1 Ke ini emi Jisọs akasañade ebe ke iñwañ ibokpot ke usen ibet, biọñ ama ọdọñ mme mbet Esie, ndien mmọ ema etọñọ ndiwai ibokpot nta.

2 Ke ini mme Farisi ekekutde emi, ema edọhọ Enye ete, "Sese mme mbet Fo ke enam se minenke owo ndinam ke usen Sabat."

3 Edi Jisọs ama ọbọrọ mmọ ete, "Nte mbufo ikokotke se Edidem Defid akanamde ke ini biọñ ọkọdọñde enye ye mme mmọ emi ekedude ye enye?" 4 Nte enye okodukde ufọk Abasi onyuñ emen edisana uyo Abasi ata ye mmọ emi ekesañade ye enye, emi mikenenke mmọ ndita, ke mibọhọke mme oku ikpọñ? 5 Mme nte mbufo ikonyuñ ikotke ke ñwed mbet nte mme oku ke ufọk Abasi ekesabarede enyuñ ebiatde usen Sabat ndien inyeneke ndudue? 6 Ndien ke akpanikọ ke ndọhọ mbufo nte, kiet odu mi emi okponde akan ufọk Abasi. 7 Edi, edieke mbufo ekpediọñọde se itie ñwed Abasi emi ọwọrọde: "Ami ñyom mbufo etua owo mbọm ekan nte enọde mme uwa ye mme nsio nsio enọ inemesit, mbufo ikpomiomke mme mmọ emi miduehe isop ikpe. 8 Koro Ami Eyen Owo ndi Ọbọñ Sabat."

9 Jisọs ama ọkpọñ ebiet oro onyuñ aka atayat ubọñ akam kiet, 10 ke ebiet emi owo emi ubọk esie kiet akakpade okodude. Mme owo ema edu do emi ekeyomde usuñ ndidori Jisọs ikọ nte ke Enye anam idiọkñkpọ, do mmọ ema ebup Enye ete, "Nte owo ndikọk owo udọñọ ke usen ederi akatuaha ye ibet?" 11 Jisọs ama ọbọrọ ete, "Edieke owo mbufo ndomokiet enyenede erọñ kiet kpọt, ndien enye ọduọ oduk obube ke usen ederi, nte enye ikpodomoke ofuri ukeme esie ndisio enye ke obube ke usen oro?" 12 Ndien owo ọsọñ urua akan erọñ, ke ntem, enen owo ndinam eti ñkpọ ke usen ederi. 13 Do ke Enye ọkọdọhọ owo oro ete, "Neñerede ubọk fo." Enye ama eneñerede ubọk esie, ndien ubọk oro ama ọsọñidem ukem nte ubọk ñkañ eken.

14 Mme Farisi ema ewọñọ ekeduk ediomi ebaña nte edisañade iwot Jisọs. 15 Ke Jisọs ama ọkọfiọk ekikere mmọ Enye ama adaha ọkpọñ ebiet oro. Mme ediwak owo ema etiene Enye, ndien Enye ama ọkọk mme udọñọ mmọ, 16 onyuñ oduri mmọ utọñ ete yak mmọ ekuyarade Imọ. 17 Enye akanam emi man se oku Abasi Aisaya eketiñde okposu:

18 "Sese isuñutom emi Ami mmekde,

enyemi Ami mmade, ñnyuñ nemde esit mbaña.

Ami ñyesin Enye Spirit mi ke idem ndien

Enye eyekwọrọ unen ọnọ kpukpru mme idut.

19 Enye idinenike eneni, idinyuñ ibọñke ñkpo;

mme ndimenerede uyo Esie ke enyọñ, ke mme efak.

20 Enye idibuñke ñnyanyaña,

idinyuñ ifurike ọfọñ utuenikañ inime.

Enye eyeyire tutu unen akan,

21 ndien ke Enye, ke ofuri idut edisin idorenyin mmọ."

22 Ekem, ema eda owo emi ndedehe spirit okomumde, emi ekedide nnan ye imum, esọk Jisọs. Ndien Enye ama anam udọñọ esie okure. Ntre enye ama ekeme nditiñ ikọ ñnyuñ ñkut usuñ. 23 Ndien idem ama akpa ofuri otu owo oro, mmọ enyuñ edọhọ ete, "Nte Enye mi edi Eyen Defid?"

24 Edi ke adaña emi mme Farisi ekekopde ebaña mme utibe utom Esie, mmọ ema etiñ ete, "Enye ekeme ndibin ndedehe spirit koro Belsibọb, etubom mme ndedehe spirit ọnọde Enye odudu."

25 Sia Jisọs ama ọkọdiọñọ ekikere mmọ, ama onyuñ ọdọhọ mmọ ete, "kpukpru idut emi ebaharede eda eñwan ye idem mmọ, eyeduk ke nditaha, ndien kpukpru mme obio ye mme ufọk emi abaharede eda eñwan ye idem esie, idisọñọke ida." 26 "Ndien edieke Setan ebinde Setan, enye añwana ye idem esie, ndien enye onyuñ abiat obio ubọñ esie. 27 Ndien edieke Ami ndade odudu Setan mbin ndedehe spirit, nditọ mbufo eda odudu anie ebin mmọ esioño? Ntem, mmọ eyekpe ikpe enọ mbufo. 28 Ndien edieke Ami mbinde ndedehe spirit mfep ke odudu Abasi, oro ọwọrọ ete ke obio ubọñ Abasi edi ke otu mbufo." 29 Ñko, owo ekeme didie ndiduk ke ufọk ọkpọsọñ owo ñkatañ mme ñkpọ esie, ke ini enye mibemke iso ibọp ọkpọsọñ owo oro, ndien enye ekeme ndibume ñkpọ ufọk esie? 30 Enye emi misañake ye Ami, ọbọbiọñọ Mi; ndien owo ekededi emi mitañke ibok ye Ami, asasuan.

