1 Ekem Edisana Spirit ada Jisọs usuñ aka ke isọñ utatan (Wildanes) man Setan okodomo Enye. 2 Ke Enye ama eketre udia ke uwemeyo aba ye ke okoneyo aba, biọñ ama ọdọñ Enye. 3 Setan ama edi ebine Enye, onyuñ ọdọhọ Enye ete, "Edieke Afo edide Eyen Abasi, nam mme itiat emi ekabade edi uyo."

4 Jisọs ama ọbọrọ enye ete, ewet ete, "Owo ididuhọ uwem ito ke uyo ikpọñ, edi oto ke kpukpru ikọ emi ọwọrọde Abasi ke inua."

5 Ekem Setan ada Enye aka ke edisana obio, onyuñ anam Enye ọdọk ada ke ñkoñkoñ ebiet ke itie Ukpono Abasi (Temple), 6 ndien ama ọdọhọ Enye ete, "Edieke Afo edide Eyen Abasi, frọ duọ ke isọñ," koro ema ewet ete, "Abasi eyewuk mme enjel Esie ebaña Fi, ndien mmọ eyekpobi Fi ke ubọk mmọ, man Afo udutuak ukot Fo ke itiat."

7 Jisọs ama ọbọrọ enye ete, "Ema ewet ñko ete, ‘Kudomo Ọbọñ Abasi fo.’ "

8 Setan ama ọtọñọ ntak ada Enye ọdọk aka ke enyọñ ñkoñkoñ obot, onyuñ owut Enye kpukpru mme obio ererimbot ye ubọñ mmọ. 9 Ndien ọdọhọ Enye ete, kpukpru emi ke ami ndinọ fi, edieke Afo ọtọñọde edọñ onyuñ atuak ibuot ọnọ mi.

10 Do ke Jisọs ọkọdọhọ enye ete, "Daha Mi ke iso Setan! Koro ema ewet ete, afo enyene ndituak ibuot nnọ Ọbọñ Abasi fo, ñnyuñ nnam ñkpọ nnọ Enye ikpọñikpọñ."

11 Ekem Setan ama adaha ọkpọñ Enye; ndien mme enjel ema edise ñkpọ ebaña Enye.

12 Ndien ke ini Jisọs okokopde ete ke ema ekọbi Jọn, Enye ama ebe aka Kalili. 13 Ke Enye ama ọkọkpọñ Nasaret, Enye ama okoduñ ke Kapanọm, emi okodude ke mben ñkpọdiọhọ mmọñ emi okodude ke ñkanñkuk Sebulọn ye Naftali. 14 Emi eketibe man se Asiak Uduak Abasi Aisaya eketiñde osu,

15 "Isọñ Sebulọn ye eke Naftali emi edade ke usuñ emi esañade eka akwa akpa, onyuñ adade ke edem eken, Kalili mme mmọ emi midighe mme Ju!

16 Mbio oro etiede ke ekim, ekut akwa uñwana; ndien mmọ eken emi eduọñọde ke isọñ mfut ñkpa, uñwana asiaha ọnọ mmọ."

17 Ọtọñọde ke ini oro; Jisọs ama ọtọñọ ndikwọrọ etop Esie ete, "Mbufo ekabade esit koro Obio Ubọñ Abasi ekpere."

18 Nte Jisọs akasañade ke mben ñkpọdiọhọ mmọñ Kalili. Enye ama okut nditọ eka iba, emi ekedide mme ọkọiyak, Saimọn (emi ekekotde Pita) ye eyen eka esie Andru nte ekọde iyak ke ñkpọdiọhọ mmọñ oro.

19 Ndien Enye ama ọdọhọ mmọ ete, "Edi etiene Mi, ndien Ami ñyekpep mbufo nte ekọde owo." 20 Ndien ke ndo ndo oro mmọ ema ekpọñ mme iyire mmọ enyuñ etiene Enye.

21 Nte Enye asañade aka iso, Enye ama okut nditọ eka iba efen, Jems eyen Sebidi, ye Jọn eyeneka esie, ke ubom ye ete mmọ Sebidi, ke ediọñ iyire mmọ, ndien enye okot mmọ, 22 inikiet inikiet mmọ ema ekpọñ ubom, ekpọñ ete mmọ, enyuñ etiene Jisọs.

23 Jisọs ama asaña ke ofuri Kalili ekpep ñkpọ ke mme itie ukpepñkpọ mmọ, onyuñ ọkwọrọ Eti Mbuk Obio Ubọñ Abasi, onyuñ ọkọk kpukpru oruk udọñọ ye kpukpru oruk ubiak ke otu mbio obio oro. 24 Ntre ke etop Esie akasuana ke ofuri Siria, ndien mmọ ema eda kpukpru mbon udọñọ mmọ, emi mme nsio nsio udọñọ ye ndutuhọ ekesimde; ye mmọ emi ekenyuñ enyenede mme ndedehe spirit ke idem, ye mmọ emi ekeduọde mbukpi ye akpaubeñ; ndien Enye ọkọk mmọ. 25 Ndien ata ediwak otu owo ema eto ke mme ikpọ obio duop, ye Jerusalem, Judia, ye mme obio ke edem inyañ Jọdan eken etiene Enye.