1 Ke Jisọs ama okokure ke ndinọ mbet esie duopeba item, Enye ama adaha ọkpọñ ebiet oro, aka ndikpep ñnyuñ ñkwọrọ ikọ Abasi ke mme obio eken ekperede do.

2 Edi ke ini Jọn Babtis, esinede ke ufọk ñkpọkọbi okop mbuk utom Kraist, enye ama ọdọñ mbet esie, ekebup enye ete: 3 "Tiñ nọ ñnyin mme Afo edi Enye mi ekenyenede ndidi, mme ñnyin idori enyin ke owo efen?" 4 Jisọs ama ọbọrọ mmọ ete, "Efiak eka eketiñ enọ Jọn kpukpru mme ñkpọ emi mbufo ekopde enyuñ ekutde: 5 mme nnan etọñọ ntak ekut usuñ, ndien mme mbuñọ enyuñ esaña, mme akpamfia esana, ndien mme inan ekop ikọ, ndien emenam mme akpaña ñkpa eset, enyuñ ekwọrọ eti etop enọ nditọ ubuene. 6 Ndien ọfọfọn ọnọ owo ekededi emi mikwe ñkpọ iduọ ke idem Mi."

7 Kadaña emi mbet Jọn enyọñọde, Jisọs ama ọtọñọ nditiñ nnọ ofuri otu owo mbaña Jọn ete, "Mbufo ekeka isọñ utatan ndikut nso? Ñnyanyaña emi ofum enyeñede? 8 Ekewọñọ eka ndikut nso? Owo emi esinede ndiye ọfọñ? Baba, mme mmọ emi esinede ndiye ọfọñidem eduñọ ke ufọk mbọñ. 9 Nso ndien ke ekeka ndikut? Asiak Uduak Abasi? Ih, ami ntiñ nnọ mbufo nte ke enye akam okpon akan Asiak Uduak Abasi (Prọfet)." 10 Enye edi enyemi ekewetde ñkpọ ebaña ete, "Ami ñyedọñ Isuñutom mi ebem fi iso emi editimde usuñ isañ fo inọ fi."

11 Ke akpanikọ ke ndọhọ mbufo nte, ke otu mme mmọ emi iban emande owo baba kiet akananam iduhọ uwem emi okponde akan Jọn Baptis. Edi enye emi ekpride akan ke Obio Ubọñ Abasi okpon akan enye. 12 Ọtọñọde ke ini Jọn Babtis tutu osim emi, Obio Ubọñ Abasi ke akaka iso ye odudu ndien mbio odudu emum enye ke nsọñubọk. 13 Koro kpukpru mme Asiak Uduak Abasi ye Ibet, eketiñ ebaña Obio Ubọñ Abasi tutu edisim ini Jọn Babtis. 14 Ndien edieke mbufo edimade ndinim mme etop mmọ ke akpanikọ, Jọn emi edi Edaiya, emi ekesiande ebaña edidi esie. 15 Owo emi enyenede utọñ ndikop, yak enye okop.

16 "Ami ñkeme ndida nso ndomo ye emana emi? Mmọ ebiet nditọ ọwọñ emi etiede ke añwa urua ekot ñka mmọ."

17 " ‘Ñnyin imefri ikwọ inọ mbufo,

ndien mbufo inekke unek;

ñnyin imonyuñ ikwọ ikwọ ñkpa,

mbufo ituaha eyet.’

18 Koro Jọn ekedide ika diaha inyuñ iñwọñke ñkpọ, ndien mmọ ema edọhọ ete, enye enyene ndedehe ekpo ke idem! 19 Eyen owo emedi, adia onyuñ ọñwọñ ñkpọ ndien mmọ ete, ‘Sese owo ama udia ye ama mmin, ufan mme ọbọ ataksi obio, ye eke mme ndiọi owo.’ Eda edinam ọniọñ eyararede mme ọniọñ edi edinen."

20 Ndien Jisọs ama ọtọñọ ndisuñi mme obio emi enye akanamde mme ikpọ utibe ñkpọ, koro mmọ ikamaha ndi kabade esit ntiene Abasi. 21 "Ọdọdiọk ọnọ fi Kọrasin, ọdọdiọk ọnọ fi Betsaida! Koro edieke ekpekenamde ke Taya ye Sidọn mme utibe utom emi eke namde ke otu mbufo, mmọ ekpekabade esit anyan ini esine ọfọñ ikpo, ye ntọñ ukut. 22 Edi, Ami ndọhọ mbufo nte, ke eyefọn ye Taya ye Sidọn ke usen ikpe akan mbufo. 23 Ndien afo Kapanọm, nte afo okoyom ndimenerede idem fo ke enyọñ? Eyetop fi esuhọrede esin ke itie ndutuhọ. Edieke ekpenamde kpukpru mme utibe ñkpọ emi eke namde ke esit fo, ke Sọdọm, enye ke okposuk odudu ke uwem mfin emi. 24 Edi ndọhọ fi nte ke ikpe eyefere ye isọñ Sọdọm ke usen ikpe akan ye afo."

25 Ke ini oro Jisọs ama ọdọhọ ete, "Ami mmọnọ Fi ekọm, O Ete, Ọbọñ enyọñ ye isọñ, koro Afo okodipde mbon ọniọñ ye mbon ifiọk mme ñkpọ emi, ndien ayarade mmọ ọnọ mme ñkpri nditọ. 26 Ih, Ete, koro emi edi nte Afo okoyomde ete etibe."

27 "Ete Mi, amayak kpukpru ñkpọ ọnọ Mi, ndien baba owo kiet idiọñọke Eyen ọyọhọ ọyọhọ ke mibọhọke Ete, baba owo kiet inyuñ idiọñọke Ete ke mibọhọke Eyen ye owo ekededi emi Eyen edimade ndiyarade Enye nnọ. 28 Etiene Mi, kpukpru mbufo emi ekpade mba eto ke edibiom ndodobi mbiomo, ndien Ami ñyenọ mbufo nduọk odudu. 29 Ekọñọ ọkpọnọ Mi ke itọñ mbufo, enyuñ ekpebe Mi, koro Ami ndide suñsuñ, ñnyuñ ñnyenede nsuhọre idem ke esit. Ndien ukpọñ mbufo eyekut nduọkodudu. 30 Koro ọkpọnọ Mi ememde, mbiomo Mi onyuñ eferede."