9 Aba hagundaarun gürigia luagu idewesei ligía, lugundun tau sun hanigi hedeweha lun Bungiu. Wéiriti giñe lagundaarun urúei Dawidi.
10 Ábati labiniruni Dawidi Bungiu ligibugiñe damuriguaü, lariñaga:
—Biniwabá lun súnwandan, Bungiu, Lubungiute Wáguchi Ísüraeli! 11 Bungiu Baba, wéirigutibu ani gabafutibu, íñugutibu ani úaraguatibu! Lugundun bani sun katei le siélubei luma le ubouagubei. Buguya urúeibei, buguya agumadihati le tímatimaati. 12 Búmagiñe liabin irisini luma inebesei. Buguya abugurubalin sun katei. Búhaburuguñein erei luma ubafu, buguya giñe íchugubei uéiriguni luma ubafu houn súngubei. 13 Ligía lébubei weteingiruñadibu lubéi guentó Bungiu Baba, eremuha wagía lun biri le íñugubei; 14 lugundun, kátañadinagia ani kátañanu numutuniña lun wíchuguba lan katei gíbeti bun? Lidan linarün katei, búmagiñe liabin sun katei, le wibihibei búmagiñe ligía wíchugubei bun. 15 Ítara waña bigibugiñe kei terencha ha ásügürütiña kei habéi meha sun wagüchagu, ani ítara liña wabagari ligibuagu ubóu le kei aban lamuñounga, úati ni murusun emenigini luagu.
16 —Aburemei, le Wabungiute, bani ani búmagiñe liabin sun irisini le, le waranserubei lun wábunagun aban ténpulu lun biri le sándubei! 17 Subudi numuti Bungiu Baba, luagu aríaahabani saminaü luma luagu hínsiñe lan úaraguni bun. Ligía lau lubéi lúaragun aritaguni níchigei sun le bun. Ani guentó, ariha naali lau ugundani luagu lau lan ugundani híchigei bánigu ha óundaragubaña ya hadewese bun.