1 Jisọs akamana ke obio Betelehem ke Judia, ke eyo Edidem Erọd. Mme ọfiọkñkpọ owo ema eto ke edem usiahautin edi ke Jerusalem, 2 enyuñ ebup ete, "Eyen emi amanade nte Edidem Mme Ju odu mmọñ? Koro ñnyin ima ikut ntantaọfiọñ Esie ke edem usiahautin, ndien ñnyin imedi ndituak ibuot nnọ Enye."

3 Ke ini Edidem Erọd okokopde ñkpọ emi, esit ama etimede enye ye kpukpru mbio obio Jerusalem. 4 Enye ama okot kpukpru mme ikpọ oku ye mme ewet ñwed obio, onyuñ obup mmọ ete, "Mmọñ ke Kraist edimana?"

5 Mmọ ema ebọrọ enye, ete, "Ke Betelehem ke Judia," koro emi edi se Asiak Uduak Abasi ekewetde: 6 " ‘Ndien afo, O Betelehem ke isọñ Juda, ukprike ukaha ke baba usuñ kiet ke otu mbon Juda; koro ada usuñ editode fi ke esit iwọrọ, emi edikarade ikọt Mi Isrel.’ "

7 Ekem Erọd okot mme ọfiọkñkpọ owo oro ke ndibe, onyuñ otim obup mmọ ini emi ntantaọfiọñ oro ọkọwọrọde. 8 Ndien enye ama ọdọñ mmọ eka ke Betelehem, onyuñ ọdọhọ mmọ ete, "Eka eketim eduñọde ebaña nsekeyen oro, ndien ke ini mbufo edikutde Enye, efiak edi edidọhọ mi, man ami ñko ñka ñkatuak ibuot nnọ Enye."

9 Ke mmọ ema ekekop uyo Edidem, mmọ ema edaha isañ, ndien sese, ntantaọfiọñ emi mmọ ekekutde ke edem usiahautin ebe iso ọnọ mmọ ndien edituak ada ke ebiet emi nsekeyen oro okodude. 10 Ke ini mmọ ekekutde ntantaọfiọñ oro, mmọ ema edat esit etieti.

11 Ke mmọ ema ekeduk ufọk ekekut nsekeyen ye eka esie Meri, mmọ ema eduọñọ ke isọñ etuak ibuot enọ Enye. Ndien mmọ ema ekubọde ekebe ñkpọuto mmọ enyuñ enọ Enye enọ gold, ye ufuọññkpọ ye mir (itiat emi enemde ufuọñ eke efọpde). 12 Sia Abasi okoduride mmọ utọñ ke ndap ete mmọ ekufiak eka ebine edidem Erọd, do mmọ ema esaña usuñ efen enyọñ obio mmọ.

13 Ekem ke mmọ ema ekenyọñọ, sese, Enjel Jihofa owut Josef idem ke ndap, onyuñ ọdọhọ enye ete, "Daha ke enyọñ da nsekeyen ye eka esie, fehe ka ke Ijipt, nyuñ tie do tutu Ami ndọhọ fi ọnyọñ, koro Erọd eyeyom nsekeyen oro ndiwot." 14 Ndien enye ama adaha ke enyọñ onyuñ emen nsekeyen ye eka Esie ke okoneyo oro efehe aka ke Ijipt, 15 ebiet emi enye eketiede tutu osim ini ñkpa Erọd. Man osu nte Jihofa akadade inua Asiak Uduak Esie etiñ ete.

"Ñkokot eyen Mi nsio ke Ijipt edi."

16 Ke ini Erọd okokutde ete ke mme ọfiọkñkpọ owo oro ema ebiaña imọ, enye ama ayat esit eti eti, onyuñ ọdọhọ eka ekewot kpukpru nditọ irenowo isua iba tutu osim nsek nditọ, nte asañade ekekem ye ini emi enye, okokopde oto mme ọfiọkñkpọ owo. 17 Ntem, emi ama osu nte Jerimaya, Asiak Uduak Abasi, ọkọdọhọde ete, 18 "Ndien ekop uyo otode ke Rama, ntuaña ye ñkpo mfuhọ, Rakel katua abaña nditọ esie, onyuñ esin ndibọ ndọñesit, koro mmọ miduhọ aba."

19 Ke ini Erọd ama akakpa, sese, Enjel Jihofa ama owut Josef idem esie ke ndap ke Ijipt, 20 ndien ọdọhọ enye ete, "Dahada ke enyọñ, nyuñ men nsekeyen emi ye eka esie fiak nyọñ ke isọñ Isrel, koro mmọ emi ekeyomde ndiwot nsekeyen oro ekpaña."

21 Ndien enye ama adaha kenyọñ, ada nsekeyen ye eka esie afiak ọnyọñ ke isọñ Isrel. 22 Edi ke ini enye okokopde ete ke Akelọs ama ada ubọñ ke Judia ke itie ete esie Erọd, enye ama efehe ndik ndika do. Edi nte Abasi eketemede enye ke ndap enye ama akabade ọnyọñ isọñ, Kalili, 23 okoduñ ke akwa obio emi ekerede Nasaret. Man osu nte mme Asiak Uduak Abasi eketiñde ete, "Eyekot Enye Eyen Nasaret."