1 Ke usen itiokiet ama ekebe, Jisọs ama ada Pita ye Jems ye Jọn, eyen eka Jems, ọdọk ke ñkoñkoñ obot eketie ke idem mmọ. 2 Ndien nte mmọ ekesuk esede Enye, Enye ama ọkpuhọrede uduot. Iso Esie onyuñ ayama nte utin, ndien ọfọñ idem Esie akabade afia nte uñwana.

3 Ndien sese Moses ye Elaiya ewọrọ eda mmọ ke iso, enyuñ eneme nneme ye Jisọs. 4 Do ke Pita ọkọdọhọ Jisọs ete, "Ọbọñ, ọfọn ñnyin ndidu mi. Edieke Afo edinyimede, ñyebọp atayat ita mi, kiet enyene Fi, kiet enyene Moses, kiet enyene Elaiya."

5 Enye ke eketetiñ ikọ, sese afia ntuhube ye uyama eto ke enyọñ ekan mmọ okuk, ndien uyo ama oto ke ikpaenyọñ emi eketiñde ete, "Emi edi edima Eyen Mi, emi enemde mi esit, mbufo ekop uyo Esie."

6 Ndien ke ini mme mbet ekekopde uyo oro, mmọ ema eduọñọ ekibi iso mmọ ke isọñ oto ke ọkpọsọñ ndik. 7 Edi Jisọs ama asaña edi, edituk mmọ, onyuñ ọdọhọ ete, "Edaha ke enyọñ, ekufehe ndik."

8 Ndien ke ini mmọ emenerede enyin ese, mmọ ikekwe baba owo kiet efen ke mibọhọke Jisọs ikpọñ.

9 Ndien nte mmọ esuhọrede ke enyọñ obot Jisọs ama owuk mmọ ete, "Ekutiñ enọ owo baba kiet se mbufo ekekutde tutu emenede Eyen owo ke ñkpa."

10 Mbet Esie ema ebup Enye ete, "Ntaha mme Andikpep ibet edọhọde ete ke Elaiya enyene ndibemiso ndi-e?"

11 Jisọs ama ọbọrọ mmọ ete, "Mmọ enen. Elaiya enyene ndibem iso ndi man editim kpukpru ñkpọ onim ke itie mmọ. 12 Edi ke akpanikọ ke ndọhọ mbufo nte, Elaiya ama ededi, ndien mmọ ikediọñọke enye, edi ekenam ye enye nte mmọ ekemade. Kpasuk ntre ke Eyen Owo ñko edikut ukut ke ubọk mmọ."

13 Ntem ke mbet ekefiok ete ke Enye eketiñ ye mmọ abaña Jọn Babtis.

14 Ke mmọ ema ekedisim otu owo, owo kiet ama edi editọñọ edọñ ke iso Jisọs. 15 "Ete, tua eyen mi mbọm, koro enye edi owo ndisi, enye onyuñ odu ke akamba ndutuhọ; kpukpru ini enye ọdọduọ oduk ikañ mme mmọñ. 16 Ami mma nda enye nsọk mme mbet Fo edi mmọ ikekemeke ndikọk udọñọ esie."

17 Jisọs ama ọbọrọ ete, "O mbufo mbio emana emi enanade mbuọtidem, enyuñ ekwañade ido, adaña didie ke Ami ndidu ye mbufo? Adaña didie ke Ami ndiyọ mbufo? Da enye sọk Mi." 18 Jisọs ama asua ọnọ ndedehe spirit emi ekesinede eyen oro ke idem; ndien enye ọkpọñ enye, ndien ke ndo ndo oro eyen oro ama okop nsọñidem.

19 Ke oro ama ekebe, mbet Esie ekebup Enye ke ndibe ete, "Nsidi ntak emi ñnyin mikekemeke ndibin spirit oro nsio eyen oro ke idem?"

20 Enye ama ọbọrọ mmọ ete, "Oto ke ntak ekpri mbuọtidem mbufo," koro edieke ekpenyenede mbuọtidem emi ekpride nte ñkpasip ofriyo kiet, emekeme ndidọhọ obot emi ete, "Wuhọde mi, ka kọwuhọ ko," ndien enye eye ọwuhọde. Baba ñkpọ kiet idisọñke ikan mbufo ndinam. 21 Edi oruk ndedehe spirit emi ikemeke ndiwọrọ ntre ibọhọke mbufo ebọñ akam enyuñ etre udia.

22 Ke mmọ ema ekedisobo ọtọ kiet ke Kalili, Jisọs ọdọhọ mmọ ete, "Emọñ etap Eyen Owo esin ke ubọk mme owo, 23 mmọ eyenyuñ ewot Enye, ndien ke ọyọhọ usen ita eyenam Enye eset onyuñ ọtọñọ ntak odu uwem." Ndien mbet ema efuhọ eti eti.

24 Ke mmọ ema ekesim Kapanọm, mme ọbọ ataksi itie ukpono ema ebine Pita enyuñ ebup enye ete, "Nte Andikpep mbufo ekpe taksi itie ukpono?"

25 Pita ama ọbọrọ ete, "Enye ekpe." Ke enye ama okoduk ufọk, Jisọs ebem iso obup Enye ete, Saimọn, "Afo ekere nso? Ndidem ererimbot ebọ mme anie taksi ye utomo, ebọ eto nditọ mmọ, mme ebọ eto mme isenowo?"

26 Pita ama ọbọrọ ete, "Ebọ eto isenowo." Jisọs ama ọbọrọ enye ete, "Ke ntre nditọ isọñ ebọhọ. 27 Edi mbak ñnyin idiyat mmọ esit, ka ke inyañ kesin uwam, ñnyuñ men akpa iyak emi udumumde, nyuñ tat enye inua, ndien afo eyekut okuk kiet. Men nọ mmọ ke okuk ataksi Mi ye okwo."