Juízes 11

जपताह पांच़

1 गलाद मुल्खै त जपताह नाओं एक शूरबीर मणछ। तेऊए बाबा नाअं त गलाद पर जपताहे ईज ती कंज़री। 2 गलादे आपणीं लाल़ी का बी थिऐ शोहरू हुऐ दै, ज़ांऊं तिंयां ज़ुआन हुऐ तिन्‍नैं काढअ त जपताह घअरा का इहअ बोली दरल़ाऊई, "ताल्है निं हाम्हैं म्हारै बाबे ज़ैदाता का हेस्सअ लाअ दैई किल्हैकि तूह आसा पराई बेटल़ी का हुअ द।"

3 जपताह डेऊअ आपणैं तिन्‍नां भाई का दूर ठुर्ही संघा लागअ तोब नगरी रहंदअ। तिधी पल़अ सह उपद्रभी लोगे संगती अर तिंयां रहा तै तेऊ संघै हांढदै-फिरदै लागी। 4 थोल़ै धैल़ै बाद छ़ेल़अ अमोनी इज़राईली संघै जुध। 5 ज़ांऊं इहअ हुअ, गलाद मुल्खै इज़राईली सैणैं डेऊऐ जपताह तोब नगरी का बापस आणदै। 6 तिन्‍नैं बोलअ जपताह लै, "तूह एछ, संघा बण हाम्हां प्रैंदै प्रधान ताकि हाम्हैं अमोनी संघै जुध करी सके।"

7 पर जपताहै बोलअ गलाद मुल्खे इज़राईली सैणैं लै इहअ, "तम्हैं डाही मुंह संघै ज़ीद अर ज़ोरा-ज़ोरी काढअ हुंह तम्हैं मेरै बाबे घअरा का दरल़ाऊई। ऐबै ज़ांऊं आफ़त पल़ी, तै ऐबै किल्है आऐ तम्हैं मुंह सेटा लै?" 8 तिन्‍नैं सैणैं बोलअ जपताह लै इहअ, "पर ऐबै च़ाहा हाम्हैं ताह बापस निंणअ, ज़ै तूह अमोनी संघै जुधा लै हाम्हां आजू डेओए, हाम्हां बणाणअं तूह सारै गलाद मुल्खो प्रधान।"

9 जपताहे पुछ़अ गलाद मुल्खे सैणैं का इहअ, "ज़ै तम्हैं हुंह अमोनी संघै जुधा करदअ घअरा लै बापस निंईं ई लाअ, तै आसा इहअ, ज़ै बिधाता मुल्है अमोनी का ज़ीत दैए, तै हणअ तम्हां प्रैंदै मेरअ राज़।"

10 इज़राईली सैणैं दैनअ इहअ ज़बाब, "हाम्हां करनअ ज़िहअ तूह बोला तिहअ ई, म्हारी ऐहा गल्‍लो शाजत आसा बिधाता आप्पै।"

11 तेखअ लागअ जपताह गलादे इज़राईली सैणैं संघै हांढदअ अर तिन्‍नैं बणाअं सह आप्पू प्रैंदै सैणअ अर सैनापति। जपताह किई ईंयां गल्‍ला मिज़पा नगरी बिधाता सेटा खोज़ी पाक्‍की। 12 तेखअ छ़ाडअ जपताह अमोनी राज़ै सेटा समाद लई एक दूत, "तेरअ मुंह संघै कै झ़गल़अ आसा? तंऐं किल्है छ़ेल़अ मेरै देशा संघै जुध?"

13 अमोनी राज़ै दैनअ जपताहे दूता इहअ समाद, "ज़धू इज़राईली मिसर देशा का निखल़ै, तधू आसा तिन्‍नैं अर्नोन गाडा ओर्ही ज़बोग गाडा अर जरदण दरैऊआ तैणीं मेरी ज़ैगा गिम्मी दी। हुंह आसा तेता लै आअ द। ज़ै तूह जुध निं च़ाहंदअ तै दै एता सुआंती करै बापस।"

