1 Yesɔ ne lɛ bǝn abɛ na ndum amaa ne nkan lelɛ: <<Iner nuŋ ne shi nkunkun inebi ne ahwaŋ amaa. Te kam ahwaŋa azik ne adampem, ane ka dudu kɛ yi ama nkunkun inebi me. Ankyak ne baŋ ahwaŋa asak aner anuŋ abe blɛ ne aŋɔk te gar tsǝn. 2 Ndi mkpaŋ kɛ kye idɔ inebi ne te ne shar izhin ne miŋ kɛ agen amaa bǝn abɛ na ndum ne ahwaŋa te abɛ te ta wa idɔ inebi nuŋ ben abɛba. 3 Ama abɛ na ndum ne ahwaŋa ne vuŋu, te tsǝgu te yaru te duŋu akama kɔmɔ aŋɔk akluklu. 4 Fe ne na shar igen nuŋ ben abɛba; abɛ na ndum ne ahwaŋa ne vuŋu te tsǝgu ne tu te sagu iyah te duŋu akama kɔmɔ ne shisha. 5 Nǝ na shar igen nuŋ, abɛ na ndumo atsǝgu aŋun. Nǝ shar agɛn tetɛk; ne tsik anuŋ te aŋlɔk anuŋ.

6 <<Ayi ne zhin ndi ne dǝk, iwaŋ ndi ayi zu maa ankyak, ndi a nyeru. Nǝ shar ine klɛ ŋɔk, te di, <atei nugu ŋgɔŋ tei ayi izu muŋ.>

7 <<Ama abɛ na ndum ne ahwaŋa adi akpa amen, <<Waŋa ayi ne li gadu maa. Nyɛ zhin, te tabǝ ŋunu, te gadu mɔ bǝ yi mɔr.> 8 Ankyak avuŋu te tsegu aŋun, te baŋu tyak azhɔk ne goŋ ahwaŋa.

9 <<Akiki ne ahwaŋa atei na anii? Iner ne ahwaŋa atei nyɛ te tsik abɛ na ndum ne ahwaŋa a ŋlɔk te baŋ ahwaŋa anǝk anuŋ. 10 Ba zhin tɔ cɛr yiŋɛ ka:

<<<Mkpaŋ yiŋ ndi abɛ me ne kyagǝ

Iyi ne nyage ne nju ki;

Arik wa nena iki yiŋɛ,

Waŋa ai ki sak ŋɔk ne anu ne ayi mɔr>?>>

11 Arik wa nena iki yiŋɛ,

Waŋa ai ki sak ŋɔk ne anu ne ayi mɔr>?>>

12 Fe awɔb ankɔŋ ne vuŋu Yesɔ te zhi ne lɛ nkan lelɛ yiŋɛ ne atu men. Ama ne te sisik ntsan aneshir; ankyak akama tibɛ te duŋu te kɔmɔ.

13 Ndi ne kɔmɔ ne te shar anuŋ abɛ Ferisawa ben aneshir abɛ Hiridus te bɛ kɔte ten Yesɔ ne lɛ maa. 14 Nǝ nyɛ bǝn abɔu te di, <<Ine Tsar, ta ne zhi te uyi ner waŋ ndi anugu ngɔŋ. Bau tanyɛmɛ bǝn nuŋ te kyak nuŋ ba, bau nek tu mi bǝn anuŋ ba; ama utsar ne ankɔŋ ayou Arik ne ankɔŋ adidik. Ire te abɛ nek Kaisar gendu ka ta bǝ yaa kaisar ka tabǝ duŋ ini? 15 Tabǝ yaa ka tabǝ duŋ ini?>>

Ama Yesɔ ne zhi kamgli mǝne. Arib ba te di, <<Aye nii te izhin wɔb ten me?>> <<Glime zhin azɔbɔ tem tɔ kɛ.>> 16 Nǝ gliu izɔb zinariya, ankyak arib ba te di, <<Igɔŋ izɔb zinariya kǝŋe ne cɛr sak kɛ ŋɔwai? Ai izhu iŋɔwa ne sage ne miŋe?>>

Adi, <<iyi kɛ Kaisar.>>

17 Ankyak Yesɔ adi, <<Nǝk zhin kaisar iki yiŋ ndi iyi maa tena nek zhin Arik iki yiŋ ndi iyi Arik.>>

Ankyak asak aŋɔk ne anu ne atu yi Yesɔ.

