1 Ke ini oro, Edidem Erọd ama okop mbuk abaña etop Jisọs, 2 ndien enye ama ọdọhọ mbon esop esie ete, "Owo emi edi Jọn Babtis ke idem esie; enye eset ke ñkpa, ntak edi oro odudu ndinam mme utibe ñkpọ odude enye ke idem." 3 Ekedi Erọd emi okomum Jọn ndien ọbọp enye esin ke ufọk ñkpọkọbi oto ke ntak Erọdias emi ekedide ñwan ndo eyen eka esie, Filip. 4 Koro Jọn ama ọdọhọ enye ete ke ifọnke enye ndida ñwan eyen eka esie emi osuk odude ke uwem ndọ. 5 Enye okpowot Jọn ini kiet edi oto ke ntak ndik akwa ntime nditibe, koro kpukpru otu owo ekenimde ke akpanikọ nte ke Jọn ekedi Asiakuduak Abasi. 6 Edi ke usen usọrọ emana Erọd, eyen añwan Erọdias ama enek unek emi ekenemde Erọd esit, 7 tutu enye ama ọñwọñọ ndinọ eyenañwan oro ñkpọ kiet ekededi emi enye edibeñede. 8 Ke ntak item eka esie, eyenañwan emi ama ebeñe ete, "nọ mi ibuot Jọn Babtis ke usanikpañ."

9 Esit ama etimede Edidem, edi ke ntak uñwọñọ esie ye mmọ emi eketiede ke okpokoro usọrọ ye enye, enye ama ọdọhọ ete yak enọ enye ebeñe esie;

10 ndien enye ama ọdọñ ekesibe ibuot Jọn ke ufọk ñkpọkọbi. 11 Ema emen ibuot Jọn ke usanikpañ edinọ eyenañwan emi, ndien enye ama emen ọkọnọ eka esie.

12 Mme mbet Jọn ema ekemen okpo esie ekebuk, enyuñ enam Jisọs ọfiọk abaña kpukpru se iketibede.

13 Kadaña emi Jisọs okopde mbuk emi, Enye ama oduk ubom ini kiet ọkpọñ ebiet oro aka ke ebiet emi odobode eketie ikpọñ. Ke ini mme otu owo ekekopde, mmọ ema esaña obot obot ebe ediwak obio ebine Enye.

14 Ndien ke ini Jisọs ekesimde isọñ Enye ama okut otu owo emi eketiede ebet Enye, ndien Enye ama atua mmọ mbọm, onyuñ ọkọk mmọ emi ekedọñọde udọñọ.

15 Ke ama ekesim mbubreyo, mbet Esie edidọhọ Enye ete, "Ini udia mbubreyo ekem ndien baba udia ndomokiet idughe ke isọñ utatan emi, dọhọ kpukpru owo enyọñọ man ekpekedep udia mmọ ke mme ñkpri obio iñwañ emi mmọ edisañade ke esit ibe."

16 Edi Jisọs ama ọbọrọ ete, "Ntak iduhọ mmọ ndiñyọñọ, enọ mmọ udia edia ke idem mbufo."

17 Mmọ ema edọhọ Enye ete, "Ñnyin inyene ebok uyo ition ye iyak iba kpọt."

18 Jisọs ama ọdọhọ mmọ ete, "Eda mmọ esọk Mi."

19 Enye ama ọdọhọ otu owo ete esuhọde etetie ke mbiet; ndien Enye ama emen ebok uyo ition ye iyak iba oro emenede enyin Esie ese ikpaenyọñ onyuñ ọdiọñ mmọ ndien ama obuñ mme uyo oro, onyuñ ayak ọnọ mme mbet Esie, emi ekemende enọ mme otu owo eta. 20 Kpukpru mmọ ema eta nte ọkọyuhọde mmọ; ndien mme mbet ema etañ mme mbeñe uyo oro ye iyak esin eyọhọ akpasa duopeba. 21 Ibat mmọ emi eketade uyo oro ekedi ñkpọ nte tọsin irenowo ition ke esiode iban ye nditọ ọwọñ efep. 22 Ke emi ama okokure, Jisọs ama ọdọhọ mbet Esie ete yak mmọ eduk ubom ebe inyañ eka edem eken, kadaña emi Enye añwanade ndinam otu owo esuana enyọñọ.

23 Ke Enye ama akanam mme otu owo enyọñọ, Enye ama ọdọk aka obot ikpọñ ndibọñ akam! Enye okodu do ikpọñ tutu osim mbubreyo. 24 Ke ubom ama ekesighede ọkpọñ isọñ anyan, akpa ama adaha eti eti, onyuñ etimede ubom sia ofum ọkọwọrọde ọbọi iso.

25 Edi ke ñkpọ nte ñkanika inañ usenubọk, Jisọs ama adaha asaña ke enyọñ ikpa mmọñ ebine mmọ, 26 ndien ke ini mme mbet Esie ekekutde Enye nte asañade ke enyọñ mmọñ, ndik ama anam mmọ eti eti ndien mmọ efiori ke ọkpọsọñ uyo ete edi ekpo.

27 Edi Jisọs ke ndo ndo oro ama osioro uyo ete, "Esọñ esit, ke edi Ami, ekufehe ndik."

28 Do ke Pita ọkọdọhọ Enye ete "Ọbọñ, edieke edide Afo, dọhọ mi nsaña ke enyọñ mmọñ mbine Fi."

29 Jisọs ama ọdọhọ ete, "Di." Do Pita ama ọsuhọ ke ubom onyuñ asaña ke enyọñ mmọñ ebine Jisọs. 30 Edi nte enye okokutde ọkpọsọñ oyobio, ndik ama anam enye, ndien enye ọtọñọ ndideñ. Enye ama ofiori ete, "Ọbọñ, nyaña mi!"

31 Jisọs ama anyanade ubọk Esie inikiet, omum enye onyuñ ọdọhọ enye ete, "Afo owo ekpri mbuọtidem, ntak emi afo ekeyikde?" 32 Ndien kadaña emi mmọ ema ekedọk eduk ubom, ofum inyañ ibom ama etre.

33 Mme mmọ emi ekedọñọde ke ubom ema etuak ibuot enọ Enye, enyuñ edọhọ ete, "Ke akpanikọ, Afo edi Eyen Abasi."

34 Ke mmọ ema ekebe inyañ, mmọ ema ekebehe ke isọñ Kenesaret. 35 Ndien ke adañaemi mbon edem oro ekeyararede ediọñọ ete ke ekedi Jisọs, mmọ ema esuan etop enọ ofuri ñkanñkuk mmọ, ndien mmọ ema eda mme mbọn udọñọ ebine Enye, 36 enyuñ ekpe Enye ubọk ete yak Enye ayak mmọ ekam etuk mben ọfọñidem Esie ikpọñ. Ndien kpukpru mmọ emi eketukde ema ekop nsọñidem.