1 Ke ini Jisọs okokutde akwa otu owo, Enye ama ọdọk ke enyọñ obot onyuñ ọsuhọde etetie. Mme mbet Esie ema ekuk Enye esin, 2 ndien Enye ama ọtọñọ ndikpep mmọ ñkpọ, ntem:

3 "Ọfọfọn ọnọ mmọ emi edide ubuene ke spirit,

koro Obio Ubọñ Abasi enyenede mmọ;

4 Ọfọfọn ọnọ mmọ emi efuhọde,

koro edidọñde mmọ esit,

5 Ọfọfọn ọnọ mmọ emi enyenede ifure ifure ido,

koro mmọ edidade isọñ inyene;

6 Ọfọfọn ọnọ mmọ emi ekopde biọñ ye nsatitọñ kabaña edinen ido,

koro edinamde mmọ eyuhọ;

7 Ọfọfọn ọnọ mmọ emi etuade owo mbọm,

koro eyetua mmọ mbọm,

8 Ọfọfọn ọnọ mmọ emi esit mmọ asanade,

koro mmọ eyekut Abasi;

9 Ọfọfọn ọnọ mme anam emem,

koro eyekot mmọ nditọ Abasi;

10 Ọfọfọn ọnọ mmọ oro ekọbọde mmọ ke ntak eti edu uwem,

koro Obio Ubọñ Abasi enyenede mmọ.

11 Ọfọfọn ọnọ mbufo, ke ini mme owo esabarede, enyuñ ekọbọde mbufo, enyuñ etiñ mme nsionsio ndiọi ikọ ebaña mbufo ke nsu ke ntak Mi. 12 Enem esit, enyuñ edara eti eti, koro utib mbufo okponde ke enyọñ, koro kpa ntem ke mme owo ekekọbọ mme Asiak Uduak Abasi emi ekebemde mbufo iso.

13 Mbufo edi inuñ enọ ererimbot. Edi edieke inuñ minyeneke aba inem, edida nso inam enye enyene inem? Enye ifọnke ke baba ñkpọ kiet, ke ebede nditop enye nduọk, ndien mme owo edighi ke ukot. 14 Mbufo edi uñwana ererimbot. Obio emi ebọpde ke enyọñ obot, ikemeke ndidibe. 15 Owo inyuñ idomoke utueneikañ ida abañ ifuk; edi edori enye ke enyọñ ñkpọ udori utueneikañ ke ebiet emi enye ayamade ọnọ kpukpru owo ke ufọk. 16 Eyak uñwana mbufo ayama ke iso mme owo man mmọ ekut nti utom mbufo, enyuñ enọ Ete mbufo emi odude ke enyọñ ubọñ.

17 Ekukere ete ke Ami ndi ndibiat ibet ye mme Asiak Uduak Abasi. Ami ñkedighe ndibabiat edi ñkedi ndinam kpukpru esu. 18 Koro ke akpanikọ ke ndọhọ mbufo nte, tutu enyọñ ye isọñ ebe efep, baba ntọi kiet mme ekpri nde kiet ke ibet idibehe ifep, tutu kpukpru mmọ esu. 19 Ke ntre, edieke owo ekededi abiatde andikpri ñkan ke otu mme ibet onyuñ ekpepde mbon efen ndinam ntre, enye eyedi andikpri ñkan ke Obio Ubọñ Abasi. Edi ama edi mmọ emi ekpepde ndien enyuñ enam se ibet etemede, mmọ eyekpon ke Obio Ubọñ Abasi.

20 Edi Ami nduri mbufo utọñ nte, ibọhọke nti ido mbufo ekpon ekan eke mme Farisi ye eke mme ada ibuot ukara mme Ju, mbufo idikemeke ke baba usuñ ndomokiet ndiduk ke Obio Ubọñ Abasi.

21 Mbufo ema ekop ete ke ema enọ mbio eyo oko uyo, ete, ‘Kuwot owo, ndien owo ekededi emi owotde owo eyeda ke ikpe.’ 22 Edi Ami ndọhọ mbufo nte, owo ekededi emi ayatde esit ye eyen ete esie enyene ndida ke ikpe, ndien owo ekededi emi edidọhọde eyen ete esie ete, Raka (oburobut owo), ekeme ndida enye ñka akwa esop, ndien owo ekededi emi ọdọhọde eyen ete esie ete, ‘Afo ndisime,’ eyeka ikañ itie ndutuhọ.

