30 Yeti, Filipo tuli mirika hɔle ye nwo berɛ, na ɔtele kyɛ biaa ne kenga diifoɛ Isaiah nwomaa ne. Filipo bisale ye kyɛ: "Bɔ ɛkenga ne, ɛte ye bo?" 31 Biaa ne hane kyɛ: "Sɛ ebie angyire me a, ngɔyɛ sɛɛ ne mate ye bo." Yeti ɔsrɛle Filipo kyɛ ɔɔtena ye nwo berɛ. 32 Edwirɛ bɔ ne ɔkenga ye wɔ tworɔnzɛm nanu ne ɛhe:

"Bɛfale ye bɛhɔle kyɛ boan bɛ bɛkwaahu ye ne,

na kyɛbɔ boan bɔ bɛpepɛ ye nwo nwiaa yɛ konn ne,

sɔ ala yeɛ ye koso wammukye ye noa ɔ.