1 Emi edi ñwed emana Jisọs Kraist, emi ekedide eyen Defid, emi okotode ke ubon Ebraham.

2 Ebraham ekedi Ete Aisik, Aisik onyuñ edi ete Jekọb. Jekọb onyuñ edi ete Juda ye nditọ ete esie.

3 Juda ekedi ete Peres ye Sera emi Tama akamande; Peres ekedi ete Esrọn; Esrọn ekedi ete Ram.

4 Ram ekedi ete Aminadab; Aminadab ekedi ete Nasọn; Nasọn ekedi ete Salmọn;

5 Salmọn ekedi ete Boas emi Rehab akamande; Boas ekedi ete Obed emi Rut akamande; Obed ekedi ete Jesi,

6 Jesi ekedi ete Edidem Defid. Defid ekedi ete Sọlọmọn emi eka esie ekedide ñwan ndọ Uria;

7 Sọlọmọn ekedi ete Rehobuam; Rehobuam ekedi ete Abiya; Abiya ekedi ete Asa;

8 Asa ekedi ete Jehosafat; Jehosafat ekedi ete Joram; Joram ekedi ete Usia;

9 Usia ekedi ete Jotam; Jotam ekedi ete Ahas; Ahas ekedi ete Esikaya;

10 Esikaya ekedi ete Manase; Manase ekedi ete Amọn; Amọn ekedi ete Josia;

11 Josia ekedi ete Jekonia ye nditọ ete esie, emi ekemanade ke ini emi eketañde mmọ eka ke Babilọn.

12 Ndien ke ema eketañ mmọ eka ke Babilọn; Jekonia ekedi ete Salatiel, Salatiel ekedi ete Serubabel;

13 Serubabel ekedi ete Abiud; Abiud ekedi ete Eliakim; Eliakim ekedi ete Asọ;

14 Asọ ekedi ete Sadọk; Sadọk ekedi ete Akim; Akim ekedi ete Elihud;

15 Elihud ekedi ete Eliesa; Eliesa ekedi ete Matan; Matan ekedi ete Jekọb;

16 Jekọb ekedi ete Josef, emi ekedide ebe Meri, eka Jisọs Kraist, emi ekotde Andinyaña.

17 Ntre kpukpru emana, ọtọñọde ke Ebraham osim Defid ekedi emana duopenañ. Onyuñ ọtoñọde ke Defid tutu osim ini emi eketañde mmọ eka ke Babilọn ekedi emana duopenañ, ndien duopenañ ñko ọtọñọde ke ini oro tutu osim ini emana Kraist.

18 Ndien emana Jisọs Kraist ekedi ntem: Ke ema ekemen Meri eka Esie enọ Josef ke ndọ, mbemiso mmọ enyene ebuana añwan ye ebe, ema eyarade efiọk ete ke enye oyomo idibi oto ke odudu Edisana Spirit. 19 Edi sia Josef ebe esie ekedide edinen owo, mikinyuñ iyomke ndisuene enye ke iso owo, enye ama ebiere ndisio enye ndọ ke ndibe.

20 Edi ke ini enye okosuk ekerede ñkpọ emi, sese, Enjel Jihofa ama ọbiọñọde enye ke iso ke ndap, onyuñ ọdọhọ enye, ete, "Josef, eyen Defid, kufehe ndik ndida Meri nte ñwan fo: koro idibi oro enye oyomode oto Edisana Spirit. 21 Ndien enye eyeman eyen eren, ndien afo eyenyuñ osio Enye enyiñ JISỌS, koro edi Enye edinyaña ikọt Esie isio ke mme idiọkñkpọ mmọ."

22 Ndien kpukpru mme ñkpọ emi eketibe man osu nte Jihofa akadade inua Asiak Uduak Esie etiñ, ete; 23 "Sese eyenọwọñ añwan eyeyomo, onyuñ aman, eyen eren, ndien eyenyuñ esio Enye enyiñ Imanuel," emi ọwọrọde ete, "Abasi ododu ye ñnyin." 24 Ke ini Josef ama ekedemere, enye ama onyuñ anam kpa nte Enjel Jihofa eketemede enye, onyuñ ada ñwan esie adian ke idem esie. 25 Edi enye ikọdiọñọke enye iferi nte ñwan tutu enye aman eyen eren. Ndien Josef ama osio Enye enyiñ "JISỌS".