1 बिधाता बोलअ मुल्है भिई इहअ, 2 "मणछा, तूह खोज़ इज़राईले राज़ै अर नेतै का मेरअ समाद। तूह लअ तिन्‍नां का खोज़ी कि हुंह परमेशर बिधाता बोला तिन्‍नां लै इहअ, ‘इज़राईले देशे फुआलो! तम्हां लै आसा घोर आफ़त! तम्हैं आसा सिधै आपणअ पेट भरदै लागै दै, आपणीं भेडे हेल़्हीओ निं तम्हां फिकर ई आथी कि तिन्‍नां लै बी लागा होए खाणां लै दैणअ। 3 मेरी इज़राईली परज़ा आसा थारी एही भेडा ज़सरअ तम्हैं दुध झुटा, ज़हा मुनी तम्हैं बधिया ऊने झिकल़ै बान्हां, हेल़्ही मांझ़ै काटा सोभी बधिया चैणैं शिखा लै। पर खाणां लै निं तम्हैं तिन्‍नें खाखा नाज़ो दाणअ बी दैंदै!✝ 4 तम्हैं निं दुबल़ी भेडा इहै धाचदै कि तिन्‍नां बी धख तनक एछे, नां रोगी भेडो लाज़ करदै कि सह बिज़रे! आपणीं भेडा दी पल़ै दै ज़खमा दी निं तम्हैं मल्हम बी लांदै! तम्हैं निं हेल़्ही का टल़ी दी भेडा बापस आणदै अर नां लुक्‍की दी भेडा लोल़ै डेऊंदै! तम्हैं तिन्‍नां प्रैंदै सिधअ ज़बरी राज़। 5 तिन्‍नां मेरी भेडो निं कोह फुआल आथी ज़ुंण तिन्‍नों धैन खैल डाहे! तैही छिंघुई तिंयां ओर्ही-पोर्ही अर तिंयां आणी बणें ज़ीबै पठ खाई छ़ेक्‍की।✝ 6 मेरी भेडे हेल़्ह आसा उझै धारा अर ज़ोता कबाता पेठी दी। तिंयां छिंघुई पृथूई दी ज़ैगै-ज़ैगै। तिन्‍नां भाल़अ निं कोह आथी अर नां कुंण तिन्‍नां लोल़अ डेऊंदअ।’

7 "ऐबै शूणां तम्हैं फुआल मेरअ समाद कि हुंह बिधाता तम्हां लै किज़ै बोला। 8 हुंह सदा ज़िऊंदअ परमेशर थारअ परमेशर बिधाता बोला इहअ कि मेरी भेडे हेल़्ही लै पल़ै बणें ज़ीब चुटी। तिन्‍नैं पाई तिंयां मारी करै खाई किल्हैकि तिंयां फुआल निं राम्बल़ै आथी तै। ज़ुंण मंऐं तिन्‍नां फुआल तै डाहै दै, तिंयां निं तिन्‍नां लोल़ै बी डेऊऐ। तिंयां करा तै मेरी भेडे हेल़्ही का भेडा काटी सिधी शिखा खाई। च़राऊंदै निं तिन्‍नां आथी तै।"

9 तम्हैं फुआल शूणां बिधातो समाद 10 परमेशर बिधाता बोला इहअ, "हुंह हुअ ऐबै इना फुआलो दुशमण। इना का छ़ड़ैऊंणी ऐबै मुंह आपणीं भेडा ओर्ही। ऐबै निं हुंह इना आपणीं भेडे हेल़्ही सभाल़दअ। ऐबै निं तिंयां मेरी भेडा का शिखा लै काटी खाई सकदै। मुंह बच़ाऊंणी आपणीं भेडा ताकि ईंयां फुआल तिन्‍नां खाए निं।"

11 परमेशर बिधाता बोला इहअ, "ऐबै डेऊणअ मुंह आपणीं भेडे हेल़्ही भाल़ै आप्पै, तिंयां आणनीं मुंह बापस लोल़ी।✝ 12 ज़ेभै कहा फुआले हेल़्ही का भेडा ओर्ही-पोर्ही टल़ा, सह फुआल डेओआ तिन्‍नां लुक्‍की दी भेडा लोल़अ। तेही ई आणनीं मुंह आपणीं भेडा तिन्‍नां ज़ैगा का लोल़ी ज़ेथ तिंयां काल़ै घणैं बादल़े धैल़ै नटिप्प न्हैरै कज़ेस्सी छिंघुई ती। 13 तिंयां काढणीं मुंह देशा-देशा जैंदरा का बापस, तिंयां झाल़णीं मुंह हर ज़ैगा का संघा पजैल़णीं तिंयां इज़राईल देशे धारा। तिंयां च़रनीं तेथ पाणींए गाडा नेल़ अर तिन्‍नां ज़ैगा ज़ेथ लोग आसा बस्सै दै। 14 मुंह च़राऊंणी तिंयां हरै घाहे घैहणीं दी। इज़राईल देशे उछ़टी धारा हणअ तिन्‍नां च़रना लै बतेर्हअ। तिधी रहणीं तिंयां हरै घाह जैंदरी सुत्ती अर तेथ भेटणअ तिन्‍नां लै रज्ज़ी घाह खाणां लै। 15 मेरी भेडे हेल़्हीओ फुआल हणअ हुंह आप्पै, तिंयां बशैल़णीं मुंह हरै घाहे घैहणीं नेल़। अह गल्‍ल डाही मंऐं परमेशर बिधाता बोली।✝

