Provérbios 4

Ol gudgudfala samting we man we i holem waestok i save kasem

1 Pikinini blong mi. Mi mi papa blong yu, mo yu mas lesin gud long ol samting ya we mi stap tijim yu long hem. Sipos yu lesin gud olsem, bambae yu save gat waes. 2 Ol samting ya we mi stap talem long yu, oli gud tumas, mo yu no mas tanem baksaed long olgeta.*4.2: Tok ya i folem olfala translesen blong Oltesteman long lanwis blong ol man Gris bifo, we i kamaot long olfala Oltesteman long lanwis ya Hibru, be long Oltesteman long Hibru we i stap tede, tok ya i olsem. Ol pikinini blong mi. Mi mi papa blong yufala, mo yufala i mas lesin gud long ol samting ya we mi stap tijim yufala long hem. Sipos yufala i lesin gud olsem, bambae yufala i save gat waes. 2 Ol samting ya we mi stap talem long yufala, oli gud tumas, mo yufala i no mas tanem baksaed long olgeta. 3 Mi mi wan pikinini nomo we papa mo mama blong mi, tufala i bonem, mo taem mi mi smol, 4 papa blong mi i stap tijim mi. Hem i talem long mi se, "Pikinini blong mi, ol samting ya we mi stap talem long yu, bambae yu no mas fogetem olgeta samtaem, oltaem yu mas tingbaot olgeta. Sipos yu stap mekem ol samting ya oltaem, bambae yu gat laef. 5 Yu mas kasem waestok, mo yu mas kam we yu save luksave mining blong ol had samting. Yu no mas blokem sora blong yu, mo yu no mas fogetem ol samting ya, we mi stap talem long yu. 6 Sipos yu holem waestok ya, bambae hem i stap lukaot gud long yu. Sipos yu laekem hem, hem bambae i holem yu yu stap gud oltaem.