Lucas 7

Nyakpɛ okadihi enyɔ

1 Benɛ Yesu tu munyu nɛ ɔmɛ se ɔ, e kpale kɛ ho Kapernaum ya.

2 E ba mi kaa jamɛ a be ɔ mi nɔuu ɔ, Roma sojahi lafa a nyatsɛ ɔ sɔmɔlɔ nɛ buu lɛ saminya a be he wami kulaa nɛ e fɔɔ si ngɛ gbenɔ muɔ nya. 3 Benɛ e nu Yesu he ɔ, e tsɔ Yuda bi ɔmɛ a nikɔtɔma amɛ ekomɛ konɛ a ya na Yesu nɛ e ba tsa hiɔtsɛ ɔ. 4 Nikɔtɔma amɛ ya na Yesu nɛ a je sojahi lafa a nyatsɛ ɔ yi ha lɛ saminya nɛ a kpa lɛ pee kaa e bɔ mɔde nɛ e ya hyɛ e hiɔtsɛ ɔ ha lɛ. A de lɛ ke e hine a nɔmlɔ kpakpa saminya. 5 Ejakaa e suɔ Yuda bi ɔmɛ a sane, nɛ lɛ po nɛ e ma a kpe he ɔ ha mɛ.

6 Yesu kplɛɛ nɛ e kɛ tsɔli ɔmɛ pue blɔ. Se benɛ e piɛ bɔɔ nɛ a maa su sojahi lafa a nyatsɛ ɔ we ɔ mi ɔ, a kɛ e huɛmɛ nɛ e tsɔ ɔ ya kpe nɛ a de lɛ nɔ́ nɛ e de mɛ ɔ ke, "Awetsɛ, koo na nɔ nɛ o de ke o ma ye we ɔ mi, ejakaa e ji he ko nɛ sɛ mo. 7 Nɛ lɔ ɔ he je hu nɛ i bui ye he kaa i sa nɔ nɛ baa o ngɔ ɔ nɛ. Moo lɛɛ moo tu o nya mi munyu kɛkɛ hiɔtsɛ ɔ ma na he wami. 8 I le enɛ ɔ, ejakaa i ngɛ ye nikɔtɔmahi nɛ yeɔ ye nɔ, nɛ ami hu i ngɛ sisi bimɛ. Nɛ ye nya mi munyu nɛ i ma tu nɔ nɛ ɔ ke, ‘Moo ya!’ Kɛkɛ e yaa. ‘Moo ba!’ Kɛkɛ e ma. Nɛ ke i de ye sɔmɔlɔ ke, ‘Moo pee enɛ ɔ’ ɔ, kɛkɛ e pee."

9 Munyu nɛ ɔ pee Yesu nyakpɛ. E plɛ nɛ e de asafo nɛ nyɛɛ e se ɔ ke, "I ngɛ nyɛ dee faii kaa, ngɛ Yuda bi ɔmɛ a kpɛti ngɛ Israel kulaa a, i kɛ nɔ ko nɛ hɛɛ kikɛmɛ a hemi kɛ yemi nɛ ɔ eko kpi hyɛ."

10 Nɛ benɛ sojahi lafa a nyatsɛ ɔ huɛ ɔmɛ kpale kɛ ba we ɔ mi ɔ, a ba na kaa sɔmɔlɔ ɔ na he wami kulaa.

11 Enɛ ɔ se ɔ, e kɛ we nɛ Yesu kɛ e kaseli ɔmɛ ho kɔpe ko nɛ a tsɛɛ ke Nain ɔ ya. Nɛ nihi fuu nyɛɛ e se kaa bɔ nɛ he tsuaa he nɛ e gu nɛ a fieɔ e se ɔ. 12 Kɔpe ɔ agbo ɔ nya nɛ a su pɛ nɛ a kɛ nihi kpe nɛ a wo nɔ ko kɛ yaa gɔ mi. Niheyo nɛ gbo nɛ ɔ e nyɛ ɔ yalɔyo i, nɛ e nyɛ ɔ bi kake too ji lɛ; nɛ nihi fuu nɛ je ngmlaa ha lɛ ɔ nyɛɛ gbogboe ɔ se.

13 Benɛ Nutsɔ ɔ na yo ɔ nɛ e bi gbo ɔ, e ni pee lɛ mɔbɔ nɛ e de lɛ ke, "Ko fo ya!" 14 E nyɛɛ kɛ ho gbogboe daka a he ya nɛ e ya ta he, nɛ nɔ tlooli ɔmɛ ho da si. Kɛkɛ nɛ e de ke, "Niheyo, moo te si!"

15 Niheyo ɔ te si hi si nɛ e bɔni munyu tumi. Yesu wo lɛ ngɔ ha e nyɛ ɔ. 16 Ni ɔmɛ ye gbeye nɛ a wo sina kɛ yi jemi ngɔ ha Mawu nɛ a de ke, "Anɔkuale ji kaa gbalɔ ngua ko te si ngɛ wa kpɛti. Mwɔnɛ ɔ wa na Mawu nine nya ni tsumi paa."

