1 Nɛ Osɔfo Nɔkɔtɔma a bi lɛ ke, "Anɛ kikɛmɛ a munyu nɛ ɔmɛ ngɛ mi lo?"

2 Stefano he nɔ nɛ e ha heto ke, "Ye tsɛmɛ kɛ ye nyɛmimɛ, nyɛɛ bu tue. Anunyami Mawu ɔ je e he kpo kɛ tsɔɔ wa nɛ Abraham benɛ e ngɛ Mesopotamia a loko e hia kɛ ho Haran ya; 3 nɛ e de lɛ ke e si e ma a kɛ e wekuli kɛ ho ma nɔ he nɛ e maa tsɔɔ lɛ ɔ ya. 4 Kɛkɛ nɛ Abraham si Kaldea bi ɔmɛ a zugba a nɔ nɛ e ya hi Haran ngɛ Siria zugba a nɔ, nɛ e hi lejɛ ɔ kɛ ya si benɛ e tsɛ si je mi, nɛ Mawu kɛ lɛ ba Israel zugba a nɔ. 5 Se Mawu ha we lɛ weto ni loo zugba ko kaa lɛ nitsɛ e nɔ́. Jamɛ a be ɔ mi ɔ, Abraham be bi, se Mawu wo lɛ si kaa e maa ngɔ zugba a tsuo kɛ ha lɛ kɛ e nina nɛ maa ba ngɛ e se ɔ. 6 Mawu ya nɔ nɛ e de lɛ ke e nina hu ma si zugba a nɔ nɛ a ma ya ye nyɔguɛ ngɛ ma kpa nɔ jeha lafa eywiɛ. 7 E tsa nɔ nɛ e de lɛ ke, ‘Ma gbla ma nɛ maa ye nyɛ nyɔguɛ ɔ tue, nɛ lɔ ɔ se ɔ, ma kpale nyɛ kɛ ba Israel zugba a nɔ ekohu nɛ nyɛ ba ja mi ngɛ hiɛ ɔ.’

8 Nɛ Mawu to kusumi nɛ ji nɔ nyumu mi womi ɔ kaa kaimi nɔ́ ngɛ lɛ kɛ Abraham bimɛ a kpɛti. Lɔ ɔ he je ɔ, Abraham wo e bi Isak nyumu mi benɛ a fɔ lɛ nɛ e ye ligbi kpaanyɔ ɔ. Nɛ Isak fɔ Yakob, nɛ Yakob fɔ bimɛ nyɔngma kɛ enyɔ. Mɛ ji Yuda bi ɔmɛ a wɛtso nyɔngma kɛ enyɔ ɔ nɛ. 9 Se Yakob bi ɔmɛ a hɛ kɔ a nyɛmi Yosef ɔ nɔ nɛ a jua lɛ kaa nyɔguɛ kɛ ho Mizraim ya. Se Mawu hɛ ji e nɔ, 10 nɛ e je lɛ kɛ je amanehluhi a mi nɛ e ha nɛ e hɛ mi ba nyami ngɛ Mizraim Matsɛ Farao hɛ mi, nɛ a pee lɛ Mizraim zugba a tsuo nɔ hyɛlɔ kɛ lɛ nitsɛ e matsɛ yemi ɔ mi nɔ́ tsuaa nɔ he blɔ nya tolɔ.

11 Nɛ e ba mi kaa hwɔ nɛ nya wa ko ba, nɛ e wo dengme kɛ ba wa nɛ ɔmɛ a nɔ ngɛ Mizraim kɛ Kanaan zugba a tsuo nɔ. 12 Lɔ ɔ he je ɔ, benɛ a niye ni ta a, Yakob nu kaa niye ni ngɛ Mizraim, nɛ e tsɔ e bi ɔmɛ nɛ a ya he eko kɛ ba. 13 Se benɛ Yosef nyɛmimɛ ɔmɛ ya niye ni ɔ hemi si enyɔne ɔ, e je e he si kɛ ha mɛ nɛ e kɛ mɛ tsɔɔ Farao. 14 Nɛ Yosef ha a ya wo e tsɛ Yakob kɛ e wekuli nɛ mɛ tsuo a peeɔ nyingmi kpaago kɛ enuɔ ɔ kɛ ba Mizraim. 15 Yakob kɛ e bi ɔmɛ gbo ngɛ Mizraim; 16 nɛ a ya pu mɛ tsuo ngɛ Sekem ngɛ gɔ nɛ Abraham he ngɛ Sekem tsɛ Hamor bi ɔmɛ a dɛ ɔ mi.

