1 तेखअ च़कअ हुंह परमेशरे आत्मां उझै संघा निंयं हुंह बिधाते भबने पुर्बा बाखा प्रऊल़ी सेटा। तिधी शुझुऐ मुखा प्रऊल़ी नेल़ पच्‍ची मणछ, तिन्‍नां जैंदरी तै अजूरो शोहरू जजनिया, बेनियाहो शोहरू पलती। ईंयां दूई तै लोगे सैणैं।

2 तेखअ बोलअ बिधाता मुल्है इहअ, "मणछा, ईंयां ई दूई सोठा बूरअ करनअ अर एरुशलेम नगरी लै बूरी सलाह बी दैआ ईंयां ई दूई। 3 ईंयां बोला इहअ, ‘हाम्हां जाणअ तेतरी छ़ेक्‍कै आपणैं घअरा च़िणदै लागी। हाम्हैं रहणैं ऐहा नगरी हांढै भितरी शिखा ज़िहै राज्ज़ी-राम्बल़ै।’ 4 तैही बोला हुंह ताल्है कि मणछा, ऐबै दै मेरअ समाद खोज़ी इना लै चतैनगी।"

5 बिधाते आत्मां किअ हुंह पठ आपणैं बशै संघा बोलअ मुल्है कि इना लोगा का खोज़ इहअ समाद, "इज़राईलीओ, मुखा आसा सोभी गल्‍लो थोघ कि तम्हैं किज़ै सोठा अर किज़ै बोला। 6 तम्हैं हेरै ऐहा नगरी खास्सै मणछ मारी अर तिन्‍नें ल्हासा करै आसा नगरीए बाता भर्हुई दी।

7 "ऐबै बोला हुंह थारअ परमेशर बिधाता तम्हां लै इहअ, ‘अह गल्‍ल ता आसा शुची कि अह नगरी आसा हांडै ज़ेही, पर शिखा किज़ै आसा? शिखा आसा तिन्‍नां लोगे ल्हासा ज़ुंण तम्हैं मारै! पर तम्हैं शोटणै मुंह ऐहा का दूर! 8 तम्हां हआ तलबारा का डअर लागी दी! मुंह छ़ाडणीं तम्हां लै तलबारा करै मारदी सैना। अह गल्‍ल डाही मंऐं बिधाता बोली। 9 तम्हैं काढणैं मुंह ऐहा नगरी का पोर्ही संघा सभाल़णैं परदेसी दुशमणा का। मुंह दैणीं तिन्‍नां करै तम्हां लै सज़ा। 10 तम्हैं पाणै थारै आपणैं इज़राईल मुल्खै जुधा दी तलबारा करै मारी। तेखअ लागणअ सोभी का थोघ कि हुंह आसा बिधाता। 11 ज़ेऊ साबै हांडै दी शिखा आगी का बच़ा, तिहै निं तम्हैं ऐहा नगरी राज्ज़ी-राम्बल़ै बच़णैं। तम्हैं इज़राईल मुल्खे सिऊंआं भितरी ज़िधी बी होए, मुंह दैणीं तम्हां लै तिधी सज़ा। 12 तेखअ लागणअ तम्हां का थोघ कि हुंह आसा बिधाता। तम्हैं निं मेरै बधान अर बिधीए साबै ज़िन्दगी ज़िऊई। तम्हैं रहै आप्पू फेर होरी देशे रिती-रबाज़े साबै ज़िन्दगी ज़िऊंदै लागी।’"

13 हुंह त बिधाते समादा खोज़दअ लागअ द, बेनियाहो शोहरू पलती मूंअ। हुंह पल़अ तिधी धरनीं उटी बाखा संघा बोलअ ज़ोरै इहअ, "नांईं परमेशर बिधाता! इहअ निं करै! ऐबै तंऐं तिंयां बी सोभै लाऐ मारी ज़ुंण इज़राईला दी ज़िऊंदै आसा बच़ै दै?"

