1 Alatala kininkininma nɛn Yaxuba yixɛtɛne ma. A mɔn Isirayila yamaan sugandima nɛn, a mɔn yi e radɔxɔ e bɔxɔni. Xɔɲɛne yi sa e fari, e findi Yaxubaa yamaan na.

2 Siyaan bonne fama nɛn Isirayila kaane tongodeni, e siga e ra Alatalaa yamanani. Isirayila yamaan yi siyane findi e konyine ra, xɛmɛn nun ɲaxanla. Na kiini, muxun naxanye e findi konyine ra, e fan yi ne findi e konyi ra, e findi e ɲaxankata muxune kanne ra.

3 Isirayila kaane, lɔxɔna nde, Alatala matabun fima nɛn ɛ ma ɛ tɔrɔne nun ɛ lanbaranne nun ɛ konyiya xɔdɛxɛn ɲan xanbini. 4 Na waxatini, ɛ sigi ɲaxumɛni ito sama nɛn, ɛ Babilɔn mangan magele, ɛ naxa,

Ee! En ɲaxankata muxun mi fa na!

A gbalon bata ɲan!

5 Alatala bata muxu ɲaxine bosaan sɛnbɛn kala.

A bata nɔ sɔtɔ dunganna kala

6 naxan yi siyane mabɔnbɔma xɔlɔni

a yɛ wuyaxi,

dan mi naxan na,

naxan fitinaxin yi nɔɔn tima yamanane xun na

a gbalon sa e fari

naxan dan mi na.

7 Iki, yamanan birin bata lu bɔɲɛ xunbenli,

muxune gbelegbelema sɛwani.

8 Hali fɔfɔne nun Liban sumanne sɛwaxi

i kala feen na, e a falama,

e naxa, "Xabu i binbin maluxun,

muxu yo mi fa fama nxu sɛgɛdeni."

9 Faxa muxune e ramaxama nɛn bɔxɔn bun ma

fa i ralandeni,

i nɛma fɛ waxatin naxan yi,

dunuɲa ito muxu gbeene birin.

Naxanye yi siyane mangane ra,

ne birin kelima nɛn.

10 E falan ti, e naxa,

"I fan bata findi fangataren na

alo nxu tan.

Iki, i bata lu alo nxu tan!"

11 E bata ɛ nun i ya wason

nun i ya bɔlɔn xuiin birin nagodo gaburun na.

Kɔnɛne nan i saden na i bun ma,

kunle yi findi i ya bitinganna ra.

12 Ee! I bata bira sa keli kore

i tan tagalan saren naxan dɛgɛma subaxani!

I bata woli bɔxɔni,

i tan naxan yi siyane rabirama!

13 I yi a falama i yɛtɛ ma, i naxa,

"N tema nɛn kore xɔnna ma,

n sa n ma mangaya gbɛdɛn dɔxɔ mɛnni

Alaa sarene faxa ra.

N sa dɔxɔ alane tagi,

e malanma geyaan naxan ma sogeteden kɔmɛnna ma.

14 N tema nɛn kundane fari,

N yi lu alo Kore Xɔnna Ala."

15 Koni e bata sa i sa fɔ gaburun xɔnna ma

i lu laxira yili tilinxin na.

16 Naxanye na i to,

ne i matoma nɛn ki faɲi.

E miri i ya fe ma,

e yi a fala, e naxa,

"Xɛmɛni ito xa mi yi bɔxɔn naxuruxurunma ba,

a yi yamanane yimaxa?

17 Ito xa mi dunuɲa findi tonbonne ra ba

a yi taane kala,

a tondi kasorasane beɲinɲɛ?"

18 Ɲɔndin na a ra,

siyane birin mangane maluxunxi binyen nin

e keden kedenna birin yi lu e gaburune ra.

19 Koni i tan bata woli ayi i ya gaburun fari ma

alo wudi yii xaren biraxina.

Faxa muxune bata sa i yɛɛ ma,

naxanye faxaxi silanfanna ra

naxanye bata sa gɛmɛne fari yinla ra.

I bata lu alo binbi yibodonxina.

20 Koni i tan mi maluxunma alo ne

amasɔtɔ i bata i ya yamanan kala,

i yi i ya yamaan naxɔri.

Bɔnsɔn ɲaxina fe mi fa falama habadan.

21 Ɛ a diine faxa feni tɔn

lan e benbane gbalo feene ma.

E nama fa keli,

e yi bɔxɔn birin findi e gbeen na,

e dunuɲa rafe e taane ra.

22 Alatala Sɛnbɛn Birin Kanna falan ni ito ra, a naxa,

"N kelima nɛn Babilɔn taan xili ma,

n yi a xinla ralɔ ayi

e nun a muxun naxanye na lu e nii ra

e nun e diine nun e yixɛtɛne birin."

Alatalaa falan nan na ra.

23 N taani ito findima nɛn dara yiren na

gbalane dɛnaxan yi e nun sagalene dingirana.

N yi Babilɔn taan makɔ halagi ti silanden na.

Alatala Sɛnbɛn Birin Kanna falan nan na ra.

24 Alatala Sɛnbɛn Birin Kanna bata a kɔlɔ, a naxa,

"N bata feen naxan yitɔn,

na ligama nɛn.

N bata naxan nagidi,

na kamalima nɛn.

25 N Asiriya kaane halagima nɛn n ma yamanani,

n yi e raxɔri n ma geyane fari.

E konyiyaan bama nɛn n ma yamaan xun ma,

e goronna yi ba e tungunna fari."

26 Ala na nan nagidixi dunuɲa birin xili ma,

a yiini texi siyane birin xili ma na kii nin.

27 Xa Alatala Sɛnbɛn Birin Kanna fena nde ragidi,

nde nɔɛ a yikalɛ?

A na a yiini te,

nde nɔɛ a raxɛtɛ a funfuni?

28 Waliyiya falani ito tixi Manga Axasi faxa ɲɛɛn nan na.

29 Ɛ tan Filisitine,

e yi ɛ bɔnbɔma bosaan naxan na,

na bata kala,

koni ɛ nama sɛwa na ra.

Amasɔtɔ koson minima nɛn saɲi faxaxin bɔnsɔnni,

ninginangan yi mini koson bɔnsɔnni naxan tuganma.

30 Tɔrɔ muxu gbeene,

ne donseen sɔtɔma nɛn,

sɛnbɛtarene yi e matabu bɔɲɛ xunbenli.

Koni ɛ tan Filisitine,

n na ɛ bɔnsɔnna halagima fitina kamɛn nan na.

Naxanye na lu e nii ra,

ne birin yi faxa.

31 Ɛ tan taa makantanxine,

ɛ wuga xuini te!

Taan muxune, ɛ gbelegbele!

Filisiti yamaan bata tunnaxɔlɔ e ma,

amasɔtɔ tɛɛ tutin fama nɛn

sa keli sogeteden kɔmɛnna ma.

Muxu yo mi baxi yaxune ganla safane ra.

32 Filisitine xɛrane yabin findin nanse ra?

"Alatala nan Siyon taan tixi,

a yamaan yiigelitɔne yigiyade faɲin sɔtɔma dɛnaxan yi."