17 Se benɛ si womi nɛ Mawu wo Abraham kaa e ma je e nina amɛ kɛ je nyɔguɛ yemi ɔ mi ɔ be ɔ ba su ɔ, Yuda bi ɔmɛ a he ba hiɛ fuu ngɛ Mizraim. 18 Nɛ e ba mi kaa matsɛ kpa nɛ ba hi sɛ ɔ nɔ ɔ li Yosef he sane ko. 19 Matsɛ nɛ ɔ kɛ wa nɛ ɔmɛ hi si ngɛ sisimi blɔ nɔ, nɛ e pee mɛ yayami. E haa nɛ fɔli ya jee a bimɛ a he ngɛ nga nɔ nɛ a gboɔ.

20 Jamɛ a be ɔ mi nɔuu nɛ a fɔ Mose. E ji bi ko nɛ he ngɛ fɛu ngɛ Mawu hɛ mi, nɛ e fɔli ɔmɛ ngɔ lɛ kɛ laa ngɛ a we ɔ mi hlami etɛ. 21 Se benɛ a na kaa a be lɛ nyɛe maa laa hu ɔ, a wo lɛ ya fɔ he. Kɛkɛ nɛ Farao biyo ko ya na lɛ nɛ e wo lɛ. E ya lɛ lɛ kaa lɛ nitsɛ e bi; 22 nɛ e tsɔɔ lɛ Mizraim nile, nɛ e pee matsɛ bi agbo nɛ e nya mi tsɔ.

23 E ba mi kaa benɛ e piɛ bɔɔ nɛ e maa ye jeha nyingmi eywiɛ ɔ, e pee e juɛmi kaa e ma ya slaa e nyɛmimɛ Israel bi ɔmɛ. 24 Benɛ Mose ya e nyɛmi ɔmɛ slaami ɔ, e na nɛ Mizraim no ko ngɛ Israel no ko yi kpɛti wae, nɛ e gbe Mizraim no ɔ nɛ e gbo. 25 Mose susu kaa e nyɛmi ɔmɛ ma yo kaa Mawu nɛ tsɔ lɛ nɛ e ba ye kɛ bua mɛ, se a yo we.

26 E nɔ jena benɛ e ya slaa mɛ ekohu ɔ, e na nɛ Israel bi enyɔ ngɛ kunɔ nɔe. E bɔ mɔde kaa e ma kpata mɛ, nɛ e de mɛ ke, ‘Anyɛmimɛ, nyɛ Sɔuu i, nɛ e sɛ kaa nyɛɛ hi kunɔ nɔe.’

27 Se a ti nɔ nɛ pee e nyɛmi yayami ɔ de Mose ke, e pi e he sane ko. Nɛ e bi Mose ke, ‘Mɛnɔ pee mo wa nɔ hyɛlɔ kɛ kojolɔ? 28 Anɛ o ngɛ hlae nɛ o gbe ami hu kaa bɔ nɛ o gbe Mizraim no ɔ hiɛ ɔ lo?’

29 Benɛ Mose nu munyu nɛ ɔ, e tsui po nɛ e tu fo kɛ je Mizraim nɛ e ya to nubwɔ ngɛ Midian zugba a nɔ; nɛ e ya fɔ binyumuwi enyɔ ngɛ lejɛ ɔ.

30 Jeha nyingmi eywiɛ se ɔ, benɛ Mose ngɛ nga nɔ ngɛ Sinai Yoku ɔ he ɔ, Mawu Bɔfo ba je e he kpo kɛ tsɔɔ lɛ kɛ gu la nɛ ngɛ tsoe ngɛ pu kpɔ ko mi ɔ mi. 31 Benɛ Mose na la a, e pee lɛ nyakpɛ. Se benɛ e wo fo ke e yaa nɛ e ya hyɛ ɔ, kɛkɛ nɛ Nutsɔ ɔ tsɛ lɛ nɛ e de lɛ ke, 32 ‘Imi ji o nɛmɛ nɛ ji Abraham kɛ Isak kɛ Yakob a Mawu ɔ nɛ.’ Mose ye gbeye nɛ e nyɛ we lejɛ ɔ nɛ e hyɛ hu.

