João 21

Yeisu n abmyawna ɓəwowoi nyai

1 N dəye avnu Yeisu wa kpeya da əwo amwutuyi, n ma n Gəlili Shikwo. Kwo ɓə zhni nlai nu: 2 Sima Byitusu, Toma (n a je wo yi nge Didimwus nyi), Nataninya n wo gbmi n Kana n Gəlili nyi, Zebədi anugwnu jesnu n amwutuyi ajei ngwnu-aba n ɓa ɓə kwnusnu n ajei nyi. 3 Sima Byitusu wa gna ɓa, "Mi lo abmyawna nu," ɓa gna cè, "Yi ɓa kwnulo n hoi." Ntulonu ɓa kwnuya lo ɓa lofyi n əya nuwnanya, ama dna n sukwo yi, to ɓa wna nyaho m.

4 N labmilabmii, Yeisu waa gnyi n dnagbe, ama amwutuyi to ɓə kpəge Yeisu nu m.

5 Wa yì ɓa, "Anugwnudo, fye too wna əbmya ho m?"

Ɓa dnaɓəgbe, "Aawo."

6 Wa gna, "Fye she əsa fyi n əya nuwnanya ɓwaizhe ɓwa, fye ɓa wna adəho," Shi ɓa ɓə she əsa fyi, to ɓa myi n ɓa gnyi əsa m, ntuge abmya ɓə fyi n mwa bəgyé.

7 Nlonu mwutuyi n Yeisu ye wo nyi, wa gna Byitusu, "Dagayi nu gnyi!" Shi Sima Byitusu ɓə shni wowo woi gna, "Dagayi nu gnyi" wa pa əwo əje əkpma nya shegwnu əwohni (ntuge wo ɓəə la kwo kpmaya) jesnu wa gyeagna dna n nuwna. 8 Amwutuyi aje ɓa vyi lo n əyai, ɓai gnyì əsa n nunui n abmyai, ntuge ɓa to ɓə mwakpa n ədnagbei m, ngye amyita tagyi nu ɓəi. 9 Əsa n ɓa ɓə si əkpma, ɓa gye anakna əná əwye n zhi n abaayi, n əbmyai tu n kwo, ɓədo n biledii.

10 Yeisu wa gna ɓa, "Fye ɓe n abmya hoi n fye ye ɓwa wna nyi." 11 Nlonu Sima Byitusu wa jezelo dna n əya jesnu wa kwnu əsa ya kpe n əkpma. Kwo ɓə nunui n abmyai n mwa bəgyé, 153, ama, kwo n əɓa bəgyéi, to əsa kwa gbeya m.