1 Ndi igyaŋ yi tuk glak bǝn igyaŋ yi borodi kɛ yaŋ saŋ ne dǝk bɛr yaa, ngɔŋ ne abɛ na ndum kǝ Arik bǝn abɛ tsar cɛr lɛ kɛ Musa ne zen wɔb ankɔŋ ndi aba atei vuŋ Yesɔ te aŋunu. 2 Fe adi, <<Bata te na amɛ ne mkpaŋ kɛ igyaŋa ba,>> <<Kǝr aneshir abɛ lɛk mgbu ba.>>

3 Ndi Yesɔ ne yine Batani, te asɔŋ ali kili ne tu tebur ne kɔb kɛ ner ndi azhɔu te Siman ndi ne yi amkpuk te zen li ikili, iwa nuŋ ne gli anye ane anyaŋ ndi azhɔu te albasta ane yegbo didik te anyɛ, ane nau ne inardi kɛ tsetser. Ne bu anyɛ me te bwau ashur Yesɔ ne tu.

4 Aner anuŋ ndi ne yine amkpama akɔ baŋ afuk tedi <<Ayi anii yi cɔk anye ne mgbɔ shushum awaŋa lai? 5 Abɛ zhi te baŋ anye awaŋa alɛb ne azɔb ayi mla ya ihwa kɛ se zhiin te nek abɛ iyah azɔbɔ.>> Fe akɔ vǝu ŋgɔŋ.

6 Yesɔ adi ba <<Duŋ zhin newu>> Susun min cɔkla te nii? Ne naam iki didik. 7 Izhin yi ndɔ ben abɛ iyah kɔte mkpaŋ takɛ, izhin ibǝ dik nǝk ba kɔte mkpaŋ takɛ. atei nga ba zhin te yi ndɔ ben abɛm kɔte mkpaŋ takɛ ba. 8 Ne na iki ndi mgbyamgbyaŋ maa ne nǝgu. Ne abaŋ anye ane mgbo shushum anuk me ne kpa te abɛ na kpa muŋ aŋyak agar bɛr iyi rum. 9 Mbla zhin izub, Ne amkpa awaŋ ndi ate bla ilɛ didik kǝŋe ne gɔnmimi, atei bla ki yiŋ ndi iwa waŋa ne anai, iki yi shuzhi.

10 Fe Yahuda Iskariyɔti, izhin ne miŋ kɛ awur ane yaa ma, akɔ lu agar ben ngɔŋ ne abɛ na ndum kǝ Arik te wa abɛ baŋ Yesɔ alɛb ba. 11 Ikime ne nek ba nyer ne miŋ asusun amen tetɛk te akɔ kpa anyak te di aba atei nǝgu azɔb. Fe Yahuda azǝn wɔb alɛla ndi wa atei vuŋu anǝk ba.

12 Nǝ bɛr yi kuti yi igyaŋ yi borodi kɛ yaŋ saŋ, ndi mkpaŋ kɛ tsik baŋ ne nklu ne yak ne te, abɛ tsene maa aribu tedi <<Udi te tabǝ gar nau amkpa ane li kili yi igyaŋ yi tuk glak neme?>>

13 Fe akɔ shar abɛ tsene maa ayaa, adi ba tedi, <<Tsǝn te yir zhin miŋ ntuno, izhin tei yik ner nuŋ ndi ahru mkpalɛn amashir. Zǝ zhin ne wu. 14 Ndi iner ne kɔbɔ ate yir, <Ine Tsar arib: iki kɛ ta cen imuŋɔ iyi neme, keŋ ndi M tei li igyaŋ yi tuk glak bǝn abɛ zǝm tsen?> 15 atei tsar zhin iki adǝdak ngɔŋ, keŋ ndi neka nakǝ anyak. kɔte na zhin ta ikili yi tuk glak amɔ,>>

16 Abɛ tsene maa akɔ kɔmɔ, te gar ayir ntuno te yik ikiki me anenen ndi Yesɔ ne naga abla bama. Fe akɔ gar ana ikili aŋyak yi li ne igyaŋ yi tuk glak.

