1 Né adiifoɛ ne akyerɛkyerɛfoɛ wɔ Antiokia asafo nanu. Bɛ yeɛ ole: Barnaba, Simeon bɔ bɛfrɛ ye Niger ne, Lukios bɔ ofi Kiren ne, Manaen, (bɔ ɔne amrado Herode fi nu ne) yeɛ Saul. 2 Mmerɛ bɔ bɛsõ Awurade, na bɛyɛ akɔngyere ne, honhom krongron ne hane kyɛ: "Ɛmɔye Barnaba ne Saul bɛma me, ná bɛɛyɛ adwuma bɔ yeti mvrɛle bɛ ne." 3 Yeti, bɛyɛle akɔngyere na bɛbɔle mbaeɛ beyiele ne, bɛfale bɛ sa bɛguale bɛ so, na bɛguale bɛ atee maa bɛhɔle.

4 Yeti, Barnaba ne Paul bɔ honhom krongron asoma bɛ ne hɔle Seleukia, bɛfili berɛ ne, bɛfale hyep bɛhɔle Kipro. 5 Bɛdwuli Salamis ne, bɛhyɛle yebo kyɛ bɛka Nyameɛ dwirɛ ne wɔ Yudafoɛ sua bɔ beyia nu nanu. Né Yohane boka-boka bɛ. 6 Bɛfale supɔ naso mukoraati bɛɛdwuli Pafos ne, bɛnwuni Yudaniɛ bie bɔ bɛfrɛ ye Bar-Yesu, né ɔyɛ magyek, na ne ɔte ngondombo diifoɛ. 7 Né sɔ biaa he ne Sergio Paul, bɔ ɔte mandam né amrado ne yeɛ bɛwɔ berɛ ɔ. Né Sergio Paul te ebie bɔ ye adwene nu la berɛ paa. Ɔfrɛle Barnaba ne Saul wale ye berɛ, na né ye nye aboro paa bɔ ɔpena kyɛ otie Nyameɛ dwirɛ ne. 8 Nakoso Elima bɔ ɔyɛ magyek (sɔ yeɛ né ye dumaa ne bo kyire ɔ) ne hyɛle yebo sili bɛ atee, na ɔbɔle mmɔden kyɛ ɔkɔhwe amrado ne kofi gyidie nanwo. 9 Na honhom krongron wale Saul bɔ bɛfrɛ ye Paul naso, na ɔneane Elima haa, 10 yeɛ ɔha hyirele ye kyɛ: "Wɔ bɔ asisie mukoraati wɔ wɔ nu, Abɔnzam awa, tenenee mukoraati tamfo, ɛngɔyakyi Awurade tenenee atee bɔ ɛkyea ye ne? 11 Nea, kesaalae Awurade sa wɔ wɔ so, na wɔ nye kosi, na mmerɛ bie kɔpɛ bɔ ɛngonwu eyia ɔ." Na ɛberɛ ala, ye nye so yɛle ye tumm, bɔ ne onwu hwee. Ná ne ɔfa ye sa fuefua pena ebie bɔ ɔkɔsɔ ye sa nu kohyire ye atee ɔ. 12 Amrado ne nwuni bɔ wasi ne, ɛberɛ ala, ɔyɛle gyidiniɛ, ofikyɛ Awurade ngyerɛkyerɛ ne maa ye nwo dwirili ye paa.

13 Paul ne ye mmango nemɔ fale ɛpo so fili Pafos wale Perga bɔ ɔwɔ Pamfilia ne. Bɛdwuli berɛ ne, Yohane yakyile bɛ berɛ sa hɔle Yerusalem. 14 Nakoso bɛ de, bɛfili Perga bɛwale Antiokia bɔ ɔwɔ Pisidia ne. Na homeda ne, bɛhɔle sua bɔ beyia nu nanu bɛɛtenane ase. 15 Bɛkengale Mmeraa ne Adiifoɛ nemɔ nwomaa ne bɛyiele ne, mbanyi bɔ bɛwɔ sua nanu ne maa bɛha bɛhyirele bɛ kyɛ: "Aliemaa mɔ, sɛ ɛmɔle edwirɛ bie bɔ ɛmɔkɔha bɛkɔhyɛ mmenia ne nguraen a, ɛmɔha." 16 Yeti Paul dwɔsole, na ɔfale ye sa yɛle nzɛngyerɛneɛ hyirele bɛ, yeɛ ɔhane kyɛ:

"Israelfoɛ ne maen-maen nanufoɛ bɔ ɛmɔsuro Nyameɛ, ɛmɔtie me. 17 Israel maen né Nyameɛ yele yɛ nana mɔ, na mmerɛ bɔ né bɛte ɛwɔfoɛ wɔ Egypt ne, ɔmane bɛ so, na ɔfale ye sa bɔ wama so ne yele bɛ fili berɛ. 18 Na onyane bɛ nwo aboterɛ wɔ ɛserɛ naso kɔyɛ afoɛ 40. 19 Mmerɛ bɔ ɔsɛkyele maen nzoo wɔ Kanaan aseɛ naso ne, ɔfale b’aseɛ ne mane bɛ kyɛ b’agyapadeɛ. 20 Ɛhe mukoraati hɔle wɔ afoɛ 450 nanu.

