1 Enɛ ɔ se ɔ, e ke we nɛ Yesu wo e kaseli nyɔngma kɛ enyɔ ɔmɛ kɛ bɔni Galilea ma amɛ kɛ kɔpe tsɔwi ɔmɛ a nɔ kpami ngɛ fiɛe ke Mawu Matsɛyemi ɔ ma. 2 Nɛ yi komɛ nɛ e tsa mɛ kɛ yi komɛ hu nɛ e hia mumi yayami kɛ je a mi kaa Maria Magdalena, nɔ nɛ e hia mumi yayamihi kpaago kɛ je e mi ɔ hu piɛ a he. 3 Kɛ Yohana, nɛ ji Matsɛ Herode tsɔlɔ nɔkɔtɔma nɛ a tsɛɛ lɛ ke Kusa, nɛ ngɛ e we ɔ nya a, e yo, kɛ Susana kɛ ni kpahi fuu nɛ a jee a kotoku mi kɛ yeɔ kɛ buaa Yesu kɛ e kaseli ɔmɛ ɔ hu piɛ he.

4 Ligbi ko nɛ nihi fuu je hehihehi kɛ ba bua nɛ a ngɛ lɛ tue bue ɔ, e bu mɛ abɛ nɛ ɔ:

5 E de mɛ ke, "Ngmɔ hulɔ ko ya ni dumi ngɛ e ngmɔ mi, nɛ benɛ e ngɛ wu ɔ fiae ɔ, ekomɛ ya pue blɔ nɔ nɛ nihi naa nɔ nɛ lohwe pɛlitsɛhi ya kukuɔ nɛ a ye. 6 Ekomɛ ya pue zu nɛ mi kuɛ nɔ, ejakaa tɛ ngɛ zu ɔ mi. Wu ɔmɛ puɛ se e kɛ we nɛ a gbo, ejakaa a nɛ nyu. 7 Wu ɔ ekomɛ ya pue miohi a mi nɛ e kɛ we nɛ mio ɔmɛ gbe mɛ. 8 Ekomɛ lɛɛ a ya pue zugba kpakpa nɔ nɛ a puɛ nɛ a wo yiblii fuu ngwɔ he lafa." Benɛ e bu abɛ ɔ ta a, e de ni ɔmɛ nɛ ngɛ lɛ tue bue ɔ ke, "Nɔ nɛ ngɛ tue nɛ e ma kɛ nu ɔ, e nu."

9 E kaseli ɔmɛ bi lɛ nɛ e tsɔɔ mɛ abɛ ɔ sisi.

10 E ha heto nɛ e de mɛ ke, "Nyɛɛ lɛɛ Mawu ha nyɛ he blɔ kaa nyɛɛ le abɛ nɛ ɔmɛ a sisi, ejakaa a tsɔɔ nihi nɛ kɔɔ Mawu Matsɛyemi ɔ he. Se ni nɛ ɔmɛ lɛɛ, kaa bɔ nɛ blema gbali ɔmɛ gba ngɔ fɔ si ɔ, a nuɔ abɛ ɔ, se a nui sisi."

11 "E sisi ji nɛ, wu ɔ ji Mawu Munyu ɔ nɛ a ngɔ ha nimli adesahi ɔ nɛ. 12 Nane blɔ ɔ nɛ wu ɔmɛ ya pue nɔ ɔ daa si ha nɔmlɔ tsui nɛ wa. Kikɛmɛ a tsɛ ɔmɛ a nuɔ munyu ɔ se Abosiami ba juɔ munyu ɔ kɛ jee, nɛ e hí a mi konɛ a he nɛ a ye nɛ a na yi wami hemi. 13 Tɛ zugba a daa si kɛ ha nihi nɛ nuɔ munyu ɔ kɛ bua jɔmi se munyu ɔ hi a mi nɛ e maa wa, ejakaa a be sipoku. A le kaa anɔkuale munyu i, nɛ a heɔ yeɔ, se ke haomi ba na mɛ pɛ a hɛ je munyu ɔ nɔ. 14 Wu ɔmɛ nɛ ya pue miohi a mi ɔ daa si kɛ ha nihi nɛ buɔ Mawu Munyu ɔ tue nɛ a heɔ yeɔ, se pee se ɔ, je mi ni nami kɛ haomi kɛ je mi bua jɔmi gbee munyu ɔ ngɛ a mi nɛ a nyɛ we nɛ a yeɔ kɛ buaa ni kpahi nɛ a he Manye Munyu ɔ ye.