14 जपताह छ़ाडअ अमोनी राज़ै सेटा भिई दूत इहअ ज़बाब दैई, 15 "हुंह जपताह बोला ताल्है इहअ कि इज़राईली निं मोआबी अर अमोनीए मुल्खे ज़ैगा गिम्मी आथी। 16 असली दी आसा इहअ हुअ द कि ज़धू इज़राईली मिसर देशा का निखल़ै, तिंयां डेऊऐ रेगीस्ताना बाती लाल समुंदरा तैणीं संघा पुजै तिधा का कादेश। 17 तेखअ दैनअ तिन्‍नैं एदोमे राज़ै सेटा आपणअ दूत छ़ाडी इहअ समाद, ‘हाम्हां दै आपणीं ज़ैगा बाती आजू डेऊणैं।’ पर एदोमे राज़ै निं तिन्‍नां आपणीं ज़ैगा बाती आजू डेऊणैं दैनअ। इहअ ई बोलअ तिन्‍नैं मोआब देशे राज़ै लै अर तेऊ बी निं आपणीं ज़ैगा बाती हाम्हां इज़राईली आजू डेऊणैं दैनअ। इहअ करै रहै इज़राईली कादेश ई।✝11:17 गण. 20:14

18 "तेखअ आऐ तिंयां एदोम अर मोआब देशे सिऊंआं बागी बाती फेरअ दैई संघा पुजै मोआब देशे पुर्बा बाखा अर्नोन गाडा आर बाखा संघा पाऐ इधी आपणैं डेरै अर तिंयां निं मोआब सिऊंआं भितरी डेऊऐ आथी किल्हैकि मोआब देशे सिअं ती अर्नोन गाडा तैणीं।✝11:18 गण. 21:4 19 तिधा का दैनअ इज़राईली आपणैं दूत छ़ाडी हेशबोन नगरीए अमोरी राज़ै सिहोना लै इहअ समाद, ‘हाम्हां दै तूह आपणैं देशा बाती आजू डेऊणैं।’✝11:19 गण. 21:21; बधा. 2:26

20 "पर राज़ै सिहोनै बी निं हाम्हां इज़राईली दी विश्वास किअ अर हाम्हां निं आपणीं ज़ैगा बाती आजू डेऊणैं दैनअ। तेऊ झाल़ी हाम्हां संघै जुधा करना लै आपणीं सारी सैना अर तिन्‍नैं पाऐ जहास नाओंए ज़ैगा डेरै संघा छ़ेल़अ इज़राईली संघै जुध। 21 पर इज़राईले परमेशर बिधाता दैनी इज़राईली लै राज़ै सिहोन अर तेऊए सारी सैना का ज़ीत। इहअ करै हुऐ इज़राईली तेऊ सारै मुल्खे मालक ज़ेथ अमोरी तै बस्सै दै। 22 मतलब दखणा बाखा अर्नोन गाडा पोर्ही उतरा बाखा ज़बोग तैणीं, पुर्बा बाखे रेगीस्ताना पोर्ही पछ़मा बाखा जरदण नदीए बाढा तैणीं सारै मुल्खे मालक ज़ेथ अमोरी थिऐ।

23 "सह थिअ इज़राईलो परमेशर बिधाता ज़ुंणीं अमोरी लोग तिन्‍नें देशा का आपणीं परज़ा इज़राईलीए तैणीं पोर्ही काढै। तूह कै सोठा कि ताह अह ज़ैगा बापस जाणीं भेटी? 24 तूह डाह तैहा ज़ैगा आपणअ हक ज़ुंण ताल्है तेरअ कुल़ज कमोश देअ ताल्है दैए। ज़ुंण ज़ैगा म्हारै परमेशर बिधाता हाम्हां लै आसा दैनी दी तेथ आसा म्हारअ हक अर तैहा ज़ैगा निं हाम्हैं छ़ाडदै। 25 तूह कै आप्पू सोपरे शोहरू बलाका का खास्सअ जोधअ आसा? बलाक त मोआब देशो राज़अ अर सह निं इज़राईली संघै मकाबलै लै कधि आअ अर नां कधू तेऊ इज़राईली संघै जुध छ़ेल़अ।✝11:25 गण. 22:2 26 चिई साला तैणीं रहै इज़राईली हेशबोन, अरोर अर तेता फेर गराऊंऐं, अर्नोन गाडे बाढा बातीए नगरी दी बस्सी। एतरी साला किल्है निं तम्हैं अह ज़ैगा बापस छ़ड़ैऊई? 27 मंऐं निं तेरअ किछ़ै बूरअ किअ। मुंह संघै जुध छ़ेल़ी लाई तंऐं गलती करी। नसाफ करनै आल़अ आसा बिधाता आप्पै। तेऊ करनअ आझ़ इज़राईली अर अमोनी लोगा मांझ़ै नसाफ।"