"Ɛhene si ne, ɔmane bɛ atemmufoɛ tonn oodwuli diifoɛ Samuel so. 21 Nakoso yesi ne, bɛhane kyɛ behia ɔhene, ná Nyameɛ fale Kis awa Saul bɔ ofi Bengyamin abusua nu ne mane bɛ, na olili bɛ so afoɛ 40. 22 Otuli ye ne, ɔfale David mane bɛ kyɛ ɔhene, na olili ye nwo adanzeɛ kyɛ: ‘Manwu Yese awa David, ɔte ebie bɔ m’ahone la ye so, na ɔkɔyɛ bɔ mekuro ɔ.’ 23 Kyɛbɔ Nyameɛ hyɛle bɔ ne, brienzua he bosoniɛ yeɛ ɔfale ye mane Israel kyɛ agyenkwa ɔ, na sɔ sona ne yeɛ ole Yesu. 24 Kora bɔ Yesu ba ne, Yohane ha hyirele Israelfoɛ mukoraati kyɛ, bɛbɔ asu bɛfa behyire kyɛ basakra b’adwene. 25 Nakoso Yohane baayie ye adwuma ne, ɔhane kyɛ: ‘Ɛmɔ adwene yɛ ɛmɔ kyɛ me yeɛ nne nwa? Nná me yeɛ nne Ye. Nakoso ɛmɔnea, ebie li me si ɔba, na ye gya bo mmaboa po, menvata kyɛ me sangye.’

26 "Aliemaa mɔ, Abraham bosofoɛ, ne ɛmɔ bɔ ɛmɔ aha bɔ ɛmɔsuro Nyameɛ, bafa edwirɛ bɔ ɔkɔmaa yekonya ngoa ne ba berɛ yɛ. 27 Yerusalemfoɛ ne bɛ mbanyi nemɔ de, bannwu ye, na mmerɛ bɔ bɛbu ye atɛn ne, edwirɛ bɔ adiifoɛ nemɔ hane, bɔ bɛkenga ye homeda biala ne, bɛmaa ɔwale nu. 28 Ɔwɔ nu, né edwirɛ biala nne ye nwo bɔ né odikyɛ begyina so bɛku ye ɔ, nakoso bɛha bɛhyirele Pilato kyɛ ohu ye. 29 Na beyiele bɔ bahworɔ bafa ye nwo namukoraati ne, bɛyele ye bɛfili bakaa naso, na bɛfale ye bɛtole kumaa nu. 30 Nakoso Nyameɛ tingyele ye fili ewue nu, 31 na ɔfale ngyẽa pee yele ye nwo ali hyirele bɛ bɔ bɛne ye fili Galilea hɔle Yerusalem ne. Na ɛhemɔ yeɛ kesaalae, bɛdi ye nwo adanzeɛ bɛkyire mmenia ɔ. 32 Yeti yɛ de, bɔ Nyameɛ fa hyɛle yɛ nana mɔ bɔ ne, ɛhene nwo nzɛmba yeɛ yɛka yɛ kyire ɛmɔ ne. 33 Na yɛ bɔ yɛte bɛ mmaa mɔ ne, Nyameɛ atingye Yesu amaa sɔ bɔhyɛ ne awa nu ama yɛ. Na sɔ ala yeɛ bahworɔ ye wɔ edwein bɔ ɔtɔ so nyɔ nanu ɔ; bahworɔ kyɛ:

‘Ɛte mma,

na ɛnɛ me koso, mayɛ wɔ baba.’

34 Bɔ ɔte yeɛ ole kyɛ, Nyameɛ tingyele ye fili awufo nu, na ongosi lle kyɛ okosa kɔhɔ tebea bɔ ɔkɔmaa ɔkɔporɔ nu; waha ɛhe nwo dwirɛ kyɛ:

‘Ɔdɔ bɔ onni hwamɔ bɔ nhyɛle David bɔ, kyɛ ngɔla ye ali ngohyire ye ne, ngɔfa ngɔma wɔ. Na kyɛbɔ ɔte biala ne, ɔkɔwa nu.’

