1 Ekem mme Farisi ye mme andikpep mme Ju, eto ke Jerusalem edisobo ye Jisọs, enyuñ ebup Enye ete,

2 "Nso inam mme mbet Fo ebiatde ido eset mme Ju? Ke emi mmọ miyetke ubọk ndien mmọ edia udia?" 3 Ndien Enye ama ọbọrọ mmọ ete, "Ndien nsidi ntak emi mbufo ebiatde mme ibet Abasi ke ntak ido emana mbufo? 4 Koro Abasi ọkọdọhọde ete, ‘Kpono usọ ye uka,’ ndien owo ekededi emi osuñide ete mme eka esie enyene ndiwot enye. 5 Edi mbufo edọhọ ete, Edieke owo kiet ekededi ọdọhọde ete mme eka esie ete, ami mmayak se ñkpadade ññwam fi nnọ Abasi, 6 ebọ enye ubiọñ ediñwam ete ye eka esie. Ke usuñ emi mbufo emebiat mme ibet Abasi oto ke mme ido ukpono mbufo." 7 Mbufo mbon mbubik! Ekedi mbufo ke Aisaya eketiñ abaña ke ini enye akasiakde Uduak Abasi, ete. 8 " ‘Mmọ emi ekpono Mi ke ñkpọkinua, edi esit mmọ ọkpọñ Mi anyan ebiet. 9 Edi ke ikpuikpu ke mmọ ekpono Mi, sia mmọ ekpepde mme ibet ubọk owo.’ "

10 Ndien Enye ama okot otu owo onyuñ ọdọhọ mmọ ete "Ekpañ utọñ enyuñ efiọk se ọwọrọde. 11 Idighe se idukde owo ke inua asabade owo, edi se iwọrọde owo ke inua asabade owo."

12 Ekem mme mbet Esie edidọhọ Enye ete, "Nte Afo ọmọfiọk ete ke mme Farisi eyat esit ke ini mmọ ekekopde mme ikọ emi?"

13 Enye ama ọbọrọ ete, "Eyewubede kpukpru mme eto emi midighe Ete Mi ọtọ. 14 Ekpọñ mmọ; mmọ edi mme nnan emi etemede owo usuñ. Edieke nnan adade nnan usuñ, kpukpru mmọ eyeduọñọ edọñọ ke obube."

15 Ndien Pita ọdọhọ Enye ete, "Yarade ñke emi nọ ñnyin." 16 Ndien Jisọs obup mmọ ete, "Nte mbufo ñko idiọñọke ñkpọ kaña? 17 Nte mbufo ikwe ite ke ñkpọ ekededi emi odukde owo inua ebe oduk idibi, ndien esio eduọk ke ufọk ekwe? 18 Edi mme ñkpọ emi ewọñọde owo ke inua, eto ke esit, edi mmọ emi esabade owo. 19 Koro mme ndiọi ekikere eto ke esit ewọñọ, uwot owo, efibe, use, inọ, ntiense nsu, ye edisabade owo. 20 Kpukpru mme ñkpọ emi edi se isabarede owo. Edi edidia udia ye ubọk emi owo miyetke isabakede owo."

21 Ekem Jisọs ama adahado aka ke ñkañ Taya ye Sidọn.

22 Eyen añwan emi okotode Kenan, emi okoduñde ekpere do ama asaña etiene Enye, onyuñ ofiori ete, "Tua mi mbọm, Ọbọñ, Eyen Edidem Defid! Idiọk spirit kọtuhọde eyen mi añwan ke ata idiọk usuñ."

23 Edi Jisọs ikosioroke uyo. Ndien mme mbet Esie ema ekpe Enye ubọk ete, "Sio enye unyọñ, koro enye kosio ñkpo etiene ñnyin."

24 Do ke Jisọs ọkọbọrọ mmọ ete, "Ekedọñ Mi enọ mme erọñ ufọk Isrel emi esopde ikpọñ ikpọñ."

25 Edi eyen añwan emi ama asaña edi, editọñọ erọñ ke iso Jisọs, onyuñ ebeñe ete, "Ọbọñ, ñwam mi."

26 Jisọs ama ọbọrọ ete, "lnenke ndimen uyo nditọ ntop nnọ mme ebua."

27 Ñwan oro ama ọbọrọ ete, "Edi ntre Ọbọñ mi, edi mme ebua ekeme nditañ mme mbeñe udia emi eduọñọde eto enyọñ okpokoro udia ete mmọ."

28 Ndien Jisọs ama ọbọrọ enye ete, "O, eyen añwan, mbuọtidem fo omokpon, yak osu ọnọ fi nte afo oyomde." Ndien eyen esie añwan ama okop nsọñidem kpasuk ke ndo ndo oro.

29 Jisọs ama adaha ọkpọñ do aka mben akpa Kalili, onyuñ ọkọdọk obot ọsuhọde etetie. 30 Akwa otu owo ema emen mme mbuñọ ye mme nnan, ye mme ñkpoho, ye mme imum ye ediwak mbon udọñọ enyuñ ekenim Jisọs ke iso, ndien Enye ama anam udọñọ okure mmọ. 31 Idem ama akpa otu owo oro kadaña emi mmọ ekekutde nte imum etiñde ikọ, mme mbuñọ eneñerede esaña, mme nnan ekut usuñ, ndien mmọ etoro Abasi Isrel.

32 Ndien Jisọs okot mme mbet Esie ete edi, onyuñ ọdọhọ mmọ ete, "Ami mmokop otu owo emi mbọm, kemi mmọ ema ekedu ye Ami usen ita idaha emi ndien mmọ inyeneke se ediade. Ami ñkpamaha ndinam mmọ enyọñọ idibi ukpọk man mmọ edikikpaña mba ọbiọñ ke usuñ."

33 Mbet Esie ema ebọrọ Enye ete, "Mmọñ ke ñnyin idinyene udia emi edikemde kpukpru ibat owo emi ndidia ke ebiet emi asatde ntem?"

34 Jisọs ama obup mmọ ete, "Eboho uyo ifañ ke mbufo enyene?" Ndien mmọ ema ebọrọ Enye ete, "Eboho uyo itiaba ye ibad ibad ñkpri iyak ifañ."

35 Ndien Jisọs ama ọdọhọ ofuri otu owo etetie ke isọñ. 36 Ndien Enye emen eboho uyo itiaba ye iyak onyuñ ọnọ Abasi ekọm kabaña mmọ; ndien obuñ onyuñ ọnọ mbet Esie, ndien mmọ emen edeme enọ otu owo. 37 Kpukpru owo ema eta tutu mmọ eyuhọ, mme mbet enyuñ etañ ñkeñe emi ọkọsuhọde, eyọhọ akpasa itiaba. 38 Mmọ emi eketade uyo emi ekedi tọsin owo inañ, ke esiode iban ye nditọ ọwọñ efep.

39 Ke ini Enye ama akanam mme otu owo enyọñọ, Enye ama oduk ke ubom onyuñ ebe edi ke ñkañ obio Makadan.