28 ज़ुंण जपताहै समाद दैनअ थिअ, अमोनी राज़ै निं तिंयां गल्‍ला मनी। 29 तेखअ किअ जपताह बिधाते आत्मां काबू। जपताह डेऊअ गलाद अर मनिश्शे मुल्खा बाती संघा फिरअ मिज़पा नगरी लै बापस अर तेखअ डेऊअ अमोनी लोगा संघै जुधा लै। 30 जपताह मनी बिधाता लै एही मानत, "हे बिधाता, ज़ै तूह अमोनी लोगा का मुल्है ज़ीत दैए 31 अर ज़ै हुंह अमोनी संघै जुधा का राज्ज़ी-राम्बल़अ बापस फिरे। तेभै ज़ुंण बी मुखा सोभी का आजी मेरै घअरा का मुंह सेटा लै एछे सह करनअ मुंह ताल्है हूम बल़ी।"✝11:31 बधा. 27:2; मिक. 6:7; मूल. 22:12

32 तेखअ टपअ जपताह अमोनी संघै जुधा करदअ अर्नोन गाडा पार अर बिधाता दैनी तेऊ लै अमोनी का ज़ीत। 33 अरोर पोर्ही मनीत नगरी तैणीं तिन्‍नां मारदी-मारदी। तेऊ ज़िती तिन्‍नां का मनीत नगरी फेर बिह नगरी अबील-करमीम तैणीं। तेथ मारै तिन्‍नैं खास्सै अमोनी अर खिरी हुई अमोनीए इज़राईली का हार।

जपताह पांच़े शोहरी

34 ज़ांऊं जपताह मिज़पा नगरी आपणैं घअरा लै बापस फिरअ, तेऊए शोहरी आई डफली बाज़दी अर नाच़दी खेल्हदी तेऊ सेटा मिलदी। जपताहे ती सह एक्‍कै शोहरी अर तैहा का सुआई निं तेऊए होर शोहरू-शोहरी आथी तै।✝11:34 लुआ. 15:20; 1 शमू. 18:6 35 ज़ांऊं जपताह का आपणीं शोहरी एछदी शुझुई, तेऊ धेल़ै-च़िरै दुखै आपणैं झिकल़ै संघा बोलअ इहअ, "मेरी बेटीऐ! तंऐं शोटअ मेरअ चल़ैट चोल़ी! तंऐं किल्है लाई मुल्है ऐबै अह नज़िरन दाह? मंऐं आसा बिधाता लै मानत मनी दी अर तेता पूरी करनै का निं हुंह पिछ़ू हटी सकदअ।"

36 तैहा दैनअ आपणैं बाबा लै इहअ ज़बाब, "बाबा, तैबी निं किछ़ै हुअ, ज़ेही तंऐं बिधाता लै ज़बान आसा दैनी दी तूह कर मुंह संघै तिहअ ई। किल्हैकि बिधाता लअ तेरै अमोनी दुशमणा का आप्पै तेरअ बदल़अ।"✝11:36 गण. 30:2 37 पर तैहा बोलअ आपणैं बाबा लै इहअ, "तूह कर मुल्है सिधअ इहअ मुंह छ़ाड दूई भिन्‍नैं तैणीं कल्ही, मुंह दैणीं उझै उछ़टी धारा आपणीं साथणीं संघै हांढ फेर अर हुंह दिल खोल्ही लेरा लाई सकूं कि हुंह मरनी कुंआरी।"

38 जपताह बोलअ तैहा लै, "डेऊ बेटीऐ।" तेऊ दैनअ तैहा दूई भिन्‍नैं लै डेऊणैं। सह लागी आपणीं साथणीं संघै तिधा का हांढदी संघा रही उझै धारा ऐहा गल्‍ला लै लेरदी लागी कि तेसे हणीं कुंआरी अमरा मौत। 39 ज़ांऊं दूई भिन्‍नैं बितै, तेखअ आई सह आपणैं बाबा सेटा बापस फिरी अर तेऊ किई आपणीं मानत पूरी। सह शोहरी ती कुंआरी।

इहअ करै हुअ इज़राईली मांझ़ै अह रबाज़ शुरू कि 40 इज़राईली बेटल़ी डेओआ ती हर साल बणैं च़ऊ धैल़ै तैणीं संघा रहा ती जपताहे शोहरीए महान आदगारी दी लामण बोल्दी लागी।✝11:40 2 इति. 35:25