Lucas 8

Jesu Waumuzya Guwo

22 Bumwi buzuba Jesu abasikwiiya bakwe bakanjila mumugolo mpoonyina wakabaambila kuteeti, "Atuzubukile kutala limwi lyo lwizi." Kumane bakatalikizya. 23 Nibalikuyoobuya mumugolo, Jesu wakoona. Mpoonyinaawo kwakabbubbula guwo pati mulwizi, mane maanzi akatalika kukupaikila mumugolo. Bakaba muntenda mpati. 24 Basikwiiya bakeza kuzoomubusya kabateeti, "Mwami! Mwami! Tuyanda kufwa!"

Mpoonyina Jesu wakabuka okupatookela guwo amayuwe, mpoonya-mpoonya zyakamana olwiizi lwakaumuna zii. 25 Mpoonyina wakateeti kuli basikwiiya bakwe, "Lulikuli lusyomo lweenu?"

Kono basikwiiya bakakomokwa okuyoowa loko, okulyaamboozya kabateeti, "Ngwanooyu uunga mane apatooka guwo amayuwe zilamumvwida?"

Jesu Watanda Madimona Manji Mumwaalumi

26 Jesu abasikwiiya bakwe bakazubuka mumugolo okusika kucilalaanda cabana Gelasa, calangene o Galileya.