33 Nɛ Nutsɔ ɔ de lɛ ke, ‘Mo je tokota amɛ ngɛ o nane, ejakaa zugba klɔuklɔu nɔ nɛ o daa si ngɛ ɔ nɛ. 34 I na amanehlu nɛ ye nimli ɔmɛ ngɛ nae ngɛ Mizraim, nɛ i nu a ngmlaa kpami ɔmɛ hulɔ, nɛ i ba nɛ ma ba je mɛ. Lɔ ɔ he je ɔ, ba nɛ ma tsɔ mo Mizraim.’ 35 Nɛ Mawu tsɔ Mose, nɔ nɛ e we bi ɔmɛ kua lɛ nɛ a bi lɛ ke, ‘Mɛnɔ pee mo wa nɔ́ hyɛlɔ kɛ kojolɔ lo?’ Lɛ nɔuu nɛ a tsɔ kaa e ya pee a nɔ hyɛlɔ kɛ a kpɔlɔ. 36 Nɛ kɛ gu nyakpɛ okadihi a nɔ ɔ, e kpaka mɛ kɛ je Mizraim kɛ po Wo Tsutsu ɔ nɛ e kɛ mɛ nyɛɛ nga a nɔ jeha nyingmi eywiɛ sɔuu.

37 Mose nitsɛ de Israel bi ɔmɛ ke, ‘Mawu ma tle Gbalɔ ko si kɛ ha nyɛ kaa ami nɔuu kɛ je nyɛ nyɛmi ɔmɛ a kpɛti.’ 38 Nɛ e bami ja a pɛpɛɛpɛ, ejakaa Mose ji nɔ nɛ da Israel bi ɔmɛ kɛ Mawu Bɔfo ɔ kpɛti ngɛ nga a nɔ, nɛ e he Mawu Mlaa nɛ ji Wami Munyu ɔ kɛ je Sinai Yoku ɔ nɔ kɛ ba ha mɛ.

39 Se wa tsɛ ɔmɛ kua Mose nɛ a hla kaa a maa kpale a se kɛ ho Mizraim ya ekohu. 40 Nɛ a de Aaron ke, ‘Moo pee amagahi kɛ ha wɔ nɛ a kpaka wɔ kɛ kpale kɛ ya Mizraim, ejakaa wa li nɔ́ nɛ ya ngɛ Mose nɛ kpaka wɔ kɛ je Mizraim ɔ pee.’ 41 Lɔ ɔ he je ɔ, a puɛ na bi amaga nɛ a sã bɔ kɛ ha lɛ nɛ a bua jɔ a he.

42 Kɛkɛ nɛ Mawu ngmɛɛ a he nɛ e ha nɛ a bɔni pu kɛ nyɔhiɔ kɛ dodoehi jami kaa bɔ nɛ Mawu bi ngɛ Gbalɔ Amos womi ɔ mi ke, ‘Nyɛ Israel bi, anɛ ami nɛ nyɛ ngɛ bɔ sae ha ngɛ nga a nɔ jeha nyingmi eywiɛ ɔ lo? 43 Dabi, Molok kɛ Remfan dodoe wɔ ɔmɛ nɛ nyɛ ngɛ jae. Lɔ ɔ he je ɔ, i ma ha nɛ nyɛ ya ye nyɔguɛ ngɛ Babilon se lokoo.’

