1 Edikem ke ini Jisọs ama ekekure nditiñ ikọ Esie, Enye ama ọkpọñ Kalili aka ke ñkanñkuk Judia emi odude ke edem inyañ Jọdan eken. 2 Akamba otu owo ema etiene Enye, ndien Enye ama ọkọk mmọ emi ekedọñọde.

3 Ndusuk mme Farisi ema edi ndidomo Enye nse. Mmọ ema ebup Enye ete, "Nte enen owo ndisio ñwan esie ke ndọ ke ntak kiet ekededi?"

4 Enye ama ọbọrọ mmọ ete, "Nte mbufo ikotke ite ke enye emi okobotde owo okobot mmọ eren ye ñwan toto ke editọñọ, 5 ndien ke ntak emi, eyen eren eyekpọñ ete ye eka esie, ndien adiana ye ñwan esie, ndien mmọ mbiba eyekabade edi obuk kiet. 6 Ke ntre mmọ idighe aba owo iba, edi eyedi obuk kiet. Ke ntem, se Abasi ama akadian, yak owo ndomokiet okudiañade."

7 Mmọ ndien ebup Enye ete, "Nso ndien idi ntak emi Moses okowukde ete yak ewet ñwed usio ndọ enọ ñwan ndien esio enye ke ndọ?"

8 Jisọs ama ọbọrọ mmọ ete, "Moses ama onyime mbufo esio iban mbufo ke ndọ oto ke ọkpọsọñ isọñesit mbufo. Edi ikedighe ntre ke editọñọ. 9 Edi ami ndọhọ mbufo nte, edieke owo ekededi osiode ñwan esie ke ndọ ke mitoho ke edisin efibe, edinyuñ idọde ñwan efen, enye esin efibe. Ndien owo emi ọdọde ñwan oro esiode ke ndọ, esin efibe."

10 Mme mbet Esie ema edọhọ Enye ete, "Edieke edide se idude ke ufọt eren owo ye ñwan esie edi oro, ifọnke owo ndidọ ndọ."

11 Jisọs ama ọbọrọ ete, "Idighe kpukpru owo ekeme ndinyime ukpepñkpọ emi, ke mibọhọke mmọ emi Abasi ọnọde ukeme ndinyime, 12 koro ndusuk owo emana itọ eto idibi eka mmọ, ndusuk edi itọ eto ubọk owo, ndusuk enam idem mmọ itọ eto ke ntak Obio Ubọñ Abasi. Yak owo ekededi emi ekemede ndibọ ukpepñkpọ emi ọbọ."

13 Ema eda ñkpri nditọ esọk Jisọs man Enye odori mmọ ubọk onyuñ ọbọñ akam ọnọ mmọ. Edi mbet Esie ema esua enọ mmọ emi ekedade nditọ edi.

14 Jisọs ama ọdọhọ, ete, "Eyak ñkpri nditọ etiene Mi, ekukpan mmọ, koro Obio Ubọñ Abasi enyenede utọ mmọ emi." 15 Ndien Enye ama odori mmọ ubọk onyuñ ọdiọñ mmọ mbemiso Enye ọkọkpọñ mmọ.

16 Ekem owo kiet ama ebine Jisọs onyuñ obup Enye ete, "Andikpep, nso eti ñkpọ ke ñkpanam man ñnyene nsinsi uwem?"

17 Jisọs ama obup enye ete, "Ntaha afo obupde Mi abaña se ifọnde? Kiet kpọt kpọt odu emi ọfọnde. Edieke oyomde ndinyene nsinsi uwem, nim mme ewuhọ."

18 Owo oro ama obup Enye ete, "Mme ewuhọ efe?" Jisọs ama ọbọrọ enye ete, "Kuwot owo, kusin efibe, kuyip inọ, kutie ntiense nsu, 19 kpono usọ ye uka, nyuñ ma mbọhọiduñ fo nte idem fo."

20 Akparawa oro ama ọbọrọ Enye ete, "Mma nnenim kpukpru mme ewuhọ emi, nso efen ke ñkpenyene ndinam?"

21 Jisọs ama ọbọrọ enye ete, "Edieke afo oyomde ndifọn mma, ka kanyam kpukpru inyene fo, ndien men okuk oro nọ mme ubuene, ndien afo eyenyene ekese inyene ke Obio Ubọñ Abasi. Ndien fiak di disaña ye Ami." 22 Ndien ke akparawa oro ama okokop ikọ oro, enye ama adaha ọnyọñ ye mfuhọ, koro enye ekenyenede ediwak inyene.

23 Do ke Jisọs ọkọdọhọ mbet Esie ete, "Ami ntiñ akpanikọ nnọ mbufo nte ke edi ata ọkpọsọñ ñkpọ owo inyene ndiduk Obio Ubọñ Abasi. 24 Ami mfiak ndọhọ mbufo nte ke edi mmemmem ñkpọ enañ ndibe ke odudu abiabon akan owo inyene ndiduk Obio Ubọñ Abasi."

25 Ndien ke ini mme mbet ekopde ikọ emi idem ama akpa mmọ eti eti, ndien mmọ ema ebup ete, "Anie ndien ke ekeme ndinyaña?"

26 Edi Jisọs owuk enyin ese mmọ, onyuñ ọdọhọ mmọ ete, "Owo ikemeke ndinam emi, edi Abasi ekeme ndinam kpukpru ñkpọ."

27 Do ke Pita ọkọdọhọ Enye ete, "Ñnyin ima ikpọñ kpukpru ñkpọ itiene Fi! Nso ndien ke ñnyin idinyene?"

28 Jisọs ama ọdọhọ mmọ ete, "Ke akpanikọ ke ndọhọ mbufo nte ke ema enam kpukpru ñkpọ efiak edi obufa, ke ini Eyen Owo editiede ke ebekpo Ubọñ Esie ye uteñe ke enyọñ, mbufo emi etienede Mi ke eyo emi eyenyuñ etie ñko ke mme ebekpo duopeba ndikpe mme idut Isrel duopeba ikpe. 29 Ndien owo ekededi emi ọkpọñde ufọk esie, mme nditọ ete esie iren ye iban, mme ete, mme eka, mme nditọ, mme isọñ, ke ntak Mi, eyebọ utim ikikie, ndien enye eyenyuñ enyene nsinsi uwem. 30 Edi ediwak mmọ emi edide mme ebemiso ke emi, eyekpere edem, ndien mme ediwak mmọ emi ekperede edem idaha emi eyebe iso."