1 Jisọs ama ọtọñọ ntak etiñ ikọ ye mmọ ke ñke, ete, 2 "Obio Ubọñ Abasi ebiet edidem kiet emi eketimde usọrọ ndọ ọnọ eyen esie eren. 3 Enye ama ọdọñ ikọt esie ekesian mme mmọ oro ekekotde, ete edi ke ini usọrọ ndo ekem. Edi mmọ ndomokiet ikedighe." 4 Ntre ke enye ọtọñọ ntak ọdọñ nditọ ufọk esie ekedọhọ mmọ oro ekekotde ete, "Sese, Mmanam udia mma, mma ñwot enañ mi ye mme unam emi esehede, kpukpru ñkpọ ebono ke itie, yak mmọ edi usọrọ ndo."

5 Edi mme isenowo emi enye okokotde ema esin enye ke mbuburu enyuñ eka iso ndinam mme mbubehe mmọ; kiet aka iñwañ, eken aka urua esie. 6 Ndusuk mmọ emum mme isuñutom emi etuhọde enyuñ ewot mmọ.

7 Edidem emi ama ayat esit onyuñ ọnọ mbio ekọñ esie ekewot kpukpru mme owot owo oro enyuñ efọp obio mmọ ofuri ofuri. 8 Ndien enye ama ọdọhọ nditọ ufọk esie ete, "Usọrọ ndọ ebeñe idem, ndien mbon emi ami ñkokotde edi, ikodotke ndidi. 9 Idahaemi ewọñọ eka ke mme efak ekekot owo kiet ekededi emi mbufo edikutde edi usọrọ ndọ emi.

10 Nditọ ufọk esie ema eka ekenam kpasuk nte enye eketemede, ndien mmọ ema eda kpukpru oruk owo emi mmọ ekekutde, nti ye ndiọi edi, ndien ufọk ọyọhọ fap ye isenowo." 11 Edi ke ini edidem okodukde edi man edisobo ye mme isenowo esie, enye ama okut owo kiet emi mikesineke ọfọñidem ndo (emi ekenọde enye).

12 Enye ama obup enye ete, "Ufan, asaña didie edidu mi ke ini afo musineke ọfọñidem ndọ?" Owo oro ikenyeneke ibọrọ ndomokiet.

13 Ntem ke edidem ọkọdọhọ mme ekpeme ufọk usọrọ ete, "Ebọp enye ubọk ye ukot, ndien emen enye eketop eduọk ke akwa ekim ke añwa, ke ebiet emi eyet ye ntaedet odude. 14 Koro ekekotde ediwak, edi ema emek ibad ibad owo."

15 Do ke mme Farisi ekewọñọ ekesobo ọtọkiet enyuñ ekere usuñ nte editapde inyuñ imum Jisọs ito ikọ inua Esie. 16 Mmọ ema edọñ mme mbet mmọ ye mme mbon ñka Erọd ete ekebup Enye mbume emi: "Andikpep ñnyin imọfiọk ite ke Afo edi nnen nnen owo akpanikọ, onyuñ ekpep usuñ Abasi ke akpanikọ, Afo uyakke owo etimerede Fi koro Afo mudọñke enyin ke se owo edide. 17 Tiñ ndien nọ ñnyin, se idide ekikere Fo? Nte enen ndikpe taksi nnọ Sisa, mme inenke?"

18 Edi Jisọs ama ọdiọñọ idiọk uduak mmọ, ndien ọdọhọ ete, "Mbufo mbio mbubik, nsinam mbufo eñwanade nditap Mi mmum?" 19 Ewut Mi okuk emi edade ekpe taksi. Ndien mmọ ema eda okuk denariọs kiet esọk Enye, 20 ndien Enye ama obup mmọ ete, "Usio idem anie edi emi? Anie ewet mme ñwed emi?"

21 Mmọ ema ebọrọ Enye ete, ke edi eke Sisa. Ndien Enye ama ọdọhọ mmọ ete, "Enọ Sisa se inyenede Sisa, enyuñ enọ Abasi se inyenede Abasi."

