1 अळतेण मे एक ह़रगदुत ने ह़रगे गेथो उतरते देख्‌यो, जीना हात मे पताळ खाडा नी कुची अने एक मोट्‌ली ह़ाकळ हती। 2 तीहयो तीहया अजगर, ने मतलब पेल्‌ना गड़हा ने, जे भुतड़ो से,✝20:2 उबजणाय कीताप ह़ाकळ वेर बांदीन एक हजार साल नी लेदे बांद देदो, 3 ता तीहयो ह़रगदुत तीने पताळ खाडा मे नाखीन कुंड देदो अने तीने सील लगाड़ देदो के तीहयो एक हजार साल पुरा हयते तक जाती-जाती ना माणहु ने अळी नी भटकाड़े। अळतेण नख्‌खी से के थोड़ीक वार तक उगड़े।

4 अळतेण मे राजगाद्‌या देख्‌यो, अने तीमनी पोर माणहु बह ज्‌या, अने तीमने नीयाव करवा नो हक आप्‌या। अने मे तीमनी आत्‌मा ने बी देख्‌यो, जीमना मुंडा ईसु नी गवाय देवा अने भगवान ना बोलु ना कारण सी तोड़ देदला हता, अने जे नी तीहयु जानवर नी, अने नी तीनी मुर्‌ती नी पुंजा कर्‌या, अने नी आह़फाम ना नींडाळे अने हाते तीनो सीलटप्‌पो लगाड़्‌या। तीहया जीवता हय्‌न मसी ह़ाते एक हजार साल तक राज करता र्‌या।✝20:4 दानीयल 7:9,22 5 जत्‌यार तक आहया एक हजार साल पुरा नी हया तांह तक बीजा आखा मरला जीवता नी हया। आहयु ते पेल्‌नु मरीन जीव उठणु से। 6 जुगाळा अने चोखला तीहया से, जे आहया पेली कावा जीव उठवा मे साजल्‌या से। एवा पोर बीजी मोत नो कंय बी हक नी हय, पण तीहया भगवान ना मसी अने पुंजारा बणहे अने तीनी ह़ाते एक हजार साल तक राज करहे।

7 जत्‌यार एक हजार साल पुरा हय जहे ता भुतड़ा ने जेल मे गेथो सोड़ देहे। 8 अने तीहयो आखी धरती पोर फेल्‌ली जाती ने भटकाड़वा करीन नीकळ पड़हे। तीहयो गोग अने मागोग ने भटकाड़हे, तीहयो तीमने झुमायवा करीन एकठा करहे। तीमनी गीनती दर्‌या नु रेळतु बराबर रेहे। ✝20:8 यहेजकेल 7:2; 38:2,9,15 9 तीहया आखी धरती पोर फेलीन भगवान ना चोखला माणहु नु तम्‌बु अने मोंगाळु ह़ेर ने घेरवी लेहे अने आक्‌ठु ह़रगे गेथु उतरीन तीमने खत्‌तम करहे। 10 तीमने भटकाड़वा वाळा भुतड़ा ने*20:10 ईबलीस आक्‌ठु अने बारुद नी दर्‌या मे, जीनी मे तीहयु जानवर अने झुटो भगवान वगे गेथो केण्‌यो माणेह बी रेहे, नाख देहे; अने तीहया रात-दाड़ो जलमका वेला मे तड़पता रेहे।

11 अळतेण मे एक धोळ्‌ळी राजगादी अने तीनी पोर बह रेला ने देख्‌यो, तीनी अगळ गेथा धरती अने वादळु नाह ज्‌या, अने तीमनो पतो तक नी चाल्‌यो। 12 अळतेण मे नान्‌ला-मोट्‌ला आखा मरला ने राजगादी अगळ उबा हय रेला देख्‌यो, अने कीताप उगाड़्‌या; अने अळतेण एक अळी कीताप उगाड़्‌या, मतलब जीवाय नी कीताप अने जेम तीहया कीताप्‌या मे लीखलु हतु, तेमेत तीमना कामु नी अनसारे मरला नो नीयाव कर्‌या।✝20:12 दानीयल 7:9,10 13 जे मरला दर्‌या मे हता तीहया मरला ने दर्‌या आप देदी, अने मोत अने पताळ बी तीहया मरला ने जे तीमनी मे हता, आप देदा; अने तीमनी माय्‌न एक-एक जणा नो तीमना कामु नी अनसारे नीयाव कर्‌या। 14 मोत अने पताळ ने बी आक्‌ठु नी दर्‌या मे नाख देदा। आहयु आक्‌ठु नी दर्‌या बीजी मोत से; 15 अने जे कोय नु बी नाम जीवाय नी कीताप मे लीखलु नी जड़्‌यु, तीने आक्‌ठु नी दर्‌या मे नाख्‌या।