15 Se zugba kpakpa a ji tsui kpakpatsɛ ɔmɛ nɛ. A nuɔ munyu ɔ nɛ a pɛtɛɔ he nɛ a woɔ yiblii, nɛ a bɔɔ ni kpahi hulɔ nɛ mɛ hu a heɔ yeɔ."

16 Be kpa hu e bi mɛ ke, "Mɛnɔ nɛ e suɔ kane nɛ e woɔ sowe ngɔ buɔ nɔ konɛ e ko tso? Kane ɔ, nɔ nɔ nɛ a kɛ maa konɛ e kpɛ ha nɔ tsuaa nɔ. 17 Enɛ ɔ tsɔɔ kaa be ko maa su nɛ a ma je nimli a tsui mi nɔ tsuaa nɔ kpo, nɛ nɔ fɛɛ nɔ maa na faii. 18 Enɛ ɔ he je ɔ, nyɛɛ bu tue saminya. Ejakaa nɔ tsuaa nɔ nɛ ngɛ nɔ ko ɔ, a maa piɛ he ha lɛ; nɛ nɔ nɛ be nɔ ko ɔ, bɔbɔyoo ɔ nɛ e ngɛ ɔ hu a ma he ngɛ e dɛ."

19 Ligbi ko ɔ, e nyɛ ke e nyɛminyumu ɔmɛ ba nɛ a ba na lɛ. Se Nɔmlɔ hiɛ, lɔ ɔ he je ɔ, a nyɛ we nɛ a sɛ we ɔ mi he nɛ e ngɛ fiɛe ngɛ ɔ. 20 Benɛ a de Yesu kaa a ngɛ kpo ɔ nɔ nɛ a ngɛ hlae nɛ a na lɛ ɔ, nɔ nɛ e de ji.

21 "Ye nyɛ kɛ ye nyɛmimɛ ji ni nɛmɛ nɛ nuɔ Mawu Munyu ɔ nɛ a yeɔ nɔ ɔ."

22 Ligbi ko ngɛ jamɛ a be ɔ mi nɔuu ɔ, e kɛ e kaseli ɔmɛ ngɛ lɛ mi nɛ e de mɛ ke a hlui lɛ ɔ kɛ ho wo ɔ se ya. 23 Se benɛ a ngɛ lɛ ɔ mi kɛ yaa a, e ho ya kpasa si bɔɔ nɛ mahe nɔ e nɔ. E ngɛ mahe ɔ mi nɛ kɔɔhiɔ te nɛ nyu bɔni fiami kɛ ngɛ lɛ ɔ mi sɛe nɛ lɛ ɔ miɔ nɛ e ma butu.

24 A sa fo kɛ ho he nɛ e hwɔɔ si ngɛ ɔ ya nɛ a ya tsiɛ lɛ nɛ a de lɛ ke, "Nutsɔ, Nutsɔ, lɛ ɔ maa ho mumi ya!" E te si nɛ e nga kɔɔhiɔ ɔ yi nɛ e de ke, "Moo ngmɛ!" Kɛkɛ nɛ kɔɔhiɔ ɔ jɔɔ fiami nɛ wo ɔ ngmɛ dii. 25 Nɛ e bi mɛ ke, "Jije nyɛ hemi kɛ yemi ɔ ngɛ?" A ye gbeye, nɛ a bi a he ke, "Mɛnɔ po ji nɛ ɔ nɛ kɔɔhiɔ kɛ oslɔke tete buɔ lɛ tue ɔ?"