17 Ndi amgbalu ne te, Yesɔ ben abɛ zeu tsin awur ane yaa ne nyɛ. 18 Ndi Yesɔ asɔŋ azǝn li kili ne tu tebur, adi ba tedi, <<Mbla zhin izub, izhiin ne miŋ min atei baŋ me alɛb, waŋ ndi asɔŋ ali ne agbǝgba azhin ben abɛm.>>

19 Asusun amene ne cɔkla, fe akɔ rib Yesɔ ne akpa amen azhi zhiin te di, <<Ayi ngai?>> 20 Yesɔ adi, <<Ayi zhiin ne miŋ kɛ awur ane yaa ma,>> <<Iwaŋ ndi asɔŋ afa borodi ne miŋ agbǝgba azhin ben abɛm. 21 Izu Neshir atei kɔmɔ ir keŋ ndi ne men acɛr ne atu maa. Zhin zhɔk tu mi ner waŋ ndi atei baŋ Izu Neshir alɛb! Ibǝ rɛ ndi bane aŋliu ba.>>

22 Ndi azǝn li kili Yesɔ akɔ baŋ Borodi, te akɔ nyer te amun kɛ, te nek abɛ zeu tsǝn, te di, <<Ta zhin; waŋa ayi kpa muŋ.>>

23 Fe akɔ na baŋ kpar antse me, te nyɛr te nab kɛ anǝk ba, akɔ ta kɛ so bɔbɔk mǝne.

24 Yesɔ adi ba Waŋa ayi azhizhi amuŋ ane kpa nyak, awaŋ ndi ne bwau ashur ne atu aneshir tetɛk,>> 25 <<Mbla zhin izub, Bam tei na nsɔ ama dɔ nkunkun iyiŋɛ ba ikam gar bɛr yiŋ ndi M tei sɔi yayas ne kɔb Arik.>>

26 Ndi ne duk asem aklɛ, akɔ ru akɔmɔ ne Gbu Zetun.

27 Yesɔ adi ba, <<Bɔbɔk mine izhin tei klu ŋar,>> <<Ne cɛr tedi:

<<<M tei ŋun ine kyu,

Awanta maa atei klu aŋar.>

28 Ndi mte lu ne beh, M tei nkuti min te yir Galili.>>

29 Biturus adiu, <<kɔ nkime ate klu aŋar bɔbɔk, Nga bam tei nduŋu ba.>>

30 <<Mbla zhin izub,>> Yesɔ adi, <<Aliŋ mdi ne buu yiŋɛ utei tun zhim amkpaŋ atar te agbak abɛ shi atuk amkpaŋ ayaa.>>

31 Fena Biturus atsekli te di, <<kɔte yi ndi M tei nku ndɔ ben abɔu, bam ntei kyagu ba.>> Bɔbɔk mǝne anaga na bla nkan zhin yiŋɛ

32 Ne kɔmɔ ne amkpa awaŋ ndi azhɔu te Getsemani, fe Yesɔ adi abɛ tsene maa, <<Zisɔŋ zhin yaŋa tem gar ben Arik.>> 33 Ne vu ane Biturus, Yakubu bǝn Yɔɔna ndɔ bǝn abɔu, fe susun maa ne lɛnu tena cɔkla tetɛk.>> 34 Adi ba. <<Susun muŋ ne cɔkla tetɛk gar yir ankɔŋ ane ku, sɔŋ zhin yaŋa te shur zhin ayi.>>

35 Ate naga atib akɔmɔ akɔ zhaku ne mimi te ben Arik te di ibǝ rɛ ndi mkpaŋ kǝŋe bǝ gar kam wa. 36 adi, <<Abba, Tetɛɛ,>> <<Une zhi na kɔte nii. Baŋ kpar antse kǝŋe igli tibma. Ba yi ina muŋ ba, duŋǝ bɛ yi na mi.>>

