1VAKOLINDO 12

Muvili gumwe go guna filungo fyolofu

12 Kota hila muvili fyoguli gumwe, nago guna filungo fyolofu, na filungo ifyo fyeka nayivaje fyolofu ila figuditaga muvili guve gumwe, na hihyo fyoyili kwa Chilisito. 13 Na yivaje vanu vamwe Vayawudi na vamwe siyo Vayawudi, vamwe vatantsi va vanu, na vayetu vanji vali wuhulu. Lechelelo hetwe tweka tukabatitswe na kung’weswa Muhe va Mulungu yuyo yumwe. 14 Muvili gulihela chilungo chimwe hela, ila guna filungo fyolofu. 15 Manyi ligulu lilonje kuta, "Kwasawuli heni siyo liwoko, ihyo heni siyo va muvili!" Mbe, kwa kulonga ihyo, lifuluche liduje kuva hono ha muvili? 16 Nalyo lipulichilo likalilonje, "Kwasawuli heni sitsili liho, ihyo heni siyo va muvili!" Mbe, kwa kulonga ihyo likakuduga kuva hono ha muvili? 17 Manyi muvili gweka guka guve liho, munu akakuhulika chinya ndawuli? Awu manyi muvili gweka gukaguve lipulichilo, munu akakunusa chinya ndawuli? 18 Lechelelo Mulungu afivisile filungo mu muvili, chila chimwe kota fyo aganile mwene. 19 Manyi akaaveafivisile fyeka five chilungo chimwe, muvili gukakuva chinya ndawuli? 20 Ihyo muvili guna filungo fyolofu, lechelelo muvuli go gumwe.

21 Duve, liho silifuluche kulilonjela liwoko, "Ntsigaya sida na heve!" Nambe mutwi sigufuluche gugalonjela magulu, "Ntsilihela sida na henye!" 22 Lechelelo fila filungo fya muvili fyo fiwonekaga fitenyanjifu, ifyo fyo fyamana hilo kulutila fila filungo finji. 23 Nafyo filungo fila fya muvili fyo tungufiwona figaya hesima, ifyo fyo tungufipela hesima hilo. Nafyo filungo fila fyo filihela nambe wunofu, tufipelaga hesima ya wiyeka, 24 na luvala ulo filungo fila fyo finofu sifiganaga hesima iyo. Lechelelo Mulungu afivisile hamwe filungo fya muvili na akavipelaje hesima hilo filungo fila fyo filihela wunofu. 25 Mulungu adisile ihyo ili kuleche kuva na chitika mu muvili, ila filungo fyeka fitanje chila chimwe na chiyage. 26 Manyi chilungo chimwe chitechetse, filungilo fyeka fitamaga hamwe nacho, na manyi chilungo chimwe chitsumilwe, duve filungilo fyeka fihechelelaga hamwe nacho.

27 Duve lelo, henye nyeka yo muvili gwa Chilisito, nayo chila yumwe venyu yo chilungo cha muvili ugo.