परकासीतवाक्‌य 7

144,000 ईस्‌रायल माणहु

1 अळतेण मे धरती ना च्‌यारोव खुणा पोर च्‌यार ह़रगदुत उबा हय रेला देख्‌यो। तीहया धरती नी च्‌यारो-मेर नु वाहळु रोक र्‌या हता काहाके धरती अने दर्‌या अने काना बी झाड़का पोर वाहळु नी लागे।✝7:1 यीरम्‌या 49:36; दानीयल 7:2; जकर्‌याह 6:5 2 अळतेण मे एक अळी बीजा ह़रगदुत ने जीवत्‌ला भगवान ना सीलटप्‌पा लीन उगवणो गेथो उपर आवते देख्‌यो; तीहयो तीहया च्‌यारोव ह़रगदुत ने जीमने धरती अने दर्‌या नु नुकसान करवा नो हक आपलो हतो, उचा बोल सी आड़ीन केदो, 3 "जत्‌यार तक आमु अमारा भगवान ना चाकर्‌या ना नींडाळे सीलटप्‌पो नी लगाड़ दीया, तांह तक धरती अने दर्‌या अने झाड़का नु नुकसान नी करजो।"✝7:3 यहेजकेल 9:4,6 4 जीमनी पोर भगवान नो सीलटप्‌पो लागलो से मे तीमनी गीनती ह़मळ्‌यो, मतलब ईस्‌रायली नी अवल्‌यात ना आखा घोराणा जात्‌या माय्‌न एक लाख चाळीह़ ने च्‌यार हजार पोर सीलटप्‌पा लगाड़ला से: 5 एक-एक जाती माय्‌न बारे हजार पोर सीलटप्‌पो लगाड़्‌या, यहुदा ना जात्‌या माय्‌न बारे हजार पोर सीलटप्‌पा लगाड़ला से; रुबेन ना जात्‌या माय्‌न बारे हजार पोर, अने गाद ना जात्‌या माय्‌न बारे हजार पोर, 6 आसेर ना जात्‌या माय्‌न बारे हजार पोर, नप्‌ताली ना जात्‌या माय्‌न बारे हजार पोर, मनस्‌सीह ना जात्‌या माय्‌न बारे हजार पोर, 7 सीमोन ना जात्‌या माय्‌न बारे हजार पोर, अने लेवी ना जात्‌या माय्‌न बारे हजार पोर, ईस्‌साकार ना जात्‌या माय्‌न बारे हजार पोर, 8 जबुलुन ना जात्‌या माय्‌न बारे हजार पोर, अने युसुफ ना जात्‌या माय्‌न बारे हजार पोर, अने बीन्‌यामीन ना जात्‌या माय्‌न बारे हजार पोर सीलटप्‌पा लगाड़्‌या।