17 Nɛ a nu nɔ́ nɛ e tsu jamɛ a ligbi ɔ he ngɛ Yudea zugba a mi kɛ he kpahi tsuo.

Yesu kɛ Yohane Baptisilɔ ɔ

18 E kɛ we nɛ Yohane Baptisilɔ ɔ kaseli ɔmɛ hu nu nihi nɛ Yesu ngɛ tsue ɔ he nɛ a ya bɔ Yohane. 19 Nɛ Yohane tsɛ e kaseli ɔmɛ a ti ni enyɔ nɛ e tsɔ mɛ ke a ya bi Yesu ke, "Anɛ mo ji Yiwamihelɔ nɛ ma a, aloo waa hyɛ nɔ kpa blɔ lo?"

20 Nɛ tsɔli ɔmɛ ba Yesu ngɔ nɛ a ba de lɛ ke, "Yohane Baptisilɔ ɔ ke wa ba bi mo ke, ‘Mo ji Yiwamihelɔ ɔ nɛ ma a, aloo waa hyɛ nɔ kpa blɔ lo?’ " 21 Jamɛ a ngmlɛfia a nɔ nɔuu ɔ, a ba na Yesu nɛ ngɛ hiɔtsɛmɛ slɔɔtohi tsae, nihi nɛ ngɛ nyɛɛe ngɛ gbongu mi, hɛ ngmɛ yuyuili kɛ nihi nɛ mumi yayami ngɛ nɔ́ dee ha mɛ. 22 Yesu ha mɛ heto nɛ e de ke, "Nyɛɛ ya nɛ nyɛ ya bɔ Yohane nihi nɛ nyɛ ba nu kɛ níhi nɛ nyɛ ba na amɛ tsuo kaa, gbongu mi nyɛɛli ngɛ nyɛɛe tutuutu, hɛ ngmɛ yuyuili ngɛ nɔ hyɛe, tsitsɛmɛ a he ngɛ tsɔe, tue kpokutsɛmɛ ngɛ nɔ́ nue. A ngɛ gbogboehi si tlee, nɛ a ngɛ Manye Munyu ɔ fiɛe kɛ ngɛ ohiafohi tsɔɔe. 23 Nɛ nyɛ pa de Yohane ke, ‘A maa jɔɔ nɔ tsuaa nɔ nɛ e hemi kɛ yemi ngɛ ye mi ɔ be laae.’ "

24 Benɛ tsɔli ɔmɛ je ɔ, Yesu bi asafo ɔ ke, "Mɛni nɛ nyɛ ya Yudea nga a nɔ ya hyɛ ɔ? Nɔ́ ko kɛkɛ kaa nga nɔ gla nɛ kɔɔhiɔ ngɛ fiae kɛ ngɛ yae ngɛ bae lo? 25 Aloo nɔ ko nɛ dla e he saminya nɛ nyɛ ya hyɛ ɔ? He dlali kɛ nihi nɛ ngɛ kpɔtɔɔ mi ɔ, matsɛmɛ a we nɛ a naa mɛ ngɛ, tsa pi nga nɔ nɛ a hii. 26 Aloo gbalɔ nɛ nyɛ ya na? I ngɛ nyɛ dee anɔkuale mi ke, nyɛ ya na nɔ ko nɛ pe gbalɔ. 27 Lɛ e he munyu nɛ a tu ngɛ Ngmami ɔmɛ a mi ke, ‘I ngɛ ye tsɔlɔ ɔ tsɔe kɛ se o hlami nɛ e ya dla blɔ ha mo’ ɔ nɛ. 28 Ngɛ yihi a bimɛ a kpɛti ngɛ je ɔ mi tsuo ɔ, nɔ ko be nɛ kle pe Yohane, se nɔ nɛ ji nyafii pe kulaa ngɛ Mawu Matsɛyemi ɔ mi ɔ e kle pe lɛ."

29 Nihi kulaa nɛ nu Yohane fiɛmi ɔ, a ti nihi nɛ ji jua tsuli tete nu he ngɛ a mi kaa dalɔ ji Mawu, nɛ a ha nɛ Yohane baptisi mɛ. 30 Ja Farisi bi ɔmɛ kɛ Mose mlaa tsɔɔli ɔmɛ pɛ. Mɛɛ lɛɛ a kua Mawu yi wami hemi blɔ nɛ e je ha nɔmlɔ adesa a, nɛ a ha we nɛ Yohane nɛ e baptisi mɛ.

