पांच़ 13

शिमशोन पांच़

1 तेखअ हेरअ इज़राईली भिई तिहअ ई पाप करी ज़ेता का बिधाता नफरत करा। तेखअ दैनअ बिधाता तिन्‍नां च़ाल़्ही साला तैणीं पलिश्ती लोगे गलामी दी डेऊणैं।

2 तेऊ ज़मानै त दान गोत्रा का सोरा नगरी मनोह नाओं एक मणछ। तेऊ लाल़ी ती बांढी अर तैही निं तैहा का किछ़ै लुआद हुई। 3 एकी धैल़ै हुअ बिधातो एक स्वर्ग दूत तैहा सेटा प्रगट संघा बोलअ तैहा लै इहअ, "तूह आसा बांढी तैही निं तेरै शोहरू-माठै हुऐ, पर ऐबै हणीं तूह सुंदी अर तेरअ हणअ एक शोहरू।✝13:3 मूल. 18:1-15; 1 शमू. 1; लूक. 1:5-25 4 पर तूह डाहै धैन कि ऐबै नां तूह दाखो रस झुटी अर नां शूर-शराब झुटी अर नां एही च़िज़ा खाई ज़ुंण बधाने साबै छ़ोतली आसा। 5 ज़ांऊं तेरअ शोहरू होए, तेऊए ज़ल़ू निं तूह कधि काटी आथी किल्हैकि सह हणअ हुऐ ज़ल्मां ओर्ही तेऊए ज़िऊंदी ज़िता बिधाता लै अर्पण किअ द बांधअ। तेऊ ई करनै इज़राईली पलिश्तीए गलामी का आज़ाद।"✝13:5 गण. 6:5

6 तेखअ खोज़अ तैहा आपणैं मर्ध मनोहा का इहअ, "बिधातो एक आदमी आअ मुंह सेटा लै, सह शुझिआ त बिधाते स्वर्ग दूता ज़िहअ ज़हा भाल़ी दर्छ़णअ छ़ुटा। नां हुंह तेऊ का पुछ़ी बोल़ी कि सह किधा का आअ अर नां तेऊ आपणअ नाअं खोज़अ। 7 पर तेऊ बोलअ मुल्है इहअ, ‘तूह हणीं सुंदी अर तेरअ हणअ एक शोहरू।’ संघा बोलअ तेऊ इहअ, ‘नां तूह दाखो रस झुटी, नां शूर-शराब झुटी अर नां तिन्‍नां च़िज़ा खाई ज़ुंण बधाने साबै छ़ोतली आसा, किल्हैकि सह हणअ हुऐ ज़ल्मां ओर्ही तेऊए ज़िऊंदी ज़िता बिधाता लै अर्पण किअ द बांधअ।’"

8 तेखअ किई मनोहै बिधाता सेटा एही अरज़, "बिधाता, मेरै मालक, ज़ीबाण, ज़ुंण आदमी तंऐं छ़ाडअ थिअ, तेऊ छ़ाड हाम्हां सेटा लै भिई बापस ताकि सह हाम्हां का खोज़े कि ज़ुंण सह शोहरू हणअ तेऊ लै हाम्हां किज़ै-किज़ै लागणअ करनअ।"

9 बिधाता शूणीं मनोहै अरज़। मनोहै लाल़ी ती खेचै अर बिधातो सह ई स्वर्ग दूत आअ तैहा सेटा बापस फिरी। तेसो लाल़अ मनोह नांईं त तेभै तैहा संघै तिधी आथी। 10 सह ठुर्ही झ़ट-पटै आपणैं लाल़ै सेटा लै संघा खोज़अ, "च़ाल्‍ल, भाल़ भाल़ै, ज़ुंण आदमी मुंह सेटा लै आअ थिअ, सह शुझुअ मुखा भिई।"

11 इहअ शूणीं डेऊअ मनोह आपणीं लाल़ी संघै खेचै। तेऊ आदमी सेटा पुजी पुछ़अ तेऊ इहअ, "तूह सह ई मणछ आसा ज़ुंणीं मेरी लाल़ी का एही-एही गल्‍ला खोज़ी ती?" तेऊ दैनअ ज़बाब, "हाँ, हुंह आसा सह ई।"

12 तेखअ बोलअ मनोहै इहअ, "तै खोज़ हाम्हां का इहअ, ज़ेभै तंऐं बोली दी गल्‍ला पूरी होए, तेभै तेऊ शोहरूओ किज़ै काम हणअ अर तेऊ केऊ साबै लागणीं तेऊए ज़िन्दगी ज़िऊंणीं?"

