1 Ekem Jisọs ama ọdọhọ mme otu owo ye mme mbet Esie ete, 2 "Mme andikpep ibet ye mme Farisi etie ke ifum Moses. 3 Ke ntem mbufo enyene ndisuk ibuot nnọ mmọ ñnyuñ nnam kpukpru se mmọ etiñde enọ mbufo, edi ekunam se mmọ enamde, koro mmọ misinke ke edinam se mmọ ekwọrọde. 4 Mmọ ebọp ndodobi mbiomo edori mme owo ke afara, edi mmọ ke idem mmọ ibeñeke idem ndibiom ndomokiet."

5 "Edi mmọ enam kpukpru utom mmọ man enyin mme owo ekut. Mmọ enam ekpat udim ikọ Abasi emi mmọ ebọpde ke ekoiso ye ke afara okpon, enyuñ eyiri ñnyan mmanima ke isọñ ewura mmọ. 6 Enyuñ ema itie ukpono ke itie usọrọ ye mme akpan itie ke mme ufọk ukpepñkpọ mme Ju. 7 Mmọ ema ekọm mmọ ke añwa urua, eyom mme owo ekot mmọ mme andikpep. 8 Edi inaha ekot mbufo ‘Andikpep’ koro mbufo enyenede Andikpep kiet, ndien mbufo edi nditọ ete. 9 Ndien ekukot owo ndomokiet ‘ete,’ ke isọñ, koro mbufo enyenede Ete kiet emi odude ke enyọñ. 10 Ekunyuñ eyak ekot mbufo mme mbuot, koro ibuot mbufo edide kiet kpa Kraist ikpọñ ikpọñ,

11 Enye emi okponde akan ke otu mbufo enyene ndidi anam ñkpọ nnọ mbufo eken. 12 Koro owo emi edimenerede idem esie eyesuhọrede enye, ndien owo emi edisuhọrede idem esie, eyemenerede enye ke enyọñ."

13 "Edi ọdọdiọk ọnọ mbufo mme andikpep mme Ju ye mme Farisi mbon mbubik, koro mbufo eberide usuñ Obio Ubọñ Abasi ebaha mme owo. Mbufo ke idem mbufo idukke, inyuñ iyakke mmọ emi eyomde ndiduk eduk. 14 Ọdọdiọk ọnọ mbufo mme andikpep ibet ye mme Farisi! Mbufo mbon mbubik! Mbufo eduk ebume ufọk mme ebekpa, ndien ke nditaña ase, mbufo ebọñ ñnyan akam. Ke ntak emi ufen mbufo eyedobi eti eti." 15 Ọdọdiọk ọnọ mbufo mme ekpep ibet ye mme Farisi, mbon mbubik, koro mbufo ekañade inyañ ye obot ke ndinam owo kiet akabade esit etiene mbufo, ndien ke enye amakabade edi kiet ke otu mbufo, mbufo enam enye odot ndika ikañ ndutuhọ utim ikaba akan nte mbufo edide.

16 Ọdọdiọk ọnọ mbufo mme nnan ada owo usuñ, ke emi edọhọde ete ke owo otomo itie ukpono inamke enye ñkpọ; edi owo ekededi emi otomode gold emi odude ke itie ukpono, uñwọñọ omum enye. 17 Mbufo mme nnan ndisime, ewe okpon akan, gold mme itie ukpono emi anamde gold edi edisana? 18 Mbufo enyuñ edọhọ ete ke owo ada uñwọñọ ke enyiñ itie uwa ke ñkpọ iduhọ; edi owo ekededi emi adade uñwọñọ ke enọ emi anade ke itie uwa, uñwọñọ oro omum enye. 19 Mbufo mme nnan, ewe okpon akan, enọ itie uwa mme itie uwa, emi anamde enọ edi edisana? 20 Ke ntre, enyemi ọñwọñọde ke enyiñ itie uwa, ọñwọñọ ke enyiñ itie uwa ye kpukpru mme ñkpọ emi ebonode ke esit. 21 Ndien enyemi ọñwọñọde uñwọñọ ke enyiñ itie ukpono, ọñwọñọ ke enyiñ itie ukpono ye ke enyiñ enyemi oduñde ke itie ukpono. 22 Ndien enyemi ọñwọñọde ke ikpaenyọñ ọñwọñọ ke enyiñ ebekpo Abasi ye ke enyiñ Enyemi etiede ke esit.