31 Nɛ Yesu bi ke, "Mɛni ma de ngɛ nimli kaa kikɛ ɔmɛ a he? Nɛ mɛni he ma wo mɛ kɛ to? 32 A ngɛ kaa jokuɛwi nɛ ngɛ kotlokoo fiɛe ngɛ ma nɔ nɛ a ngɛ a bi dee ke, ‘Wa wo fiɛmi do ha nyɛ se nyɛ dui; wa wo ya hu, se nyɛɛ kɛ wɔ fo we.’ 33 Ejakaa Yohane Baptisilɔ ɔ haa hwɔ, nɛ e nui da nya wawɛ ko, nɛ nyɛ de ke, ‘Mumi yayami ngɛ e mi.’ 34 Ami lɛɛ i yeɔ ni nɛ i nuu wai, nɛ nyɛ de ke, ‘Yimayitsɛ ji lɛ, nɛ e kɛ nimli yayami se bɔɔ.’ 35 Se nyɛ nitsɛmɛ nyɛ maa na paa kaa nyɛ munyu ɔmɛ dɛ tɛ kake nɔ."

Simon tsɛ Yesu ni yemi

36 Farisi bi ɔmɛ eko tsɛ Yesu ni yemi ngɛ e we mi nɛ e ya. Benɛ e hii si ngɛ niye ni ɔ se ɔ, 37 yo ajuamatsɛ ko nɛ na le kaa Yesu ba jamɛ a we ɔ mi ɔ wo nu je via he jua wawɛ tɔ kake kɛ to e dɛ kɛ ba lejɛ ɔ.

38 Nɛ benɛ a ngɛ ni ɔ yee ɔ, yo nɛ ɔ ya je Yesu se, nɛ e ya kpla si ngɛ e nane he. E fo ya ngɔ pue Yesu nane nɔ nɛ e wo e yi bwɔmi kɛ tsu, e fiɔ e nane he, nɛ e plɛ nu je via a ngɔ pue e nane nɔ. 39 Benɛ okplɔɔ tsɛlɔ ɔ na nɔ nɛ ngɛ nɔ yae ɔ, e susu ngɛ e yi mi ke, "Enɛ ɔ tsɔɔ faii kaa nɔmlɔ nɛ ɔ pi gbalɔ; kaa Mawu nɛ tsɔ lɛ niinɛ jinɛ e ko le yo mimi nɛ ba ngɛ ni nɛ ɔ tsue ɔ."

40 Kɛkɛ nɛ Yesu tsɛ lɛ nɛ e de lɛ ke, "Simon, ma bi mo nɔ́ ko." Simon ha lɛ heto ke, "Tsɔɔlɔ, mo bi."

41 "Nɔ ko pa sika ha nihi enyɔ. E pa maa pee sidi lafa enuɔ kɛ ha nɔ kake, nɛ e pa maa pee sidi nyingmi enuɔ kɛ ha nɔ kpa a hu. 42 Se a ti nɔ ko nyɛ we e hiɔ ɔ nɛ e wo, nɛ e wo hiɔ ɔ ngɔ ke mɛ tsuo. Nihi enyɔ nɛ ɔmɛ a ti nɔ te nɛ maa suɔ e sane saminya nɛɛ?"

43 Simon ha heto nɛ e de ke, "E peeɔ mi kaa nɔ nɛ hiɔ ɔ kle ɔ." Yesu de lɛ ke, "O heto ɔ da."

44 Kɛkɛ nɛ e plɛ hyɛ yo ɔ, nɛ e de Simon ke, "O na yo nɛ ɔ nɛ kplaa si ngɛ hiɛmɛ nɛ ɔ lo? Benɛ i ba o we ɔ mi ɔ o ha we mi nyu nɛ ma kɛ fɔ bunyuku ɔ ngɛ ye nane he, se lɛɛ e wo e vo nyu kɛ fɔ ye nane he, nɛ e wo e yi bwɔmi kɛ tsu vo nyu ɔ ngɛ ye nane he. 45 Kusumi nya fiɔmi ngami nɛ wetsɛ kɛ nyaa e nubwɔ he ɔ hu o kɛ nga we mi. Se yo nɛ ɔ lɛɛ kɛ je benɛ i ba sɛ o we nɛ ɔ mi ɔ, e fiɔ ye nane he pe si abɔ. 46 Kusumi nya a, e sa kaa o ha mi nu nɛ ma kɛ wo ye yi mi. Se enɛ ɔ hu o pee we ha mi. Yo nɛ ɔ wo nu je via nɛ he jua wa nɛ ɔ kɛ pɔ ye nane! 47 Enɛ ɔ he je ɔ, a wo e yayami fuu ɔmɛ ngɔ ke lɛ, ejakaa e je suɔmi agbo kpo ngɔ tsɔɔ mi. Nɔ nɛ a wo bɔbɔyoo ngɔ ke lɛ ɔ, e suɔmi ɔ he pi."

48 Nɛ Yesu de yo ɔ ke, "A wo o he yayami ɔmɛ ngɔ ke mo."

49 Kɛkɛ nɛ ni ɔmɛ nɛ hii si ngɛ okplɔɔ ɔ he ɔ de a he ke, "Mɛnɔ po ji nɔmlɔ nɛ ɔ nɛ e nyɛɛ nɛ e woɔ nihi a he yayami kɛ kee mɛ ɔ?"

50 Nɛ Yesu plɛ nɛ e de yo ɔ ke, "O hemi kɛ yemi he o yi wami; moo ya ngɛ he jɔmi mi."