44 Wa nɛ ɔmɛ tloo Bo Tsu kɛ nyɛɛ nga a nɔ. E ji tsu nɛ a pee kaa nɔ́ nɛ Bɔfo ɔ kɛ tsɔɔ Mose ɔ, nɛ e mi nɛ a to tɛhi nɛ a ngma Kita Nyɔngma a ngɛ nɔ ɔ ngɛ. 45 Jeha komɛ a se benɛ Yosua nyɛɛ a hɛ mi nɛ a kɛ ma je li ɔmɛ hwu ta ngɛ zugba nɛ Mawu ha mɛ ɔ nɔ ɔ, kikɛmɛ a Bo Tsu nɛ ɔ nɔuu nɛ a hɛɛ be fɛɛ be hluu kɛ ba su Matsɛ David yi nɔ.

46 Nɛ David hɛ mi ba nyami ngɛ Mawu hɛ mi nɛ Mawu jɔɔ lɛ babauu. E bi Mawu ke e ha lɛ he blɔ nɛ e ma Sɔlemi Tsu nitsɛ kɛ ha lɛ Yakob Mawu ɔ. 47 Se Salomo mohu ji nɔ nɛ ma Sɔlemi Tsu ɔ ngɔ ha Mawu. 48 Se kɛ ɔ, Mawu hí Sɔlemi Tsuhi nɛ a ma kɛ nine ɔ mi, kaa bɔ nɛ e de kɛ gu gbali ɔmɛ a nɔ ke, 49 ‘Ye Matsɛ sɛ ji hiɔwe, nɛ ye nane si sɛ ji zugba a. Mɛni tsu kulaa nɛ nyɛ ma nyɛ ma kɛ ha mi? Anɛ ma hwɔ jamɛ a tsu ɔ mi lo? 50 Anɛ pi imi nɛ i bɔ hiɔwe kɛ zugba a lo?’

51 Oo, nyɛ wɔ jali nɛ nyɛ kuɛ mi ti! Anɛ nyɛ ma nyɛ ku Mumi Klɔuklɔu ɔ nya daa kaa bɔ nɛ nyɛ tsɛ ɔmɛ pee ɔ lo? 52 Gbali ɔmɛ a ti mɛnɔ nɛ nyɛ nɛ ɔmɛ wɛ lɛ yi mi? A gbe gbali ɔmɛ tete nɛ wo Dalɔ nɛ ji Yiwamihelɔ ɔ bami ɔ he si, nɔ nɛ nyɛ tsɔɔ e se blɔ nɛ nyɛ gbe lɛ ɔ. 53 Nɛ nyɛ je blɔ kpata Mawu mlaa amɛ nɛ bɔfo ɔmɛ kɛ ha nyɛ ɔ a hɛ mi."

54 Benɛ Yuda bi ɔmɛ a nikɔtɔma amɛ nu munyu nɛ ɔmɛ nɛ Stefano tu mɛ ɔ, a mi mi fu nɛ a kpe a lungu nya. 55 Se Mumi Klɔuklɔu hyi Stefano tɔ nɛ e hyɛ hiɔwe gaa, nɛ e na Mawu anunyami ɔ kɛ Yesu nɛ daa si ngɛ Mawu hiɔ nɔ. 56 Kɛkɛ nɛ e de mɛ ke, "I na kaa hiɔwe nya bli nɛ Yesu nɛ ji Nɔmlɔ Bi ɔ daa si ngɛ Mawu hiɔ nɔ!"

57 Se a kpa ngmlaa wawɛɛ, nɛ a tsi a tuehi nɛ a ko nu nɔ́ nɛ Stefano ngɛ dee ɔ, nɛ a bu e nɔ si kake too; 58 nɛ a sa lɛ si kɛ je kpo ngɛ ma a mi nɛ a ya fiaa lɛ tɛ; nɛ nɔ gbeli ɔmɛ je a yi nɔ tade ɔmɛ ngɛ a he nɛ a ngɔ mɛ kɛ ba pue niheyo ko nɛ a tsɛɛ lɛ ke Saulo ɔ nane nya.

59 Se benɛ a ngɛ Stefano gbenɔ tɛ ɔmɛ fiae ɔ, e sɔle nɛ e de ke, "Nutsɔ Yesu, mo he ye mumi ɔ." 60 Kɛkɛ nɛ e kpla si nɛ e kpa ngmlaa wawɛɛ ke, "Nutsɔ, mo ko bu yayami nɛ ɔ kɛ ha mɛ!" Kɛkɛ nɛ e ma e nya.