31 Ntem ke Ami ndọhọ mbufo nte, ke eyefen enọ owo ke kpukpru idiọkñkpọ ye edisabade, edi idifenke inọ owo ndomokiet ke ndisabade Edisana Spirit. 32 Eyefen enọ owo ekededi emi etiñde ikọ adian Eyen Owo, edi ididahakedo inọ owo ndomokiet emi editiñde ikọ idian Edisana Spirit, edide ke ererimbot enyemi, onyuñ edide ke enye emi edidide.

33 "Enam eto ọfọn, ndien mfri esie eyefọn; enam eto ọdiọk ndien mfri esie ọyọdiọk ñko. Koro edade mfri eto ediọñọ eto. 34 Mbufo nditọ urukikọt, didie ke ndiọi owo nte mbufo ekeme nditiñ nti ikọ? Koro se owo ekerede ke esit esie kpa oro ke enye osio etiñ ke inua esie. 35 Eti owo osioño nti ñkpọ oto ke nti ñkpọ emi edọñọde enye ke idem; idiọk owo ñko osioño mme ndiọi ñkpọ oto ke mme ndiọi ñkpọ emi edọñọde enye ke idem. 36 Ndien Ami ndọhọ mbufo kemi nte ke owo kiet kiet eyenam ibat ke usen ikpe abaña mme ikpuikpu ikọ emi enye eketiñde. 37 Koro edida ikọ inua mbufo itebe mbufo ikpe, mme itip mbufo ikpe."

38 Usen kiet, mme ekpep mbet mme Ju, ye mme Farisi ema edidọhọ Enye ete, "Andikpep, ñnyin iyom ndikut idiọñọ nto fi."

39 Jisọs ama ọbọrọ mmọ ete, "Edi oburobut emana ye emana efibe edi emi eyomde idiọñọ! Mbufo idikwe idiọñọ ndomokiet, ke ebede idiọñọ Prọfet Jona. 40 Koro nte Jona okodude ke idibi iyak uwemeyo ita ye okoneyo ita, kpa ntre ke Eyen Owo edidu uwemeyo ita ye okoneyo ita ke esit isọñ. 41 Mbio obio Nenife eyedaha eda ke ikpe ye emana emi ke usen ikpe, enyuñ enam ikpe etip enye, koro mmọ ema ekabade esit kadaña ini Jona ọkọkwọrọde ikọ Abasi ọnọ mmọ. Ndien idahaemi, Enye emi okponde akan Jona odu mi ke otu mbufo, edi mbufo etre ndinim Enye ke akpanikọ. 42 Ọbọñañwan Sheba, eyedaha ada ke ikpe ye emana emi ke usen ikpe, onyuñ etip enye ikpe, koro enye okotode anyan idut edi man edikop ifiọk Edidem Sọlọmọn; ndien kemi, Enye emi okponde akan Sọlọmọn odu mi, edi mbufo etre ndinim Enye ke akpanikọ."

43 "Ke ini idiọk spirit ọwọrọde owo ke idem, enye asaña oyo ke nsat isọñ oyom nduọk odudu, edi ikwe. 44 Ndien enye ọdọhọ ete, ‘Ami ñyefiak ñnyọñ ufọk emi ami ñkotode ke esit ñwọrọ.’ Ndien ke ini enye afiakde edi, okut nte ufọk oro anade ukpọk, ema ekpọri enyuñ ebana enye. 45 Enye ndien aka akada mme ndiọi spirit itiaba efen emi ediọkde ekan enye adian ke idem, ndien mmọ ediduk enyuñ eduñ do, ndien ukperedem itie owo oro akabade ọdiọk akan nte ekedide. Kpa ntre ke edidi ye idiọk emana emi!"

46 Nte Jisọs okosuk etiñde ikọ ye mme otu owo, sese eka Esie ye nditọ eka Esie edida ke añwa eyom ndineme nneme ye Enye. 47 Owo kiet ama ọdọhọ Enye ete, "Sese Eka Fo ye nditọ Eka Fo ke añwa eda, eyom ndineme nneme ye Afo." 48 Edi Enye ama obup ete, "Anie edi Eka Mi? Mme anie edi nditọ Eka Mi?" 49 Enye anyanarede ubọk Esie owut mme mbet Esie, onyuñ ọdọhọ ete, "Mmọ emi edi eka Mi ye nditọ eka Mi." 50 Ndien Enye afiak adian uyo ete, "Owo ekededi emi edinamde se Ete Mi emi odude ke enyọñ amade, enye edi eyeneka Mi eren, ye eyeneka Mi añwan, ye Eka Mi."