37 Ate kam anyɛ bǝn abɛ tsene maa anyɛ yik ba akɔ kurna. <<Siman,>> adi Biturus, <<Izhin nak kukur nai? Ba zhin tak zhi sɔŋ tsitsir yir mkpaŋ zhin kai? 38 Shur zhin ayi te ben zhin Arik ndi ba zhin tei zhaku ne iten mimin ba. Min susun ne tanyɛmɛ, ikpa maa kɛ kyak.>>

39 Yesɔ ana kama kɔmɔ te agar ben Arik ir yuŋɔ. 40 Ate kama nyɛ, anyɛ yik ba azǝn kurna, te ina ne shak ba kpa. Bane zhi diu ikinuŋ ba.

41 Ate kama nyak mkpaŋ kɛ ntar, adi ba, <<Izhin rǝ kukur na bǝn kur sik? Nǝ mla amɛ! Mkpaŋa ne ka nyɛ. Tɔ zhin, ne baŋ Izu Neshir asak ne aŋɔk aner amimin. 42 Lu zhin! Te tabǝ kɔmɔ!>> Tɔ ne baŋ me lɛbɛ waŋ!>>

43 Ayi ne miŋ kɛ zen lɛ, Yahuda, izhiin ne min kɛ awur ane yaa ma, akɔ nyɛ. Ntsan aneshir ne yi bǝn abɔu ne hru nzinzigba bǝn amkpogoki, abaŋ ndi ngɔŋ ne abɛ na ndum kǝ Arik, abɛ tsar Atɔra ben Anunkub ne shar ba.

44 Waŋ ndi atei baŋu alɛbɛ ne ka men bla ba ir keŋ ndi atei vuŋu: <<Iwaŋ ndi M tei vuŋu nku asa amuŋ ayi wa; vuŋ zhi ne wu te Gli zhi ne wu te tabǝ tsǝn ndɔ ben abɛ blɛ.>> 45 Ate nak anyɛ gbur akli ne ti kɛ Yesɔ, Yahuda akɔ diu, <<Ine Tsar!>> Te akɔ vuŋu aku ne asa maa. 46 Aneshire akɔ kum Yesɔ avuŋ te akpau. 47 Ner nuŋ ndi aklɛkli anyaŋ ba akɔ tun anzigba amaa te atsɔm tɔŋ kɛ igen ngɔŋ ne abɛ na ndum ne akaba, akyaŋ.

48 Yesɔ adi, <<Nga myi ngɔŋ ayou aner amimin ndi izhin hru nzinzigba ben amkpogoki te izhin bǝ nyɛ vuŋ mei? 49 Nga mne yi ndɔ bǝn abɛ zhin kɔte bɛr tayi, te zen tsar ne Akabakɔŋ, izhin ne kyak vuŋ me ma. Tǝ ilɛ Arik bǝ shaga.>> 50 kɔte ŋɔwa aklu te duŋu.

51 Ivǝnenzak nuŋ, ndi ne su anklu akɛ min ankyak, ne zǝ Yesɔ. Ndi ne komo avuŋ, 52 ne klu yaŋ anklu, te duŋ anklu amaa.

53 Ne baŋ Yesɔ te kɔmɔ bǝn ngɔŋ ne na ndum kǝ Arik, ne amkpa awaŋ ndi angɔngɔŋ abɛ na ndum Arik, anunkub ben abɛ tsar Atɔra ne nyɛ biŋ atu. 54 Biturus ne zeu shashan, te aklɛkli ne anɔkɔŋ amkpa ane te ambuk ayou ngɔŋ ne abɛ na ndum kǝ Arik. Tǝ azǝ asɔŋ amɔ ndɔ ben abɛ blɛ te sɔŋ azǝn vli lu.

