Cikozyanyo Comuvubi Mufuba-fuba
13 Umwi mwaalumi akati kembunga wakateeti kuli Jesu, "Omwiiyi, mwaambile muzyalwama kuteeti aabane andime lubono ndwaakatusiila tata naakafwa."
14 Kono Jesu wakamutaba kuteeti, "Mweenzuma, ino ngwani wakandipa nguzu zyokwaatula naanga kumwaabanya lubono lwenu nobile?" 15 Mpoonyina wakazwidaanembo kubaambila boonse kuteeti, "Amumamele okulikwabilila kubusyacivule mwangu bwemisyobo-misyobo, kaambo buumi bwenu tabwiimvwi azintu zyomujesi, naanga muvube buti."
16 Mpoonyina Jesu wakabaambila cikozyanyo eeci, "Imwi nako kwaluumwi mwaalumi muvubi wajesi muunda mubotu. Zyoonse zyaakabyalide zyakamupa bukutuzi bubotu. 17 Naakabona namu, wakatalika kuyeeya mumoyo wakwe kuteeti, ‘Tandijesi mokubikila zilyo zyangu zyoonseezi. Ino ndilacita buti?’ 18 Mpoonyina wakateeti, ‘Ndilacita namu, ndilamwacoola matalaangu, okuyaka mapati munditakabike zilyo zyangu ezimwi zintu zyoonse. 19 Mpoonyina ndiyoolyaambila kuteeti, Yebo osicoolwe! Kwemyaaka minji, zyoonse zintu zyoyanda ulizibambide. Liibe, ulye, unywe okulibotezya.’ 20 Kono Leza wakamwaambila kuteeti, ‘Yebo omufuba-fuba! Sunu masiku ngoonyaaya ulafwa. Mpoonyina ngwani uyoobweza eezi zintu zyoonse zyowakalilundaikila?’"
21 Mpoonyina Jesu wakamaninizya kateeti, "Oobu mbociyooba kulaabo balilundikila buvubi lwabo beni kono kabatavubide kumensaa Leza."
Kusyoma Leza
(Mateyo 6:25-34)
22 Mpoonyina Jesu wakateeti kuli basikwiiya bakwe, "Kaambo keeci, ndamwaambila kuteeti mutabilaili ezyokulya zyomuyandika kuteeti mupone na zizwaato zyomweelede kuzwaata. 23 Ede, buumi mbupati loko kwiinda zyokulya, omubili cintu cipati loko kwiinda zizwaato. 24 Amubone bacikwangala! Tababyali mbuto naanga kukutula naanga kubaamatala ezilyo, kono Leza ulabalisya! Iino nywebo mulayandika kwiinda bayuni! 25 Ape ngwani ukonzya kuyungizizya nokuceya kubuumi bwakwe kwiinda mukubilaila? 26 Natamukonzyi kucita naanga eeci ciniini, ino niinzi nemubilaila eezi zimwi? 27 12:27 1 Bami 10:4-7; 2 Makani 9:3-6.Amulange maluba-luba oomusaka mbwaakomena. Taabeleki naanga kulipangila zizwaato. Kono ndamwaambila kuteeti naanga Mwami Solomoni obuvubi bwakwe boonse taalijesi zizwaato zibotu mbuli lyomwi lyamaluba-luba aaya. 28 Ngu Leza uzwaatika bwizu bomusaka, bwizu bokuteeti sunu kobuli, junza bwatentwa mumulilo. Ino takonzyi kubikila maano kuteeti amuzwaatike na? Nduniini buti lusyomo lwenu!
29 "Iino nywebo mutabikili maano kuli zyemutilye okunywa. Ape mutanoobilaila ezintu zyomusyobo namu. 30 Ede benyika eeyi babikila maano azintu eezi zyoonse, kono Uso ulizi kuteeti mulaziyanda. 31 Kono amubikile maano kuli zyo Bwami bwakwe, mpoonyina uyoomupa zyoonse eezi zyasyaala."
Buvubi Bokujulu
(Mateyo 6:19-21)
32 Kuzwaawo Jesu wakateeti, "Utayoowi, ookatanga kaniini, kaambo Uso uliboteledwe kumutambula mu Bwami bwakwe. 33 Amuuzye zyoonse zyomujesi, mali mupe bapenzi. Amulipangile zikwama zitamani, ndaamba buvubi bokujulu butaceyi, kaambo ko takusiki mubbi, ape takukwe lumoma lukonzya kubusinya. 34 Ndaamba namu kaambo myoyo yenu inoolooko kuli buvubi bwenu."