1 Piani mi ɔ, Petro kɛ Yohane pue nɔ kɛ ho Sɔlemi We ɔ he nɛ a kpeɔ ngɛ daa ngmlɛ etɛ kɛ peeɔ sɔlemi ɔ ya. 2 Se benɛ a ya su Sɔlemi We ɔ he ɔ, a na nyumu akpaketsɛ ko, nɛ ja a ji bɔ nɛ a fɔ lɛ. A kata lɛ kɛ ba fɔ Sɔlemi We ɔ agbo nɛ a tsɛɔ ke Agbo Fini ɔ nya kaa bɔ nɛ a pɔɔ peemi daa a, konɛ e ba ni ngɛ nihi nɛ baa Sɔlemi We ɔ a dɛ. 3 Benɛ e na nɛ Petro kɛ Yohane yaa Sɔlemi We ɔ, e bi mɛ nɛ a ke lɛ sika.

4 Se a hyɛ lɛ too, nɛ Petro de lɛ ke, "Hyɛ wa hɛ mi!"

5 Kɛkɛ nɛ akpaketsɛ ɔ wo e hɛ mi nɔ nɛ e hyɛ mɛ gaa kaa a ma ha lɛ nɔ́ ko lo.

6 Petro de lɛ ke, "Wa be sika nɛ wa ma ha mo. Se ma ha mo nɔ kpa ko. I ngɛ mo fae ngɛ Yesu Kristo Nazaret no ɔ biɛ mi ke, moo te si nɛ o nyɛɛ!"

7 Kɛkɛ nɛ Petro pɛtɛ e nine mi nɛ e wo e nɔ kɛ da si, nɛ he wami ba e nane ɔmɛ kɛ e nakutso ɔmɛ a mi amlɔ ɔ nɔuu. 8 Nɛ e tu kɛ da si nɛ e bɔni nyɛɛmi kɛ tuumi kɛ Mawu yi jemi, nɛ e kɛ mɛ sɛ Sɔlemi We ɔ kɛ bua jɔmi.

9 Benɛ asafo nɛ ngɛ Sɔlemi We ɔ na nɛ e ngɛ nyɛɛe nɛ e ngɛ Mawu yi jee ɔ, 10 a yo kaa lɛ ji nɔ́ balɔ nɛ a naa daa ngɛ Agbo Fini ɔ nya a nɛ, nɛ a nya kpɛ a he. 11 Akɛnɛ akpaketsɛ ɔ nɛ a tsa lɛ ɔ pɛtɛ Petro kɛ Yohane he he je ɔ, ni ɔmɛ tsuo tu fo kɛ ya bua a he nya ngɛ lejɛ ɔ ngɛ Salomo Ablanaa a nɔ nɛ a pee yaa ngɛ nɔ́ nɛ ba a he. 12 Petro da enɛ ɔ nɔ nɛ e de asafo ɔ ke, "Israel bi, mɛni he je nɛ enɛ ɔ ngɛ nyɛ nyakpɛ pee? Mɛni he je nɛ nyɛ ngɛ wɔ hyɛe gaa kikɛ ɔ, kaa nɔ́ nɛ wɔ nitsɛ wa he wami kɛ wa dami nya nɛ wa ha nɛ nyumu nɛ ɔ ngɛ nyɛɛe ɔ? 13 Abraham kɛ Isak kɛ Yakob kɛ wa nɛmɛ a Mawu ɔ nɛ e tsu ni nɛ ɔ kɛ wo Yesu hɛ mi nyami. Yesu, nɔ nɛ nyɛ kua lɛ ngɛ Pilato hɛ mi benɛ Pilato pee e juɛmi kaa e maa ngmɛɛ e he ɔ he munyu nɛ i ngɛ tue ɔ nɛ. 14 Nyɛ sume kaa a ngmɛɛ nɔmlɔ klɔuklɔu kɛ dalɔ nɛ ɔ he, nɛ nyɛ bi ke a ngmɛɛ nɔ gbelɔ ɔ mohu he ha nyɛ. 15 Nɛ nyɛ gbe nɔmlɔ yi wami helɔ ɔ, se Mawu tle lɛ si ekohu. Ami kɛ Yohane wa yeɔ e si temi ɔ he odase, ejakaa benɛ nyɛ gbe lɛ se ɔ, wa na lɛ hɛ kalɔ ekohu.

16 Nyɛ le kaa akpaketsɛ ji nyumu nɛ ɔ, se a tsa lɛ ngɛ Yesu biɛ ɔ hemi kɛ yemi nya.

17 Anyɛmimɛ suɔli, i le kaa nɔ́ nɛ nyɛ pee Yesu ɔ, pe nyɛ li nɛ nyɛ pee, kaa nyɛ nikɔtɔma amɛ nɔuu. 18 Se mohu, si nɛ Mawu wo kɛ gu gbali ɔmɛ a nɔ kaa Mesia a maa na amanehlu nɛ ɔmɛ ɔ, lɔ ɔ nɛ ha e ba mi ja a nɛ. 19 Lɔ ɔ he je ɔ, nyɛ tsake nyɛ tsui jehanɛ, nɛ nyɛɛ kpale ngɛ nyɛ yayami ɔmɛ a se kɛ ba Mawu ngɔ nɛ e maa tsukɔ nyɛ he, nɛ e ma ha nyɛ he jɔmi nɛ je Nutsɔ ɔ ngɔ ɔ, 20 konɛ e tsɔ Yesu, nyɛ Mesia a kɛ ba nyɛ ngɔ ekohu. 21,22 Ejakaa e sa nɛ e hi si ngɛ hiɔwe kɛ ya si be nɛ yayami tsuaa yayami se maa po kaa bɔ nɛ blema gbali ɔmɛ gba a. Nɛ e maa ba mi kaa bɔ nɛ Mose gba momoomo nɛ e de ke, ‘Nutsɔ Mawu ɔ ma tle gbalɔ ko si kaa ami kɛ je nyɛ kpɛti kɛ ha nyɛ. Nyɛɛ bu lɛ tue saminya. 23 Ejakaa a ma kpata nɔ tsuaa nɔ nɛ be lɛ tue bue ɔ hɛ mi.’

24 Gbali nɛ gba kɛ je Samuel yi nɔ, kɛ gbali nɛ nyɛɛ e se ɔ tsuo tsi níhi nɛ ngɛ nɔ yae mwɔnɛ ɔ nɔ ta. 25 Jamɛ a gbali ɔmɛ a bimɛ ji nyɛ, nɛ nyɛ piɛ si womi nɛ Mawu wo nyɛ nɛmɛ ɔ he, benɛ e de Abraham ke, a maa gbaa je ɔ tsuo kɛ gu Yuda bi ɔmɛ a nɔ ɔ. 26 Enɛ ɔ he je ɔ, benɛ Mawu tle e tsɔlɔ ɔ si kɛ je gbeje ɔ, e tsɔ lɛ kɛ ba nyɛ Israel bi ɔmɛ nyɛ ngɔ kekle konɛ e ba jɔɔ nyɛ nɛ e kpale nyɛ kɛ je nyɛ yayami ɔmɛ a se."