Apocalipse 15

Jwan jamínu̱ꞌ rí ma̱ꞌkha̱ nda̱wa̱á jayu

1 A̱ꞌkhue̱n ndi̱yo̱o̱ i̱mba̱ rí phú wáá mi̱ndaꞌkho ná mikhuíí jamí phú namakúún xa̱bo̱ eꞌne ne̱: mbá juwiin ánje̱l tsí juda mbá juwan inii jamínu̱ꞌ rí ma̱ꞌkha̱ nda̱wa̱á jayu. Ga̱jma̱á jamínu̱ꞌ rúꞌkhue̱n ma̱ga̱tíya̱a̱ꞌ-wóo rí najiꞌnáa Ana̱ꞌlóꞌ. 2 Ndi̱yo̱o̱ mbá iya a̱pha̱ mangaa, rí xómá iyaniwan ja̱nda̱wa̱ꞌ ga̱jma̱á agu jaꞌnii. Ná rawuun iya a̱pha̱ wájun tsí ni̱ꞌngu̱ún inuu xu̱kú xkawi̱i̱ꞌ jamí túne̱-mba̱a̱ xtiꞌkhuu̱, xúꞌkhue̱n máꞌ túdri̱guíi̱ tsinuu̱ ni máꞌ*15.2 Ríga̱ mbá tikhu i̱yi̱i̱ꞌ griégo̱ rí wayuu ná na̱nguá i̱ꞌkha̱ ajngáa «tsinuu̱ ni máꞌ». kíxnuu mbiꞌyuu̱. Judee̱ ixe̱ nidi̱í rí gíꞌdoo nítúu, rí nijanúu̱ neꞌne Ana̱ꞌlóꞌ. 3 Jamí nusiee̱n ajmúú drígo̱o̱ Moisés, yumbée Ana̱ꞌlóꞌ, jamí ajmúú drígo̱o̱ A̱ꞌdá-mógó:

«Táta̱, ikháánꞌ ñajwaanꞌ Ana̱ꞌxo̱ꞌ tsí gíꞌdoo mbá xúgíí tsiakhe̱.

Phú mba̱a̱ jamí phú wáá mbá xúgíí rí nathane̱.

Thúngaa tsí naꞌthán-ñájúún tsí jaꞌwuun ñajwaanꞌ,*15.3 Ríga̱ mbá tikhu i̱yi̱i̱ꞌ griégo̱ rí wayuu rí naꞌthán: «Thúngaa tsí naꞌthán-ñájuun mbá xúgíí xuajñuu numbaa ñajwaanꞌ».

jamí mbá xúgíí rí nathane̱ máján jamí jmbu.

4 Táta̱, tsáa tsí ma̱xámíñuu gátha̱ne̱, jamí ma̱xáꞌne-mba̱ánꞌ rá.

Numuu rí i̱ndo̱ó máꞌ ikháánꞌ ñajwaanꞌ tsí jaꞌwii.

Mbá xúgíí numbaa ma̱guwá xa̱bo̱ ná inaaꞌ jamí mune̱-mbáa̱nꞌ,

numuu nduyáa̱ rí phú máján rí nathane̱».

5 Nda̱wa̱á a̱ꞌkhue̱n ni̱ya̱xe̱ mikhuíí jamí ndi̱yo̱o̱ ni̱ma̱ꞌthoo guꞌwá rí phú i̱tha̱án tsúꞌkhaa ná xtáa Ana̱ꞌlóꞌ. 6 Ikhín nigájnúú ánje̱l tsí mbá juwiin tsí juda mbá juwan inii jamínu̱ꞌ. Júwúu̱n xtíin máján rí mbiꞌyuu líno̱, jaꞌwu ne̱ jamí nambiꞌi-taꞌa ne̱, xúꞌkhue̱n máꞌ ja̱rnga̱xtúu̱n mbá xtíin rí giaxu̱u̱ ajwa̱nꞌ mo̱jmo̱ꞌ ná xo̱xtúu̱n. 7 A̱ꞌkhue̱n mbáa tsí akhu̱un mbo̱ nduya nixnúu̱ mbámbá xúba̱ me̱jno̱ꞌ ajwa̱nꞌ mo̱jmo̱ꞌ mbámbáa ánje̱l. Ná awúun xúba̱ gajni̱í rí najiꞌnáa Ana̱ꞌlóꞌ, tsí xtáa̱ ndaꞌya jámuu. 8 A̱ꞌkhue̱n nijni̱í gúní ná awúun guꞌwá dxákuun, ga̱jma̱á numuu rí nambiꞌi-taꞌaa Ana̱ꞌlóꞌ jamí ga̱jma̱á numuu ski̱yu̱u̱ꞌ. Nimbáa tsíyoo ma̱to̱ꞌo̱o̱ ná guꞌwá dxákuun asndo gámbánuu mbá juwan jamínu̱ꞌ rí juda mbá juwiin ánje̱l.