1 Ankyak ndi Yesɔ ne yik aneshir tetɛk, akɔ yuŋ agaŋkubgbu te zǝ sɔŋ. Abɛ tsene maa anyɛ bene bɔu, 2 Akɔ tsar ba te adi.

3 <<Abe ta anu didik iyi abaŋ ndi ayi abe iya ne izhu,

Ikɔb kǝ gbarshu yi men.

4 Abe ta anu didik ayi abaŋ ndi azhin,

Arik atei yis ba amayi,

5 Abe ta anu didik ayi baŋ ndi ne nek tu,

Gɔnmimi itei yi men.

6 Abe ta anu didik abaŋ ndi kasa ne vuŋ ba bǝn hrie kɛ na iki didik yiŋ ndi Arik ne tanyɛmɛ neyi,

Atei duŋ ba hri.

7 Abe ta anu didik, abaŋ ndi alɔ susun,

Atei lɔ susun mǝne.

8 Abe ta anu didik abaŋ ndi susun mǝne yi tsetser,

Atai yik Arik.

9 Abe ta anu didik abaŋ ndi awɔb sɔŋ didik,

Atei zhɔ ba te amuen Arik.

10 Abe ta anu didik abaŋ ndi asak ba iya ne tu ayi na iki didik yiŋ ndi Arik ne tanyɛmɛ neyi,

Ikɔb kǝ gbarshu iyi men.

11 <<Abe ta anu didik ayi zhineba ndi aneshir apwar zhin aŋyak, te sak zhin iyah tena timu asak zhin te bla zhin lǝlɛ mimin ne atu amuŋ. 12 Nyer zhin tena duŋ asusun amin amen, te idǝk min ngɔŋ iyi ne gbarshu, amɛ ane nek abɛ bla shar yi Arik ndi ane kuuzhin ti ne ndum kɛ Arik iya.

(Markus 9:50; Luka 14:34-35)

13 <<Izhineba yi mmaŋ yi gɔnmimi. Ama imen kɛ maŋa te naŋ dɔ, itei na men kikini? Ba na yine ki yi nama neyi ba, se abɛ tyage hrie ne mimi te caŋǝ ne za.

14 <<Izhin yi laŋ yi gɔnmimi. Ntun yi sɔŋ ne tu gbu, ba suyir ba. 15 Neme aneshir ba tei sak lu ne pitila te suu aŋyak ne sesa ba. Ama abaŋu akɔr asak ne tu amkpadeb te bɛ laŋ ashak miŋ kɔbɔ. 16 Amɛ duŋ aneshire abɛ yik laŋ min, ate yik ki didik yi na min atei gbar asak Arik Tetɛɛ Ngɔŋ ne gbarshu.

17 Fe Yesɔ adi, <<Duŋ yik zhin tem ne kam nyɛ zǝr icɛr yi Musa bǝn abɛ bla shar yi Arik; Bam ne nye tem zerǝ ba ama mduŋ kɛ shaga. 18 Mbla zhin lɛ didik, se gbarshu bǝn gɔnmimi ne naŋ dɔ, nkanlɛ zhin iyi icɛr yi Musa batai zhaku ne mimi ba, se ne ruu. 19 atei ndi neshir nuŋ ate lalɛ ivǝtsob ne nkan lɛ kǝ Arik mɛ te tsar anuŋ tǝ bɛ zǝ ankɔŋ azhin atei zhɔ ba te ambusher ne ikɔb kǝ gbarshu, ama waŋ ndi ate naa tena tsar nken lɛmɛ atei zhɔu ŋgɔŋ ne kɔb gbarshu. 20 Mbla zhin se na iki didik min ne kam yi Ferisawa bǝn abɛ tsar nkan lɛ, ba zhin tei yir ikɔb kǝ gbarshu ba.

21 <<Izhin ne wɔ ne bla aner abɛ kukub te di, <Duŋ ŋun neshir ba> waŋ ndi ate ŋun nuŋ atei teu ŋas.> 22 Ama mna bla zhin, waŋ ndi ate te mfu ben zumen atei teu ŋas. Waŋ ndi ate zhɔ izumen, te <Bau ne zhi Arik ba,> atei gliu te gar amkpa ne tɛ ambuk. Fe waŋ ndi ate di, <Uyi bliblik!> Ne te ne zhɔk ne kɔb lu.

23 <<Fena, ate yi ŋdi utei tuk Arik ŋgɔŋ amkpur ne amkpa ne tsik baŋ, teu shuzhi te izumin a gliu nǝ nɛ, 24 Duŋ tuk amkpur ami ne amkpa ne tsik baŋ te ŋurkam te na sɔŋ min baliŋ te kashe ŋurkam te tuk amkpuro.

