Mateus 2

Acɛn abɛ rɛ ti kɛ anzaŋ

1 Mkpaŋ keŋ ndi ne ŋli Yesɔ ne Batalami ne Yahudiya, ne mkpaŋ kɛ itum Hiridus, Fe anuŋ abɛ zhi cinces nɛrɛ ti kɛ anzaŋ te nyɛ Urshelima 2 te rib, <<Waŋ ndi ne ŋliu itum ane Yahudawa ma, ayi neme? Taniyik ncinces maa tedi duŋ ta nyɛ tɔ te zekuru.>>

3 Ndi itum Hiridus ne wɔ ilɛmɛ susun maa cɔkla, te ben aner abɛ Urshelima 4 Ankyak, akɔ zhɔ ngɔŋ ne abɛ na ndum kǝ Arik ben abɛ tsar lɛ kɛ Arik te rib ba amkpawaŋ ndi ne ŋli Mezaya ma. 5 Ablau, <<Nǝ Batalami ntun ye Yahudiya,>> <<te waŋai ki yiŋ ndi abɛ bla shar yi Arik ne cɛr:

6 <<<Fe iwa, Batalami, ne gar kɛ Yahudiya,

Bai waa yi ambusher ne miŋ abɛ gli ntun yi Yahudiya ba;

Nǝ miŋ min itum atei nyɛ

Ai waŋ ndi atei kyu aner amuŋ Isrela.>>>

7 Ankyak Hiridus akɔ zhɔ aner abɛ zhi ncinces raŋ te wa bɛ wɔ ben aba anenen mkpaŋ keŋ ndi ncinces ne mun ruu. 8 Akɔ shar ba ne Batalami tedi, <<Tsǝn zhin bwe te wɔb amkpawaŋ ndi vǝvǝne ayime. Izhin te yigu, kam nyɛ blam azhin, tem ka ngar zekuru muŋ yi.>>

9 Mkpaŋ keŋ ndi ne wɔ lɛ kɛ itum, akɔ vuŋ tsǝn men fe ncinces yiŋ ndi ne yigǝ ikuti akɔ zǝǝ ikɔ te gburkli ne amkpa waŋ ndi vǝvǝne ayime. 10 Ndi neyik ncincese, akɔ nyer ŋgɔŋ. 11 Ndi ne yir kɔbɔ, akɔte yik vǝvǝne bǝn Meryamu yaa maa, akɔ zekuru te gbaru asak. Akɔ bu abu te vu kiki yiŋ ndi ne gliu ma te nugu zineriya, turare bǝn mur. 12 Fe ine shar ayou Arik ne gbaŋ ba atɔŋ ne rimla tǝ bɛ duŋ aŋur akam ate yik Hiridus ba, akɔ ŋur akam azǝ ankɔŋ anuŋ te kɔmɔ ne ntun men.

Iklu kɔmɔ ne Masar

13 Mkpaŋ keŋ ndi abɛ zhi ncinces ne kɔmɔ, ine shar ayou Arik amuno ruu Yusuu ne rimla. <<Lu,>> adiu, baŋ asen Vǝvǝne ben yaa maa te klu kɔmɔ ne Masar. Sɔŋ amɔ se mkpaŋ ndi mne blau, Hiridus atei shik vǝvǝne ne wɔb ŋun.>> 14 Fe akɔ lu, te baŋ vǝvǝne ben yaa maa ne bu te kɔmɔ ne Masar, 15 ne sɔŋ amɔ te wɔ iku kɛ Hiridus. Fena nken ilɛmɛ ne shaga ilɛ keŋ ndi Arik ne bla nenu abɛ bla shar maa: <<Nǝ Masar mne zhɔ Izu muŋ.>>

16 Mkpaŋ keŋ ndi Hiridus ne zhi te abɛ zhi ncinces alɔmu ate kpuguruk, akɔ te mfu tetɛk te nek nkenlɛ tedi abe ŋlɔk asen amunlum ne Batalami bǝn ntun yi nyaŋǝ ase ayaa kam nyak goŋ ibaŋ rɛ ne mkpaŋ keŋ ndi neyik abɛ zǝ ncincese. 17 Fena ikiyiŋ ndi ine bla shar yi Arik ndi azhou te Irmiya ne blai ne shaga:

18 <<Ne wɔ ikɔr ne Rama,

Ŋarzhin yaŋ klɛ te nek lɛ,

Rahila azhin amumun amaa te kyak ta tek aneshir,

Tǝ amumune ba na yime ba.>>

Ŋurkam kɔmɔ ne Nazara

19 Ndi Hiridus ne ku, ine shar ayou Arik amuno aruu Yusuu ne rimla ne Masar 20 te di, <<Lu klɛ, baŋ vǝvǝne bǝn yaa maa te kɔmɔ ne gar Isrela, te abaŋ ndi ne wɔb ivli kǝ asen vǝvǝne neka ku.>>

21 Ankyak Yusuu akɔ lu, te abaŋ vǝvǝne bǝn yaa maa te kɔmɔ ne gar kǝ Isrela. 22 Ndi ne wɔ te Akiliyus wa sɔŋɔ gli itum kɛ Yahudiya ne gɔŋ ku Tetɛɛ amaa Hiridus, sisik vuŋu ne ŋur kama, ndi ne gbaŋu atɔŋ ne rimla, akɔ kama kɔmɔ ne gar kɛ Galili, 23 ne kama ate sɔŋ ne ntun yi zhɔ te Nazara. Nǝ shaga ndi ine bla shar yi Arik ne bla: <<atei zhɔu te Awɔnǝ Nazarin.>>