26 Enɛ ɔ se ɔ, a ya su wo ɔ se ngɛ Gerasene bi ɔmɛ a zugba a nɔ ngɛ Galilea ha nɔ. 27 Benɛ e ngɛ kpo jee ngɛ lɛ ɔ mi pɛ nɛ nyumu godotsɛ ko je ma a mi kɛ lɛ ba kpe. Nyumu nɛ ɔ godo ɔ nya wa, nɛ e nyɛɛɔ he gu, nɛ gohi a mi ji he nɛ e hii. 28 Benɛ e na Yesu pɛ nɛ e hia ngmlaa nɛ e tsɔ fia si ngɛ e hɛ mi nɛ e de lɛ ke, "Mɛni sane i kɛ mo ngɛ, mo Yesu hiɔwe lokoo Mawu ɔ Bi? I kpa mo pɛɛ, mo ko hao mi!"

29 Ejakaa Yesu bɔni mumi yayami ɔ yi ngami nɛ e je godotsɛ ɔ mi. Anɔkuale, nɔmlɔ nɛ ɔ godo ɔ nya wa saminya bɔ nɛ ke a wo lɛ pã mi pohu e tsɔɔ ga amɛ nɛ e woɔ fo kɛ sɛɔ nga. 30 Yesu bi lɛ ke, "Kɛ a tsɛɛ mo kɛɛ?" Godotsɛ ɔ ha lɛ heto ke, "Asafo," ejakaa mumi yayamihi nɛ ngɛ e mi ɔ a hiɛ. 31 Nɛ mumi yayami ɔmɛ ngɛ Yesu pɛɛ kpae ke e ko je mɛ we kɛ ya wo muɔ nɛ mi kuɔ mi.

32 Kpotoo komɛ ngɛ ni yee ngɛ yoku ɔ he ngɛ a kasa nya nɛ mumi yayami ɔmɛ kpa lɛ pɛɛ ke e ha mɛ he blɔ nɛ a ya sɛ a mi. Nɛ Yesu kplɛɛ nɔ. 33 Kɛkɛ nɛ mumi yayami ɔmɛ je nɔmlɔ ɔ mi nɛ a ya sɛ kpotoo ɔmɛ a mi, nɛ amlɔ ɔ nɔuu ɔ, kpotoo ɔmɛ kulaa wo fo kɛ ya nɔ taku ɔ mi nɛ a gbo. 34 Ni ɔmɛ nɛ ngɛ lohwe ɔmɛ poe ɔ wo fo kɛ ho ma a mi ya ya bɔ ma mi bi ɔmɛ sane nɛ ba a.

35 E kɛ we nɛ nihi fuu je ma a mi kɛ ba nɛ a ba hyɛ nɔ nɛ ba a ha. Nɛ a ba na godotsɛ ɔ kaa e hɛ mi tsɔ nɛ e ha bo nɛ e hii si kpoo ngɛ Yesu nane nya. Enɛ ɔ pee mɛ tsuo nyakpɛ saminya. 36 Nɛ ni nɛmɛ nɛ na nɔ nɛ ba a, bɔ ma a mi tsɛ ɔmɛ bɔ nɛ Yesu plɛ kɛ tsa godotsɛ ɔ ha. 37 Kɛkɛ nɛ nɔ tsuaa nɔ kpa Yesu pee kaa e je a ma a mi nɛ e ho, ejakaa gbeye nu mɛ. Enɛ ɔ he je ɔ, e kpale sɛ lɛ ɔ mi nɛ e po pa a kɛ ho e se ya.

38 Nɔ ɔ nɛ e tsa lɛ ɔ kpa lɛ pɛɛ ke e kɛ lɛ maa ya; se Yesu kplɛɛ we nɔ. Nɛ e de lɛ ke, 39 "Moo kpale kɛ ho o wekuli ɔmɛ a ngɔ ya nɛ o ya bɔ mɛ nyakpɛ ni nɛ Mawu tsu kɛ ha mo ɔ." Lɔ ɔ he je ɔ, e ho ya kpa ma a mi kulaa nɛ e fiɛ nyakpɛ nɔ́ agbo nɛ Yesu tsu kɛ ha lɛ ɔ ngɔ tsɔɔ nɔ tsuaa nɔ.

