João 4

Ema Ekọk Eyen Akwa Owo Utom Udọñọ

46 Jisọs ama ọtọñọ ntak aka Kenan ke Kalili, ebiet emi Enye akanamde mmọñ akabade wain. Ndien owo anam utom ukara kiet ama odu do emi eyen eren owo esie ọkọdọñọde ke Kapanọm. 47 Ke ini owo emi okokopde ete ke Jisọs ama oto Judia edisim Kalili, enye ama ebine Enye onyuñ ekebeñe Enye ete, yak Enye edika Kapanọm ọkọkọk eyen imọ emi ọkọdọñọde ekpere ndikpa.

48 Jisọs ama ọdọhọ enye ete, "Mbufo ndomokiet ikemeke ndinim ke akpanikọ tutu mbufo ekut mme ikpọ utom odudu ye mme ñkpọ ñkpaidem."

49 Owo emi ama ọbọrọ ete, "Ete tiene mi mbak eyen mi edikpa."

50 Jisọs ama ọbọrọ enye ete, "Afo emekeme ndinyọñ, eyen fo eyedu uwem." Owo emi ama onim ikọ Jisọs ke akpanikọ onyuñ ọnyọñ. 51 Kadaña ini emi Enye okosuk odude ke usuñ unyọñ, mme nditọ ufọk esie ema ekesobo enye ke usuñ ye eti etop emi, ete, "Eyen fo odu uwem." 52 Enye ama obup mmọ ini emi eyen esie ọkọtọñọde ndikop nsọñidem, ndien mmọ ema ebọrọ ete, ekedi ke ñkpọ nte ñkanika kiet uwemeyo ñkpọñ ke ufiopidem ọkọkpọñ enye. 53 Ete eyen emi ama eti ke ndo ndo oro nte ke ekedi kpa ke ukem ini oro ke Jisọs ọkọdọhọ imọ ete, "Eyen fo eyedu uwem." Ke ntak emi, enye ye ofuri ufọk esie ema enim ke akpanikọ.

54 Emi ekedi udiana utom odudu emi Jisọs akanamde ke Enye ama okoto Judia ọnyọñ edi Kalili.