FAS SAMUEL 2

Ol rabis fasin blong tufala pikinini blong pris ya Ilae

12 Tufala pikinini blong pris* ya Ilae, tufala i pris, be tufala i stap mekem ol fasin we i no stret. Tufala i no tinghevi nating long Hae God, 13,14 mo tufala i no folemgud stret fasin blong kasem ol samting we i stret blong man i givim i go long pris. Oltaem, taem ol laen* blong Isrel* oli kam long Silo blong mekem sakrefaes, oli stap kukum haf mit blong sakrefaes we i blong olgeta, long wan bigfala sospen. Mo oltaem, tufala i stap sanem man blong wok blong tufala i go, i tekem wan bigfala fok, i pusum i go insaed long sospen ya. Nao taem hem i leftemap fok bakegen, ol mit we i stap hang long fok ya i blong tufala. Oltaem tufala ya i stap mekem fasin ya blong ravem olgeta we oli kam blong mekem sakrefaes. 15 Mo bakegen, taem man we i wantem mekem sakrefaes i no tekemaot ol gris blong mit yet blong bonem, tufala i stap sanem man blong wok ya i go talem long hem se, "!Yu givim sam mit ya long pris, blong hem i rusum! !Hem i no save kakae hemia we yu kukum."

16 Mo sipos man we i wantem mekem sakrefaes i talem se, "!Yu wet fastaem! Bambae yumi mekem long stret fasin blong hem. Yumi bonem gris blong hem fastaem, nao biaen, bambae yu save tekem olsem we yu wantem," be oltaem man ya i stap talem se, "!Ei! !Yu mas givim long mi naoia! !Sipos no, bambae mi nomo mi tekem!"

17 Ol rabis fasin ya blong tufala, hem i wan sin we i nogud we i nogud long fes blong Hae God, from we tufala i no save tinghevi nating long ol sakrefaes we ol man oli stap mekem long hem.