1 Ekpeme! Ekunam edinen ido mbufo ke iso mme owo man mmọ ekut. Ke enamde ntre, mbufo idinyeneke utib ito Ete mbufo emi odude ke enyọñ. 2 Mmọdo ke ini afo ọnọde mme ubuene ñkpọ, kutaña ase nte mme mbon mbubik enamde ke mme ebiet ntuak ibuot mme Ju, ye ke mme efak, man mme owo etoro mmimọ. Ke akpanikọ ke ndọhọ mbufo, nte ke mmọ ebebọ utib mmọ. 3 Edi ke ini efọnde ido ye owo, enam edi ke ndibe, ekuyak ubọk ufien mbufo ọfiọk se nnasia anamde, 4 man mfọnido mbufo edi ke ndibe; ndien Ete mbufo emi okutde ke ndibe eyenọ mbufo utib.

5 Ndien ke ini mbufo ebọñde akam, ekutie nte mme mbubik, koro mmọ emade ndida ke mme itie ntuak ibuot mme Ju (Sinakọk), ye ke mme ituñ efak mbọñ akam, man mme owo ekut mmọ. Ke akpanikọ ke ndọhọ mbufo nte, mmọ ebebọ utib mmọ. 6 Edi afo, kini afo ọbọñde akam, duk ke ubet fo nyuñ beri usuñ, bọñ akam nọ Ete fo emi odude ke ndibe, ndien Ete fo emi okutde ke ndibe, eyenọ fi utib.

7 Ndien ke ebọñde akam ekutiñ mme uwak ikpuikpu ikọ nte mme anam idiọk enamde, koro mmọ ekerede ete ke edikop akam mmimọ ito ke uwak ikọ mmọ. 8 Mmọdo ekubiet mmọ, koro Ete mbufo ọfọfiọk mme ñkpọ emi ananade mbufo mbemiso mbufo ebebeñe Enye.

9 "Ebọñ akam ndien ntem ete, Ete ñnyin emi odude ke enyọñ, yak ikpono Enyiñ Fo: 10 Yak Obio Ubọñ Fo edi, yak inam uduak Fo ke isọñ, nte emi enamde ke enyọñ; 11 Nọ ñnyin udia emi ekemde ñnyin ke usen mfin. 12 Ñnyuñ dahado nọ ñnyin ke kpukpru mme idiọkñkpọ ñnyin kpa nte emi ñnyin idahadedo inọ mmọ emi enamde ñnyin idiọkñkpọ; 13 Kuda ñnyin usin ke idomo, edi sio ñnyin ke ubọk andidiọk, koro ubọñ ye odudu, ye ukpono enyenede Fi, ke nsinsi nsinsi." 14 Edieke mbufo edaharedo enọ mmọ emi eduede mbufo, Ete mbufo ke enyọñ eyenyuñ adahado ọnọ mbufo ñko. 15 Edi mbufo mifenke inọ mme owo ke ndudue mmọ, Ete mbufo idinyuñ ifenke inọ mbufo.

16 Ndien ke ini mbufo etrede udia, ekutie mfuhọ mfuhọ nte mme mbio mbubik. Mmọ ebiat iso mmọ, man mme owo ekut ete ke mmọ etre udia. Ke akpanikọ ke ndọhọ mbufo nte, mmọ ebebọ utib mmọ. 17 Edi ke ini mbufo etrede udia, eyet iso mbufo enyuñ esari idet mbufo, 18 man mmọ efen edidiọñọ ete ke mbufo etre udia, ke mibọhọke Ete mbufo emi ọfiọkde kpukpru ndibe ñkpọ. Ndien Enye eyenọ mbufo utib.

19 Ekubon mme ñkpọuto enọ idem mbufo ke isọñ, ke ebiet emi ñkakat ye ñkarafañ edibiatde, ndien mme inọ ñko ebuñ eduk enyuñ eyip. 20 Edi enim inyene enọ idem mbufo ke enyọñ, ebiet emi ñkakat ye ñkarafañ miditaha, mme inọ ñko midibuñke iduk iyip. 21 Koro ebiet emi inyene mbufo odude, do ñko ke esit mbufo enyene ndidu.

22 Enyin edi utueneikañ ikpọkidem, mmọdo edieke enyin fo ọfọnde, ofuri ikpọkidem fo eyeyọhọ ye uñwana. 23 Edi, edieke enyin fo okimde ke ntak idiọk ekikere esit ye udọñitọñ ñkpọ ererimbot emi, afo etim odu ke ata ọkpọsọñ ekim ke spirit. Edieke uñwana emi odude fi ke idem odukde ekim, ekim oro okpon didie!

24 Baba owo kiet ikemeke ndinam utom nnọ eteufọk iba, koro enye eyesua kiet, onyuñ ama enye eken; enye eyesuk ibuot ọnọ kiet ndien ofumi enye eken.

25 Mmọdo Ami ndọhọ mbufo nte, ekuyak ekikere etimede mbufo ke ntak uwem mbufo, ke se mbufo edidiade, mme se mbufo ediñwọñde, mme ke ntak ikpọkidem mbufo, se mbufo edisinede. Nte uwem ifọnke ikan udia, ikpọkidem ñko ikanke edisine ñkpọ? 26 Ese mme inuen enyọñ; mmọ itọhọtọ inyuñ idọkkedọk, inyuñ itañke ibon ke ubet ubon udia, edi Ete mbufo emi odude ke enyọñ kọnọnọ mmọ udia. Nte mbufo isọñke urua ikan mme inuen enyọñ emi? 27 Anie ke otu mbufo ke editimede esit ekeme ndidian usen kiet ke mme isua uwem esie?

28 "Ndien nso idi ntak emi mbufo ekerede ebaña ọfọñidem? Ese nte mme ekpoñidim ke iñwañ ekọride, mmọ ibọhọ ufen ndifiak ndidi. 29 Edi Ami ndọhọ mbufo nte, idem Sọlọmọn ke ofuri ubọñ esie ikesineke se iyede nte kiet ke otu mme ekpoñidim emi. 30 Edieke Abasi esinede mbiet iñwañ edisine ñkpọ ntre, mbiet emi odude mfin, ndien ñkpọñ emen esin ke usañ uyo, nte Enye idisineke mbufo se ikande oro, O mbufo mbon ekpri mbuọtidem?

31 Ndien ekuyak esit etimede mbufo ebup ete, ‘Nso ke ñnyin ididia?’ mme ‘Nso ke ñnyin idiñwọñ?’ mme ‘Nso ke ñnyin idisine?’ 32 Koro mme mmọ emi midighe Ju efeñede mfeñe kabaña mme ñkpọ emi, edi Ete mbufo ke enyọñ ọfiọk ete ke mbufo emenana kpukpru mme ñkpọ emi. 33 Edi mbufo ebem iso eyom Obio Ubọñ Abasi ye edinen ido Esie, ndien eyedian kpukpru mme ñkpọ emi enọ mbufo.

34 Ntem ekuyak ekikere etimede mbufo abaña ñkpọñ, koro ñkpọñ eyekere abaña idem esie. Mme mfina eke usen ekem ye usen."