23 Ke ntem, edieke afo adade enọ fo edi ke itie uwa, ndien afo eti do ete ke eyen ete fo enyene ikọ ye afo, 24 kpọñ enọ fo do ke itie uwa, ndien ka kebem iso nam emem ye eyen ete fo, ndien afo edinọ enọ fo. 25 Wara nam emem ye owo utọk fo kadaña emi mbufo edude ke usuñ esop man enye ediyak fi ọnọ ebiere ikpe, ndien ebiere ikpe ayak fi ọnọ isuñutom esop, ndien esin fi ke ufọk ñkpọkọbi. 26 Kakpan ke ndọhọ fi nte, afo uduwọrọke do, tutu afo osio kpukpru okuk ama.

27 Mbufo ema ekop nte ekedọhọde ete, ‘Kusin efibe.’ 28 Edi Ami ndọhọ mbufo nte owo eke esede ñwan ke enyin use, enye akam esesin efibe ke esit esie ye enye. 29 Ke ntre, edieke enyin fo, ekpedi enyin ubọk nnasia fo, anam fi anam idiọkñkpọ, tibi enye sio duọk, koro ọfọn ubak idem fo kiet nditak ñkan ndimen fi ofuri ofuri ntop nsin ke ikañ ndutuhọ (hell). 30 Ñko edieke ubọk fo, ekpedi ubọk nnasia fo esin fi anam idiọkñkpọ, sibe enye duọk, koro ọfọn nte ubak idem fo kiet atakde, akan ndisin ofuri idem fo ke ikañ itie ndutuhọ.

31 Mbet Moses ọdọhọ ete, edieke owo oyomde ndisio ñwan esie ndọ, yak enye ọnọ enye ñwed usio ndọ. 32 Edi Ami ndọhọ mbufo nte, edieke owo osiode ñwan esie ndọ ke mitoho ke ntak efibe, enye anam ñwan oro edi esin efibe, ndien owo ekededi emi ọdọde ñwan emi esiode ndọ, enye ñko esin efibe.

33 Mbufo ema ekop ñko nte ekedọhọde mbio eyo oko ete, ekubiat uyo eñwọñọ edi enam enọ Jihofa se ekeñwọñọde. 34 Edi Ami ndọhọ mbufo nte, ekuñwọñọ baba ñkpọ kiet, edide nditomo ikpa enyọñ, koro oro edide ebiet ebekpo Ubọñ Abasi; 35 mme edide ikpa isọñ, koro emi edide udoriukot Esie, mme edide Jerusalem, koro emi edide akwa obio akwa Edidem. 36 Kunyuñ utomo ibuot fo, koro afo mukemeke ndinam idet ibuot fo kiet akabade edi afia mme obubit. 37 Edi, eyak ikọ mbufo edi Ih mme Ih Ih koro se ibede oro oto andidiọk.

38 Mbufo ema ekop ekedọhọde ete, Enyin ke enyin, ye edet ke edet. 39 Edi Ami ndọhọ mbufo nte, ekuñwana ye anam idiọk. Edi owo ekededi ama amia fi ke mfuk nnasia, wọñọde mfuk eken nọ enye ñko: 40 Ndien edieke owo oyomde ndikot fi ikpe mbọ ọfọñ eñyọñ idem fo, yak akwa ewura fo nọ enye ñko. 41 Ndien owo ekededi emi edinyikde fi asaña itiat kiet ye enye, saña iba ye enye. 42 Nọ enyemi ebeñede fi, kuñyuñ usin ndibuọt enyemi oyomde ebuọt oto fi.

43 Mbufo ema ekop ekedọhọde ete, ema mbọhọiduñ mbufo, enyuñ esua owo usua mbufo. 44 Edi Ami ndọhọ mbufo nte, ema mme asua mbufo, enyuñ ebọñ akam ebaña mmọ emi ekọbọde mbufo, 45 man mbufo edi nditọ emi Ete mbufo odude ke enyọñ. Enye anam utin Esie asiaha ọnọ ndiọi owo ye nti owo, onyuñ anam edim edep ọnọ ndinen owo ye mmọ emi minenke. 46 Koro edieke mbufo emade kpa mmọ emi emade mbufo, nso utib ke mbufo enyene? Nte idem mme anam idiọk inamke kpasuk ntre? 47 Ndien edieke mbufo ekọmde nditọ ete mbufo ikpọñ ikpọñ mbufo enam nso ekan mme mmọ efen? Nte idem mme mmọ emi midighe Ju inamke kpasuk ntre? 48 Mbufo ndien enyene ndifọn mma, kpa nte Ete mbufo ke enyọñ ọfọnde ama."