Hebreus 8

6 Ama ɓəhnihni; ɓəvyitnutnu n Yeisu wo la gwo nyi, kwo du əɓa nya lo ngye shi ɓəgbeshi n əwo nu zhni ɓəwnazhiyi nyi, kwo du kwokwoi nya lo, shikwonyi ɓəgbeshi woiwoyi n shi tu n aɓəgbeshi gnabmyai nu.

7 Ntuge nyaho to ɓə gna ge kwo wnuwnuiya lo n ɓəgbeshi kpmisnui m, a to ɓə ɓa shna zokwo ədo znashni a dna n dəye əɓwi m. 8 Ama Shekwoyi ɓə kwu aza leifyi gye wa gna,

"Anyipyei ɓe lo, Dagayi nu da lonu,

she mi ɓə shi ɓəgbeshi woiwoyi

n Israila azai

jesnu n Yahuda azai.

9 Kwo to ɓə wú ngye ɓəgbeshi nu

n mi ɓə shi əɓa azakwoyi nyi m,

əsa n mi ɓə n ɓai shiɓwa, ma gyiabye n ɓai ma kwnu ɓa ya ń Masar

ntuge ɓa to ɓə gwodu fyi n əmi ɓəgbeshi n gbenuii m,

jesnu maa pmyiya n əɓa aba.

Dagayi nu da nlonu.

10 Ɓəgbeshii nu nyi n mi ɓə shi kwo n Israila azai

n əsa dəyi avnu, Dagayi nu da nlonu.

Mi ɓə fyi əmi awa n əɓa aɓonubwozhni

jesnu mii kwu ɓa kafyi n əɓa adu.

Mi ɓə zhni əɓa Shekwoyi,

jesnu ɓa ɓə kwu zhni əmi aza.

11 Aza to ɓə je əɓa kwnuzhiyi nyawu m,

kwo əza woi wu əwodo, woi gna,

‘Kpe Dagayi əye m,’

ntuge əɓa vnyanya ɓə kpe əmi əye ye,

ənya n kwo ya n əza gnagbagbai vnyanya

kwoi lo əza yaakwo dudui.

12 Ntuge mi ɓə zo ɓa əɓa əkpízhni

jesnu mi to ɓə pá əɓa aleifyi ɓo n shnasnu m."

13 Shi a yi ɓəgbeshi ye, "woiwoyi," wo la kpmisnui nya zè gbəloi nuu; jesnu ənya n kwo zhni kwokwoi jesnu gbəloi; əsa fyewyi, kwo ɓa ɓwuwye.