35 Na waha ye wɔ edwein foforɛ nu kyɛ:

‘Bɔ odi nahorɛ ma wɔ ne, ɛngɔma ɔngɔporɔ.’

36 David de, ɔsõne Nyameɛ wɔ ye aworɛ ndoɔtoasoɛ nu, na owuli maa bɛsiele ye bɛbokale ye baba mɔ so, na ɔporɔle. 37 Nakoso, bɔ Nyameɛ tingyele ye ne de, wamborɔ. 38 Yeti aliemaa mɔ, yɛpena kyɛ ɛmɔnwu ye kyɛ, yɛnate yeso yeɛ yɛka bɔne-fakyɛ nwo dwirɛ yɛkyire ɛmɔ ne, 39 na nningyein bɔ Mose mmeraa nati, né ɛmɔdi ye nwo fɔ ne, ebiala bɔ okonya gyidie ne, bɛnate ye so bɛkobu ye bem wɔ ye nwo. 40 Yeti ɛmɔnea yé, ná bɔ baha ye wɔ adiifoɛ nemɔ nu ne, wamma ɛmɔ so. 41 Bɛhane kyɛ:

‘Ɛmɔtie, ɛmɔ bɔ ɛmɔgoro mmenia nwo,

ɛmɔma ɔyɛ ɛmɔ nwanwa ná ɛmɔtu bɛmini;

ofikyɛ meyɛ adwuma bie wɔ ɛmɔ aberɛ so,

sɔ adwuma ne, sɛ ebie ka kyire ɛmɔ po a,

ɛmɔ ngole ngoli.’ "

42 Ná Paul ne Barnaba fí sua nanu kɔ ne, mmenia ne srɛle bɛ kyɛ, homeda bieku, besa bɛbra, ná bɛɛha sɔ dwirɛ ne bieku behyire bɛ. 43 Bɛ pɔnone ne, Yudafoɛ ne bɛ bɔ basakra baayɛ Yudafoɛ bɔ bɛsõ Nyameɛ nanu pee lili Paul ne Barnaba si. Ná bɛne bɛ dwudwole, yeɛ bɛhyɛle bɛ nguraen kyɛ, bɛhɔ so bɛtena Nyameɛ adom nanu.

44 Na homeda bɔ oli berɛ ne, kuro nanufoɛ pee yiale nu kyɛ bɛbaatie Awurade dwirɛ. 45 Nakoso Yudafoɛ nemɔ nwuni mmeni lɔen ne, né ɔyɛ bɛ yea, yeti bɛhyɛle yebo bɛkekane mmusue dwirɛ bɛfa bɛbɔle Paul dwirɛ ne bɛguale. 46 Na Paul ne Barnaba fale akukuduro ha hyirele bɛ kyɛ: "Ɛmɔ yeɛ ne odikyɛ bɛdi moa bɛka Nyameɛ dwirɛ ne bɛkyire ɛmɔ ɔ. Nakoso ɔnate kyɛ ɛmɔ apia bato nekaa bie, na ɛmɔbu ɛmɔ nwo kyɛ ɛmɔ mvata daa ngoa nati, yɛkɔ maen-maen nanufoɛ ne berɛ. 47 Ofikyɛ Awurade aha ahyire yɛ kyɛ:

‘Maye wɔ kyɛ maen-maen nanufoɛ né kanea,

kyɛbɔ ɔkɔyɛ a, ekole bɛ bɔ bɛwɔ aseɛ ne noa dɔ ne ngoa ɔ.’"

48 Maen-maen nanufoɛ ne tele ɛhe ne, bɛhyɛle yebo bɛlili ahurusi, na bɛhyɛle Awurade dwirɛ ne anuonyam, ná bɛ bɔ bɛle ahone pa bɔ ɔkɔmaa bekonya daa ngoa ne yɛle gyidifoɛ. 49 Afei koso, Awurade dwirɛ ne trɛ hɔle maen nanu mukoraati. 50 Nakoso Yudafoɛ nemɔ tutu guale mmrasua bɔ bɛsuro Nyameɛ, ná bɛle dumaa ne so anu, na bɛtutu bɛguale atitire bɔ bɛwɔ kuro nanu ne koso so anu maa bɛtuli bɛ nye bɛsiele Paul ne Barnaba so bɛfoane bɛ bɛfili b’aseɛ naso. 51 Na asomafoɛ nemɔ poro-porole bɛ gya bo mvuture bɛguale bɛ so, na bɛsili nu bɛhɔle Ikoniom. 52 Na asuafoɛ nemɔ nye gyele, na honhom krongron wale bɛ so.