14 बिधाता बोलअ मुल्है इहअ, 15 "मणछा, एरुशलेम बस्सै दै इज़राईली हआ तेरै अर गलामी दी डेऊऐ दै होरी सोभी इज़राईलीए बारै बोल्दै लागै दै। तिंयां बोला, ‘ईंयां लोग डेऊऐ बिधाता का खास्सै दूर। ऐबै आसा अह सारअ देश म्हारअ ज़ुंण इधी आसा बस्सै दै, हाम्हां करनअ एथ कबज़अ।’

16 "ऐबै खोज़ तिन्‍नां का ज़ुंण गलामी दी आसा कि हुंह तिन्‍नों परमेशर बिधाता बोला इहअ, ‘सह आसा हुंह ज़ुंणी तम्हैं थारै आपणैं देशा का काढी दूर देशै-देशै छिंगै। तज़ी बी रहणअ हुंह तेऊ देशै तम्हां संघै ज़िधा लै तम्हैं डेऊऐ दै आसा।’

17 "तैही बोलै तूह तिन्‍नां लै, ‘थारअ परमेशर बिधाता बोला तम्हां लै, "मुंह आणनैं तम्हैं तिन्‍नां देशा-देशा जैंदरा का झाल़ी। ज़ेथ देशै मंऐं तम्हैं छिंगै तै। तेता का काढणैं मुंह तम्हैं ओर्ही संघा दैणीं इज़राईल मुल्खे ज़ैगा तम्हां लै बापस।"’ 18 ज़ेभै तिंयां बापस पुजणैं, तेखअ काढणीं तिन्‍नां छ़ोतली मुहुर्ती पोर्ही अर आप्पू बी पाणीं तिन्‍नां च़िल़्हखरै कामां करने छ़ाड़। 19 तिन्‍नां लै दैणीं मुंह सुंबल़ी सोर अर सुंबल़ी बुध। तिन्‍नों पात्थरा ज़िहअ काठअ मन्‍न करनअ मुंह दूर, तिन्‍नां लै दैणीं मुंह समझ़ कि तिंयां ज़िहअ हुंह बोले तिहअ ई करे।✝ 20 तेखअ डाहणअ तिन्‍नां मेरअ बधान आद अर तिन्‍नां रहणअ मेरै सोभी हुकम मनणा लै शुचै-पाक्‍कै। तिंयां हणैं मेरी परज़ा अर हुंह हणअ तिन्‍नों परमेशर। 21 पर ज़ुंण मुहुर्ती अर च़िल़्हखरै कामां करने छ़ाड़ निं छ़ाडे, तिन्‍नां निं हुंह छ़ाडी गअ! ज़ुंण तिन्‍नैं किअ, मुंह लणी तिन्‍नां लै तेते सज़ा दैई।" अह गल्‍ल बोली परमेशर बिधाता।

22 ✝तिन्‍नैं फैंखा आल़ै ज़ीबै फुआरै डैअ दैणा लै आपणैं फैंख, तिंयां घरेट बी तै तिन्‍नां संघै। इज़राईले परमेशर बिधातो झ़ामण त तिन्‍नां प्रैंदै लागअ द। 23 हेरा-हेरी उझ़ुअ बिधातो झ़ामण नगरी मांझ़ा का उझै। मुखा शुझुअ सह झ़ामण लागअ तेखअ तैहा धारा ज़ुंण एरुशलेम नगरीए पुर्ब दिशा बाखा आसा। 24 तेखअ हुअ मुंह इहअ धैन कि हुंह च़कअ बिधाते आत्मां उझै संघा पजैल़अ हुंह बापस आपणैं गलामी दी डेऊऐ दै भाई-बंधा सेटा बाबेल देशै। तिधी मुक्‍कअ मेरअ सह धैन। 25 ज़ेतरी गल्‍ला बिधाता मुखा रहैऊई ती, तिंयां खोज़ी मंऐं तिधी आपणैं गलामी दी आऐ दै भाई-बंधा सेटा पठ।