13 बिधाते स्वर्ग दूतै दैनअ मनोहा लै ज़बाब, "तेरी लाल़ी डाहै धैन हेरे ज़ुंण मंऐं तैहा का खोज़अ तिन्‍नां गल्‍ला करै तेही ई। 14 दाखा का बणाईं दी च़िज़ा निं खाई आथी, नां दाखो रस झुटी, नां शराब झुटी अर नां तिन्‍नां च़िज़ा खाई ज़ुंण बधाने साबै छ़ोतली आसा। ज़ुंण मंऐं तैहा लै हुकम किअ, तैहा लागणअ ठीक तिहअ ई करनअ।"

15,16 मनोहै निं ज़ाणअ कि अह आसा बिधातो स्वर्ग दूत, तैही बोलअ मनोहै तेऊ लै इहअ, "ज़ीबाण, थोल़ी घल़ी लअ तूह न्हैल़ी, अज़ी निं तूह इधा का डेऊई आथी, हाम्हैं आणू ताल्है छ़ेल्हूए शिखा बणाईं।"

पर बिधाते तेऊ स्वर्ग दूतै बोलअ मनोहा लै इहअ, "च़ाऐ हुंह थोल़ी घल़ी न्हैल़ी बी लऊं, तज़ी बी निं थारअ किछ़ै भोज़न खाणअ। ज़ै तम्हैं बणाणअं ई च़ाहा, तेता करै तम्हैं बिधाता लै हूम बल़ीदान।"

17 मनोहै दैनअ बिधाते स्वर्ग दूता लै ज़बाब, "तूह डाह हाम्हां का आपणअ नाअं खोज़ी ताकि हाम्हैं तेभै तेरअ अदर करी सके ज़ेभै तेरी ईंयां गल्‍ला पूरी होए।" ✝13:17 मूल. 32:30; लुआ. 3:14; प्रका. 19:12

18 बिधाते स्वर्ग दूतै पुछ़अ मनोहा का, "मेरअ नाअं ज़ाणीं करै किज़ै लाअ तंऐं करी! ज़ै हुंह खोज़ूं बी, तैबी निं ताह तेते समझ़ पल़णीं।"

19 तेखअ आणअ मनोहै एक छ़ेल्हू अर एक बडी टोल्ह छ़ांटी तेऊ बेदी संघा भाल़ी एक बडी टोल्ह बेदी लै अर तेथ प्रैंदै ज़ाल़ी आग। तेखअ किअ सह छ़ेल्हू तेथ बिधाता लै हूम बल़ी। तिन्‍नां हेरदी-हेरदी हुअ तिधी इहअ नुआहरअ काम कि 20,21 पार त टोल्हा प्रैंदै बेदी दी बडअ आगीओ कूंड ज़ल़अ द अर मनोह अर तेऊए लाल़ी का शुझुअ इहअ कि बिधातो सह स्वर्ग दूत पेठअ तेऊ आगीए कूंडा जैंदरी। तैबै जाई समझ़अ मनोह कि अह आसा बिधातो स्वर्ग दूत अर तेखअ टेक्‍कअ मनोह अर तेऊए लाल़ी धरनीं उटै पल़ी माथअ। तधा बाद निं तेखअ तिन्‍नैं सह स्वर्ग दूत भिई कधि भाल़अ। ✝13:20-21 लेब. 9:24; एज. 1:28

22 मनोहै बोलअ आपणीं लाल़ी लै, "मुंह लागा इहअ कि ऐबै मरनै हाम्हैं! किल्हैकि हाम्हैं भाल़अ परमेशर आपणीं आछी!"✝13:22 लुआ. 33:20 23 पर तेऊए लाल़ी दैनअ तेऊ लै ज़बाब, "ज़ै बिधाता हाम्हां मारनअ ई च़ाहंदअ, तै निं तेऊ म्हारी हूम बल़ीदाने भैंट मनणी ती, नां तेऊ हाम्हां का ईंयां नुआहरी गल्‍ला रहैऊंणीं ती अर नां तेऊ हाम्हां का एही गल्‍ला खोज़णीं ती।"

24 बादा का हुअ तैहा बेटल़ीओ एक शोहरू अर तिन्‍नैं डाहअ तेऊ नाअं शिमशोन। सह शोहरू रहअ ज़ुआन हंदअ लागी अर बिधाता रहअ तेऊ लै बर्गत दैंदअ लागी।✝13:24 इब्रा. 11:32 25 ज़धा पोर्ही शिमशोन सोरा अर अशतोल नगरी मांझ़ै दान-मनेह नाओंए ज़ैगा बस्सअ, तधा पोर्ही किअ सह शोहरू बिधाते आत्मां काबू।