22 Ibọrọ Esie ama akpa mmọ idem eti eti, onyuñ afina mmọ ñko, ndien mmọ ema edaha ekpọñ Enye enyuñ enyọñọ.

23 Edi kpa ke usen oro, ndusuk mme Sadusi emi ekedọhọde ete ke ediset ke ñkpa idughe ema ebine Jisọs, enyuñ ebup Enye ete, 24 "Andikpep, Moses ọkọdọhọ ete, edieke owo akpade inyeneke nditọ, yak eyeneka esie ada ebekpa oro ọdọ, man enye obon nditọ ke enyiñ eyeneka esie. 25 Ñnyin ima inyene kiet ke otu ñnyin emi ekenyenede nditọ eka irenowo itiaba, ndien akpa ke otu mmọ ama ọdọ ñwan, ndien enye akpa ikenyeneke nditọ, ke ntre ebekpa oro amakabade edi ñwan eyeneka ọyọhọ iba. 26 Ntre ke ekedi ye udiana, ye ọyọhọ ita, tutu osim eyen eka ọyọhọ itiaba: 27 Ke akpatre, ñwan oro ñko ama akpa. 28 Ke emi, ñwan anie owo ke enye edidi ke usen ediset ke ñkpa? Koro enye ekedide ñwan mmọ owo itiaba?"

29 Jisọs ama ọbọrọ mmọ ete "Ndudue mbufo oto ke unana edifiọk Ñwed Abasi ye odudu Abasi." 30 Koro ke ediset ke ñkpa owo ididọhọ ndọ, idinyuñ inọhọ owo ke ndọ, mmọ editie nte mme enjel ke Enyọñ. 31 Ke se itukde ediset ke ñkpa, nte mbufo ikekotke se Abasi eketiñde ye mbufo ete, 32 "Ami ndi Abasi Ebraham, ye Aisik, ye eke Jekọb? Ke ntre Abasi idighe Abasi mme akpaña ñkpa, edi eke mme oduuwem."

33 Idem ama akpa ofuri otu owo eti eti kabaña ukpepñkpọ Esie. 34 Edi ke ini emi mme Farisi ekekopde ete ke Jisọs ama okibi mme Sadusi inua, mmọ ema ebok idem oto kiet. 35 Ata ọfiọk ibet kiet ke otu mmọ, ama obup Jisọs ke etabi ete, 36 "Andikpep, efe ewuhọ okpon akan ke otu mme ibet?"

37 Jisọs ama ọbọrọ ete, "Ma Ọbọñ Abasi fo ke ofuri esit fo, ye ke ofuri ukpọñ fo, ye ke ofuri ekikere fo. 38 Enye emi edi akpa ibet ye andikpon ñkan. 39 Ndien udiana aka ntem; ‘Ema mbọhọiduñ mbufo kpa nte emade idem mbufo.’ 40 Kpukpru ofuri ibet ye se mme Asiak Uduak Abasi ekekpepde ekọñọ ke ibet iba emi."

41 Ke ini mme Farisi ema ekeboho ke ebiet kiet, Jisọs ama obup mmọ ete, 42 "Mbufo ekere didie ebaña Kraist? Eyen anie owo ke Enye edi?" Mmọ ema ebọrọ Enye ete, "Enye edi Eyen Defid."

43 Enye ama ọdọhọ ete, "nso inam ndien Defid okokotde Enye oto nda usuñ Spirit, ‘Ọbọñ! Koro Defid ọkọdọhọ ntem ete,

44 Abasi ọkọdọhọ Ọbọñ mi ete:

Tie mi ke ubọk nnasia mi

tutu nda mme asua Fo

ke idak ukot Fo.

45 Edieke Defid okotde Enye Ọbọñ, Enye ekeme didie ndien ndidi eyen esie?’ "

46 Owo ndomokiet ikekemeke ndinyene se enye ọkpọbọrọde ndien ọtọñọde ke usen oro aka iso, owo ndomokiet ikenyeneke uko ndibup Enye baba mbume ndomokiet.