25 <<Na lɛ min zhɔk andanda bǝn waŋ ndi une lau lɛ kǝr ilɛmɛ bǝ yir amkpa ane te ambuk ba. Nazhin nakǝ ne ankɔŋ, mba me ba atei baŋu asak anŋɔk ngɔŋ ne te ambuk ne akaba, iwa maayi atei baŋu asak abɛ kpaakpa te bɛ vuŋu azhɔk ne jaru. 26 Mbla zhin izub, bau tei ru ba se une ya mbyaŋ azɔb aye klɛ ŋɔk ayiŋ ndi ne ŋas ne di.

27 <<Izhin ne wɔ te ne di, <Duŋ ze amba ba.> 28 Ama mbla zhin te waŋ ndi ate lɛk ayi atɔ iwa te tǝ bubu te wɔb kur bǝn abou neka la lɛ kǝ ze amba ne susun maa. 29 Teyi ndi iyi kɛ ŋɔk li mi te duŋu la lɛ, kyaŋ kɛ tyak zhɔk. Itei rɛ te ŋa kpa mi bǝ yaŋa te mkpuŋ kpa mi bǝ yir Lu ŋgɔŋ. 30 Ankyak te yi ndi ŋɔk li mi tǝ duŋu La lɛ kyaŋ kǝ tyak zhɔk. Itei rɛ te ŋaa kpa mi bǝ yaŋa tǝ mkpuŋ kpa mi bǝ yir Lu ngɔŋ.

(Mata 19:9; Markus 10:11-12; Luka 16:18)

31 <<Ne bla tedi, <Iwaŋ ndi ate kyak wa maa abɛ nǝgu mplɛ cɛr kɛ kluk ŋa.> 32 Ngam shi di zhin iner waŋ ndi ate kyak wa maa mba ate ze lulum nuŋ akur ba, azhɔk iwa ma ne ,nkɔŋ ane ze alulum, fena waŋ di ate ta iwa ne yar ne lalɛ kǝ ze amba.

33 <<Fe, izhin ne wɔ ne di aner abɛ kukub, <Duŋ sherim ayi mu ba, amaa isherim mi bǝ ye anenen ne tanyɛmɛ bǝn Ŋgɔŋ.> 34 Fena mbla zhin, Duŋ di zhin sherim ba: kɔ ne gbarshu, iyi amkpa angɔŋ ane sɔŋ aye Arik; 35 kɔ ne gɔnmimi, iyi amkpa ne sak aza maa, ka yi Urshelima ayi ntun ŋgɔŋ yi Itum Ngɔŋ. 36 Fena duŋ sherim ne tu mi ba, te bau tei kam fumfuk tu mi te wa kɔ bǝ kam te shishir ba. 37 Duŋ e mi bɛ yi <e> te <ɔɔ> mi bɛ yi <ɔɔ>, ikinuŋ te kam amɛ, ire ben shetan.

(Luka 6:29,30)

38 Izhin ne wɔ ne di, <<Iyi bǝn iyi, fe ŋin bǝn ŋin.> 39 Ama ngam bla zhin, duŋ kyak zhin waŋ ndi ne laa zhin lɛ ba, nuŋ ate ŋuru ne nkɔnŋa kɛ li na kamu ikɛ ŋɔk mla. 40 Inuŋ ate gliu yir ki kɛ tǝ aneshir ambuk te abɛ ta anklu ami, duŋu abaŋ akɛ tu mi anyaŋa. 41 Inuŋ ate sagu tsǝn kɛ wamkpuk, zeu tsǝn lǝlɛ. 42 Nek waŋ ndi ate benu kinuŋ, kǝr duŋ kam goŋ nek waŋ ndi anyɛ wɔb hria bene bɔu ba.

(Luka 6:27-28, 32-36)

43 Izhin ne wɔ ne bla. Nyer kpami neyi gbahir te kyak ine te zɔr bǝn abou.> 44 Fe mbla zhin: Nyer ne ne zɔr bǝn abɔu tena ben abɛ nǝgu iya Arik, 45 te izhin tei yi amuno abɛ Tetɛɛ min ne gbarshu, waŋ ndi aduŋ Arik alaŋ abɛ na iki didik bǝn abɛ na zumimin, tena duŋ alu akuu abɛ na ki didik bǝn abɛ na zumimin. 46 Izhin tedi zhin nyer abɛ nyer zhin ankyak, aye nii izhin tei ta? kɔ abɛ ta gendu anamɛ menyi. 47 atei ndi izhin tek amunzumin ankyak, fe izhin nena nii naŋ anuŋ? kɔ abe yaŋ zhi Arik ba ana mee kai?. 48 Izhin bǝ klɛ gbamgbaŋ, fena, ndi Tetɛɛ min ne gbarshu ayi gbamgbaŋ. Arik ne shaga.