23 "Ọdọdiọk ọnọ mbufo mme andikpep ibet ye mme Farisi, mbufo mbon mbubik, koro mbufo ekpede ubak kiet ke mbak duop ke mme ikọñ ikọt iñwañ mbufo, ye mme mfri iñwañ eken edi efumi mme idem akpan ñkpọ ke ibet nte, edikpe unen, mbọm, ye edinam akpanikọ. Akpana enam mme ukperedem ñkpọ emi, ekunyuñ efumi mme akpa oro ñko. 24 Mme nnan ada usuñ! Mbufo eduhọde nsuñ ke ediñwọñ ñkpọ mbufo esio, ndien emen enañ emi ekotde Kamel esin ke idibi."

25 "Ọdọdiọk ọnọ mbufo mme andikpep ibet ye mme Farisi, mbon mbubik, koro mbufo eyetde edem ọkọb ye edem usan asana edi ke esit mmọ eyọhọ ye ñwo ye unana mfat ke idem. 26 Mbufo nnan Farisi! Ebem iso eyet esit ọkọb ndien ofuri edem ọkọb eyesana."

27 "Ọdọdiọk ọnọ mbufo mme andikpep ibet ye mme Farisi, mbon mbubik, koro mbufo ebietde mme udi emi eyetde afia ñkpọ ke enyọñ esie emi anamde enye eye, edi ke esit esie edi okpo mme akpaña ñkpa ye mme ndedehe ñkpọ eyọhọ. 28 Ntre ñko, mbufo etie nte nti owo ke enyin mme owo, edi ke esit mbufo edi mbubik ye oburobut ido eyọhọ."

29 "Ọdọdiọk ọnọ mbufo mme andikpep ibet ye mme Farisi, mbon mbubik, koro mbufo ebotde udi mme Asiak Uduak Abasi, enyuñ enamde udi ndinen owo eye.

30 Ndien edọhọ ete, ‘edieke ñnyin ikpekodude ke eyo mme ete ñnyin, ñnyin ikpebuanake ye mmọ ke ndiduọk iyip mme isuñutom Abasi.’

31 Ke ntem mbufo etie ntiense ebaña idem mbufo nte, ke mmimọ idi nditọ mmọ emi ekewotde mme isuñutom Abasi. 32 Ọfọn ama, mbufo enam ndien udomo idiọkñkpọ mme ete ete mbufo ọyọhọ, ke edinam se mmọ eketọñọde okure!" 33 "Mbufo mme urukikọt, ye nditọ ibọm, didie ke mbufo edibọhọ utib ikpe itie ndutuhọ?

34 Sese Ami ke ini Mi, mmọdọñ mme Asiak Uduak Abasi ye mme ọfiọkñkpọ owo, ye mme andikpep nnọ mbufo. Mbufo eyewot ndusuk mmọ, enyuñ ekọñ mmọ ke Krọs, ndusuk mmọ mbufo eyemia ke itie ukpepñkpọ mbufo, eyenyuñ ekọbọ enyuñ ebine mmọ ke obio ke obio. 35 Man ofuri iyip ndinen owo emi ekeduọkde ke isọñ ọtọñọde ke iyip edinen Ebel, tutu osim iyip Sakaraya eyen Barakia, emi mbufo ekewotde ke ufọt itie ukpono ye itie uwa, ọsọp mbufo. 36 Akpanikọ ke ntiñ nnọ mbufo, ufen kpukpru mme ñkpọ emi eyetiene emana emi."

37 "O Jerusalem, Jerusalem, afo emi owotde mme oku onyuñ ọtọñọ kpukpru mmọ emi Abasi ọkọdọñde ọnọ fi ke itiat. Ikafañ ke Ami ñkatat ubọk Mi ndifuk kpukpru ikọt fo, kpa nte eka unen obokde nditọ esie ke idak mba esie, edi mbufo iyakke Mi nnam ntre? 38 Ndien idahaemi eyak ufọk mbufo enọ ke ñwure. 39 Koro ndọhọ mbufo nte, mbufo idikwe Mi aba, tutu mbufo edọhọ ete, ‘ọfọfọn ọnọ Enye emi edide ke enyiñ Ọbọñ.’ "