55 Angɔngɔŋ abɛ na ndum Arik bǝn bɔbɔk abɛ amkpa ne te ambuk awɔb nkan lɛ yiŋ ndi aba atei vuŋǝ agli ne tu ayi Yesɔ te aba bǝ aŋunu, bane yik nkan nuŋ ba. 56 Aner tetɛk ne timu asagu, lǝlɛ mǝne nak tsǝn kaŋkaŋ.

57 Fe anuŋ akɔ lu aklɛ te timu yiŋɛ asagu: 58 <<Tane wɔu udi, <M tei ntsǝk akabakɔŋ ane me ne aŋɔk awaŋa ŋar te me anuŋ ne min kɛ bɛr tar, awaŋ ndi aba ne meu ne aŋɔk ba.>>> 59 kɔte amɛ ma lǝlɛ mǝne itsin kaŋkaŋ.

60 Fe ngɔŋ ne abɛ na ndum kǝ Arik alu aklɛ ne min mǝne te rib Yesɔ, <<Bau bu anu te lɛ ka? Anii aner abaŋa azǝn blai ne atu ami?>> 61 Fe Yesɔ aku anu te akyak ilɛmɛ.

Ngɔŋ ne abɛ na ndum kǝ Arik ana ribbu, <<Iwa uyi Kristi mei, Izu Arik ne ta anu adidik yi?>>

62 Yesɔ adi, <<Ayi nga. Izhin tei yik Izu Neshir akɔsɔŋ ne ŋɔk li kɛ Ngɔŋ te anyɛ ne mgbyamgbyaŋ ne akpa ayi gbarshu.>>

63 Ngɔŋ ne abɛ na ndum kǝ Arik akɔ gbu anklu maa aŋa. Arib ba. <<Ta na wɔb ilɛ takɛ?>> 64 <<Izhin nak wɔb cɔk sak kɛ Arik la. Izhin yik kikin?>>

Bɔbɔk mǝne adiu ne mla ne ŋuu. 65 Anuŋ akɔ ruk ante ashuru; te ku amacincii, te shuru ante, te mligu tsik tedi <<Bla ta iki yi ti!>> Fe abɛ blɛ agbaŋu te tsǝgu.

66 Ndi Biturus akɔ sɔŋ ne shin kɛ amkpa ne te ambuk, iVen wa nuŋ ndi are bǝn ngɔŋ ine na ndum kǝ Arik anyɛ agbur aklɛ. 67 Ate yik Biturus azǝn sɔŋ vli lu, akɔ shuru ayi par.

Adiu, Uwa ma uyi ndɔ ben awɔnǝ Nazara, Yesɔ.>>

68 Biturus akɔ tun zhiu ma tedi <<Bam ne zhi iki yi bla mi yiŋɛ ba,>> te akɔ ru agar anɔkɔŋ. Ankyak agbak atuk.

69 Ndi iven wa ma te kam ayigu amɔ, akɔ bla abɛ klikli ne amkpama, <<Ner waŋa ayi zhiin ne miŋ mǝne.>> 70 Biturus atara na tun.

Ndi mkpaŋ gayir watsɔb, abɛ klikli ne amkpama adi Biturus, <<Lɛ didik unak yi zhiin ne miŋ mǝne, te uyi awɔ ne Galili.>>

71 Biturus akɔ gbar tu maa Arik, te ashe arim ashur ba, <<Bam ne zhi ner waŋ ndi zhin kɛ lǝlɛ ma ba.>>

72 Ankyak agbak akɔ atuk mkpaŋ kɛ yaa. Fe Biturus akɔ shu azhi nkan lɛ ndi Yesɔ ne men ablau: <<Utei tun zhim amkpaŋ atar te agbak abɛ tuk amkpaŋ ayaa>> Fe ikpa kɛ Biturus iku sik te akɔ te zhin.