yik.

17 <<Azizaŋ, amunzumɔr, mǝne nzhi ayi yaŋ zhi yi ne duŋ zhin ne na me, ndi angɔŋgɔŋ amin ne na ma. 18 Fe waŋ ayi ki ndi Arik ne duŋ lɛ kɛ bla ma bǝ shaga ndi ne bla kɛ ne anu kɛ abɛ shar ama bɔbɔk, tedi kristi atai yik yaa. 19 Amɛ duŋ zhin kiki mimin, te kam nyak zhin ben Arik, te duŋu abɛ yis kiki mimin min agli adɛ me, Arik ne tu ma atai nek zhin isik susun, 20 A tei shar zhin nnɛ zuk ta shur,waŋ ndi ne aŋyak zhin newu. 21 Yesɔ iwaŋ ndi ayi ne shu gar yir mkpaŋ ndi Arik atei kam kiki aŋyaga, ir keŋ ndi ane di wa atei na ben abɛ na ndum ama abɛ yi tsetser nak rǝ asese. 22 Musa ne di, <<Arik ami ŋgɔŋ atei lɛk zhin ne bla shar ndi nga; izhin tei nak shir atɔŋ te wɔ kɔ ate ni ndi atei bla zhin. 23 Iwaŋ ndi bate wɔu ba atei tunu agli adɛ me ne min kɛ aneshir ama.

24 Anenen, bɔbɔk baŋ rǝ ben ne bla lɛ kɛ Arik Samula, te kam kɔmɔ ben abaŋ ndi ne lɛ, ne nak alɛ ne atu ayi ibɛr yiŋɛ. 25 Fe izhin aba ayi alǝla abɛ bla ishar ben abaŋ ndi Arik ne she atetɛ men ben atsintsim amin arim, ane di Ibrai tedi, <M tei nek aneshir abɛ goŋ mimi anu adidik ne tɔ yi nga mi.> 26 Ndi Arik ne lɛk vǝn ma, ne men asharu ben abɛ zhin te abɛ nek zhin anu adidik te kɔte ŋɔwa abɛ duŋ na zumimin ma.>>