18 Fe Sadukiyawa, abaŋ ndi adi ilu ne bɛ ba yime ba, anyɛ ben Yesɔ ne rib bu. 19 Te di, <<Ine Tsar>>, Musa ne cɛr ta te di waŋ ndi izumen te ku te duŋ iwa maa ama ba ne yi ne amumun ba, izumen abɛ ta iwama kɔ atei duŋu aŋli zumen amumun. 20 Neme amunwa nuŋ amɛ ataŋgba. Nǝ kuti ne tawa ma te ku ba ne yi ne amumun ba. 21 Fe ne zeu ma ne ta iwa maa, te na ku, yaŋ ŋli amumun. Ina yi amɛ ben ne ntar ma. 22 Le didik, Itaŋgba mǝne ba nuŋ ne yi ne amumun ba. Nǝ klɛtu, iwama ne ku mayi. 23 Ndi te lu ne bɛ iwama atei yi ayou ŋɔwai, te Itaŋgba mǝne ne tau?>>

24 Yesɔ adi ba, <<Ba zhin ne dur ka izhin ne zhi ilɛ kǝ Arik bǝn mgbyamgbyaŋ mai? 25 Abɛ kuti te lu ne bɛ, ba atei ta amba ba, ba tei na duŋ amba aŋa ba; atei yi ndi abɛ shar ayou Arik ne Gbarshu. 26 Fe ne atu ayi abɛ lu ne bɛ, ba zhin ne tɔ cɛr yi Musa ka, ne miŋ zizik, ndi Arik ne diu, <Myi Arik ayou Ibrai, Arik ayou Ishaku, ben Arik ayou Yakubu>? 27 Ba yi Arik abɛ ku ba, ama ayi Arik abɛ vli. Izhin ne dur ngɔŋ!>>

28 Inuŋ ne tsar icɛr yi Musa ne nyɛ te wɔ ba zen nga aŋa. Te wɔ Yesɔ ne nek ba lɛ anenen, te rib Yesɔ te di, <<Nǝ lǝlɛ yiŋɛ bɔbɔk, itakɛ iyi ngɔŋɔi?>>

29 Yesɔ adiu, <<Ilɛ didik ngɔŋɔ,>> <<kǝkɛŋ,>> <Wɔ zhin, aner abɛ Isrela, Arik amɔr Ngɔŋ, Arik ayi zhin. 30 Nyer Arik ami ne susun mi bɔbɔk bǝn ikpa mi bǝn izhi mi bǝn mgbyamgbyaŋ mi bɔbɔk.> 31 Iyi yaa iyi yiŋɛ, <Nyer ikpami ndi tu mi.> Ilɛ ngɔŋ kǝ kpa nyak nuŋ ba naŋ kǝŋe ba.>>

32 <<Une bla anenen, ne tsar,>> ine tsar cɛr yi Musa adi Yesɔ. <<Ubla izub ndi udi Arik ayi zhiin inuŋ ba ayime ba anaga yi wa kiki maa. 33 Ubɛ nyer Arik ne susun mi bɔbɔk, bǝn izhi mi bǝn iklik mi, te na nyer ikpa mi ndi itu mi ire naŋ ubɛ na ikiki yiŋɛ inaŋ ndi ubɛ tsik Arik ibaŋ yi narum goŋ ben yi yak.>>

34 Ndi Yesɔ ayigu ne lɛ ne Mgbemgbeb, adiu, <<Bau yi shaan ne kɔb Arik ba.>> Vuŋ rɛ mkpaŋ yuŋɔ ba nuŋ ne na rib Yesɔ ilɛ nuŋ ba.

35 Ndi Yesɔ ne zen tsar ne miŋ Akabakɔŋ, ne rib bu te di, <<Tǝ ayi anii duŋ ne tsar cɛr yi Musa adi Kristi ayi izu Doda? 36 Doda wa tu maa, Izhu tsetser ne duŋ lɛ, te di:

<<<Arik ne di Arik amuŋ:

<<Zisɔŋ ne ŋɔk li muŋ

M tei duŋ abɛ te zɔr ben abɔu

Asɔŋ ne aza mi.>> >

37 Doda wa ne tu maa ne zhɔu te <Ŋgɔŋ.> Tǝ wa atei na kikin teyi zu maa?>>

Ntsan aneshir ne wɔu te nyɛr.

38 Nǝ tsar maa, Yesɔ ne di, <<Izhin bǝ te ze bǝn abɛ tsar icɛr yi Musa. Atsǝn ne nklunklu gɔngɔŋ te wɔb te aneshir abɛ tek ba ne dub, 39 te na wɔb sɔŋ ne mben didik ne akabakɔŋ bǝn amkpa ane na igyaŋ. 40 A vu iki ambakɔ ne akɔb amen te na baŋ mkpaŋ tetɛk te ben Arik. atei sak aner abaŋa iya ngɔŋ.>>

41 Yesɔ ne zǝ sɔŋ ne kɔnsa gbahir ne mgbɔ iyi shur azɔb te zen tɔ aneshir azen shur azɔb ne mgbo ne akabakɔŋ. Aneshir abɛ yi ne adudunki anǝk azɔb tetɛk. 42 Ankyak iwakɔ ne te iyah ne anyɛ nek anini ayaa, mgbalak azɔb zhiin.

43 Yesɔ ne zhɔ abɛ tsene maa, te di ba, <<mbla zhin lɛ didik, iwakɔ waŋa ne shur azɔb ne mgbo ne nek tetɛk anaŋ nki aneshire. 44 Aba ne nek ne miŋ kɛ adudunki amen; ama iwakɔ waŋa, ne iyah maa ne nek iki yiŋ ndi ayime neyi bɔbɔk ne sɔŋ maa kɛ gɔŋmimi.>>