40 Benɛ e ya su pa a se ɔ, ni ɔmɛ fua lɛ atuu, ejakaa a ngɛ lɛ mlɛe.

41 Nɛ nyumu ko nɛ a tsɛɛ lɛ ke Yairo nɛ e ji Yuda bi ɔmɛ a kpe he ɔ nya nikɔtɔma amɛ eko ɔ ba nɛ e ba nɔ Yesu nane nya nɛ e kpa lɛ pɛɛ ke e kɛ lɛ nɛ a ho e we mi ya. 42 Ejakaa e bi yoyo kake too nɛ ye jeha nyɔngma kɛ enyɔ ɔ fɔɔ si nɛ e maa ho gbomi ya. Yesu kɛ lɛ gu ni ɔmɛ a kpɛti kɛ ho we ɔ mi ya. 43 Se benɛ a yaa a, yo ko nɛ muɔ ngɛ bee ngɛ e he jeha nyɔngma kɛ enyɔ sɔuu ji nɛ, nɛ e nyɛɛ tsopatsɛmɛ a nɔ hluu nɛ e dɛ mi ta se hiɔ ɔ jɔɛ ɔ, 44 ba je Yesu se blɔ nɛ e ta e tade ɔ he, ejakaa e ngɛ hlae nɛ a tsa lɛ. Kɛkɛ nɛ amlɔ ɔ mi nɔuu ɔ, muɔ ɔ jɔɔ bemi ngɛ e he. 45 Yesu bi ke, "Mɛnɔ nɛ e ta ye he ɔ?" Se nɔ tsuaa nɔ ke e tɛ e he. Nɛ Petro de lɛ ke, "Mawetsɛ, mo nitsɛ o na kaa nimli ɔmɛ hiɛ kɛ bɔle mo."

46 Se Yesu de lɛ ke, "Nɔ ko je blɔ ta ye he, ejakaa i nu he kaa tsami he wami je ye mi."

47 Benɛ yo ɔ na kaa Yesu le kaa e ta e he ɔ, e wo he kpokpomi kɛ ba kpla si ngɛ e hɛ mi nɛ e de lɛ nɔ́ nɛ he je nɛ e ta e he ngɛ ɔ; nɛ e tsɔɔ nya hu kaa amlɔ nɛ ɔ e na he wami. 48 Yesu de lɛ ke, "Biyo, o hemi kɛ yemi tsa mo, yaa ngɛ he jɔmi mi."

49 Benɛ Yesu kɛ yo ɔ ngɛ munyu ɔ tue ɔ nɔuu nɛ tsɔlɔ ko je Yairo we ɔ mi kɛ ba nɛ e ba de Yairo ke, "O biyo ɔ yi ta, lɔ ɔ he je ɔ, e he hia we kaa o hao Tsɔɔlɔ ɔ hu."

50 Se benɛ Yesu nu sɛ ɔ nɛ tsɔlɔ ɔ ba de ɔ, e de bitsɛ ɔ ke, "Koo ye gbeye! Mo wo o hɛ kɛ fɔ ye nɔ nɛ e maa hi ha o biyo ɔ."

51 Benɛ a ya su we ɔ mi ɔ, Yesu ha we nɛ nɔ ko nɔ ko nɛ sɛ tsu ɔ mi he nɛ gbogboe ɔ ngɛ ɔ, ja lɛ nitsɛ kɛ Petro kɛ Yakobo kɛ Yohane kɛ biyo ɔ tsɛ kɛ e nyɛ pɛ. 52 Nihi ba hyi we ɔ mi fuu kɛ ya. Se Yesu de mɛ ke, "Nyɛɛ jɔɔ ya fomi, nɔ ɔ gbo we; mahe kɛkɛ nɛ e hwɔ." 53 Se ni ɔmɛ nɛ ngɛ lejɛ ɔ muɔ lɛ nɛ a ye e he fɛu, ejakaa mɛɛ lɛɛ a le kaa biyo ɔ yi ta.

54 Yesu pɛtɛ bi ɔ nine he nɛ e tsɛ lɛ nɛ e de ke, "Biyo, moo te si!" 55 Amlɔ ɔ nɔuu ɔ, mumi kpale kɛ ba e mi nɛ e tu kɛ da si. Yesu de mɛ ke, "Nyɛ ha lɛ nɔ́ ko nɛ e ye." 56 Fɔli ɔmɛ a bua jɔ a he kɛ be nɔ. Se Yesu bɔ mɛ kɔkɔ ke a ko fiɛ nɔ́ nɛ ba a nɛ nɔ ko nɛ e nu.