16 "ज़ुंण भेडा लुक्‍की दी आसा, मुंह डेऊणअ तिन्‍नां लोल़ै, ज़ुंण हेल़्ही का टल़ी दी आसा, तिंयां आणनीं मुंह बापस। ज़ुंण भेडा ज़खमी आसा हुई दी तेथ लाणअ मुंह मल्हम। दुबल़ी अर बमार भेडे करनी मुंह राम्बल़ी पल़ाई। पर आजू हांढणै आल़ी बडी भेडा ज़हा खास्सी च़र्बी अर ज़ोर आसा, तिंयां पाणीं मुंह काटी। किल्हैकि हुंह आसा सह फुआल ज़ुंण शुचअ नसाफ करा।

17 "ज़ुंण मेरी भेडा बाकरीए हेल़्ह आसा, तिन्‍नां लै बोला हुंह तिन्‍नों परमेशर बिधाता इहअ, ‘मुंह करनअ तम्हां सोभिओ नसाफ। मुंह करनी तम्हां मांझ़ै भली अर बूरी भेडा ज़ुदी-ज़ुदी। गाभू काढणैं मुंह बाकरै का ज़ुदै। 18 तम्हां मांझ़ै आसा एही भेडा बी ज़ुंण बधिया हरअ घाह खाई बी निं रज़दी, तम्हां का ज़ुंण च़रनै का छ़ुटा, तेऊ घाहा डाहा तम्हैं धरनीं मांडी! तम्हैं झुटा निम्बल़अ पाणीं अर ज़ुण तम्हैं नांईं झुटअ तेता डाहा तम्हैं पठ खादल़अ करी! 19 हेल़्हीए मेरी होरी भेडा लागा तम्हैं मांडअ द घाह खाणअ अर सह पाणीं झुटणअ ज़ुंण तम्हैं खादल़अ डाहअ करी!’

20 "तैही बोला हुंह थारअ परमेशर बिधाता तम्हां लै इहअ, ‘मुंह करनअ तम्हां मांझ़ै मोट्टी अर दुबल़ी भेडा मांझ़ै नसाफ। 21 तम्हैं मोट्टी अर ज़ोरा आल़ी भेडा काढा आपणैं शगैठा करै बाही अर होझा दैई-दैई करै दुबल़ी भेडा हेल़्ही का बागै संघा छिंघिआ तिंयां ओर्ही-पोर्ही। 22 ऐबै बच़ाऊंणी मुंह आपणीं भेडा। ऐबै निं हुंह बणें ज़ीबा तिन्‍नें हान्‍नी करनै दैंदअ। मुंह करनअ ऐबै हेल़्ही दी तिन्‍नां मांझ़ै हरेकीओ नसाफ। भली भेडा करनी मुंह बूरी भेडा का ज़ुदी। 23 तेखअ छ़ांटणअ मुंह तिन्‍नां लै एक फुआल ज़ुंण तिन्‍नां आजू-आजू हांढे। सह हणअ मेरै दास दाबेदा ज़िहअ, तेऊ डाहणअ तिन्‍नों राम्बल़अ धैन-खैल।✝ 24 हुंह बिधाता हणअ तिन्‍नों परमेशर अर तिन्‍नों राज़अ हणअ मेरै दास दाबेदा ज़िहअ। अह गल्‍ल डाही मंऐं बोली।✝ 25 मुंह करनीं तिन्‍नां संघै करार अर तेता करै हणअ तिन्‍नों मुंह संघै मेल़-ज़ोल़। तिन्‍नां खाणैं आल़ै बणें ज़ीब दरल़ाऊंणै मुंह तिन्‍नें देशा का दूर। तेखअ रहणीं राज्ज़ी-राम्बल़ी अर कराहणीं ज़ैगा बस्सणे बी निं तिन्‍नां किछ़ै डअर हणीं अर बणैं बी रहणीं निहंचै सुत्ती।

26 "‘मुंह दैणीं तिन्‍नां लै बर्गत अर तिन्‍नां दैणअ मुंह आपणीं पबित्र धारा फेर बस्सणै। तिधी करनअ मुंह तिन्‍नां लै ठीक बगती सरगा का पाणीं दैई अर तिन्‍नां लै हणीं सह बर्गत। 27 डाल़ा-बूटा दी लागणै राम्बल़ै फल़, खेचा का हणीं तिन्‍नें राम्बल़ी साल-फसल। तिंयां सोभै रहणैं आपणैं देशै निहंचै। तिन्‍नें कैल़ै पाअ द गलामीओ जूँ पाणअ मुंह चोल़ी अर तिंयां करनै मुंह तिन्‍नां का आज़ाद ज़ुंणीं तिंयां गलाम तै बणाऐं दै। तेखअ लागणअ तिन्‍नां का थोघ कि हुंह आसा बिधाता। 28 तेखअ निं तिन्‍नां होरी देशे किछ़ै डअर हणीं। नां तिंयां बणें ज़ीबा मारी खाणैं। तिंयां बस्सणै राज्ज़ी-राम्बल़ै अर तेखअ निं तिंयां कोही डरैऊंणै। 29 मुंह दैणी तिन्‍नां लै मशूर रज़दी-पज़दी ज़ैगा। तेखअ निं तैहा ज़ैगा तिन्‍नां लै नकाल़ पल़णअ। तेखअ नां होरी देशा तिन्‍नों सुहांग करनअ। 30 तेखअ लागणअ सोभी का थोघ कि इज़राईले फाज़त करा हुंह अर तिंयां आसा मेरी परज़ा। अह गल्‍ल डाही मंऐं परमेशर बिधाता बोली।

31 "‘तम्हैं आसा मेरी परज़ा, हुंह डाहा थारअ इहअ धैन-खैल ज़िहअ फुआल आपणीं भेडा-बाकरीए हेल़्ही भाल़ा। तम्हैं आसा मेरी परज़ा अर हुंह आसा थारअ परमेशर।’" इहअ बोलअ परमेशर बिधाता।